Փաստ ինֆո

Հաջորդ խորհրդարան կանցնեն այն ուժերը, որոնք գրագետ քարոզարշավ կիրականացնեն: Այս մասին «Փաստինֆո»-ի հետ զրույցում ասաց քաղտեխնոլոգ Արմեն Բադալյանը՝ կարծիք հայտնելով, թե այս ընտրությունների ընթացքում ծրագրերի և գաղափարների պայքար է լինելու։

«Եթե ընտրություններին մասնակցում են Նիկոլ Փաշինյանը և Ռոբերտ Քոչարյանը, որպես հիմնական մրցակիցներ, ապա արդեն գաղափարների պայքար է:

Գաղափարները միայն ծրագրերը չեն, որ գրում են, գաղափարներ են այն աշխարհայացքները, մոտեցումները , որ իրականացնելու է հաղթող ուժը»,-նշեց Արմեն Բադալյանը:

Բանախոսը հավանական համարեց, որ ընտրություններն այդուհանդերձ կկայանան։

«Ընտրություններ ուզեն, թե չուզեն պետք է անցկացնեն, քանի որ և՛ երկրի ներսում, և՛ դրսում լեգիտիմության խնդիր կա, պահանջ կա հստակեցնել ներքաղաքական գործընթացները: Երկիրը ոչ մի տեղ չի գնում, դոփում է ր տեղում, իսկ դա բերելու է սոցիալական լուրջ խնդիրների, դրա համար հավանականությունը, որ ընտրություններ տեղի կունենան ավելի շատ է, քան որ տեղի չեն ունենա, չնայած ոչինչ չեմ բացառում»,-ասաց Բադալյանը՝ արձանագրելով, որ Փաշինյանի հրաժարականը պահանջող ընդդիմադիր կուսակցությունները եւս կմասնակցեն ընտրապայքարին։

Փորձագետն արձանագրել է Հայրենիքի փրկության շարժումը չի կարողացել հասնել իր նպատակին եւ այդ պատճառով էլ շարժման անդամ հանդիսացող հիմնական կուսակցությունները որոշել են մասնակցել ընտրություններին.

«Եթե հունիսի 20-ին տեղի է ունենալու ընտրություններ, փաստի առաջ կանգնեն, եթե ասեն՝ չենք մասնակցելու: Այդ դեպքում կմասնակցեին «Իմ քայլը», ԲՀԿ-ն, ԼՀԿ-ն, իսկ ով չի մասնակցում դուրս կմնա պայքարից»,-ասել է զրուցակիցը:

Արմեն Բադալյանի դիտարկմամբ՝ ՀՓՇ-ն ի սկզբանե սխալ ռազմավարություն էր ընտրել, պայքարի սխալ գործիքներ ընտրել, ինչի պատճառով էլ հաջողության չհասավ.

«Արեցին բոլոր հնարավոր սխալները, որ հնարավոր էր, արեցին սխալներ, որոնք դժվար էր անգամ մտածել: Եթե դու և՛ սխալ ռազմավարություն ունես, և՛ սխալ մարտավարություն, զրո արդյունք ես ունենում»,-ասել է քաղտեխնոլոգը՝ միևնույն ժամանակ արձանագրելով, որ ՀՓՇ-ն դերակատարում ունեցավ այն հարցում, որ իշխանությունը որոշեց գնալ ընտրությունների.

«Բարգավաճը, հանդիսանալով ՀՓՇ անդամ, տեսավ, որ շարժումը հաջողություն չի գրանցում, որոշեց համաձայնության գալ գործող վարչապետի հետ, նրա հրաժարականի դեպքում թեկնածու չառաջադրել և մասնակցել ընտրություններին: ԼՀԿ-ն ևս իր առանձին գիծն էր տանում, տեսնելով որ ոչ մի հաջողություն չի ունենում, որոշակի քաղաքական-առևտրային մեջ մտնելով գործող իշխանության հետ , տարբեր հարցեր լուծելուց հետո, վերջիվերջո եկավ այն եզրակացության, որ մասնակցելու են ընտրություններին»,-ասաց Բադալյանը:

Անդրադառնալով Ընտրական օրենսգրքի հնարավոր փոփոխություններին՝ քաղտեխնոլոգը համոզմունք հայտնեց, որ արդար և թափանցիկ ընտրություններ կարելի է անցկացնել և՛ գործող և՛ նոր օրենսգրքով, եթե իշխանությունը նման կամք ունենա.

«Արդեն 30 տարի է, Հայաստանում ձև են անում, թե Ընտրական օրենսգիրք են փոխում և դա է մեղավոր, որ ընտրությունները վատ են անցնում: Հայաստանում և՛ համամասնական և՛ մեծամասնական ընտրակարգերի դեպքում էլ ընտրությունները կեղծել են: Խնդիրն ընտրական օրենսգրքի մեջ չէ, շատ լավ ընտրություններ կարելի է անցկացնել և՛ համամասնական և՛ վարկանշային ընտրակարգով: Երկուսն էլ լավն են, ուղղակի խնդիրն այն է, իշխանությունները ցանկություն ունենան անցկացնելու նորմալ ընտրություններ: Եթե չունեն, ցանկացած օրենսգիրք էլ չի օգնելու հասարակությանը՝ ստանալ քաղաքական իրական պատկերը»,-ասաց Բադալյանը:

Վերջինս կարծում է, որ Ընտրական օրենսգրքի փոփոխությունները իմքայլական պատգամավորների պահանջն է, քանի որ նրանց մեծ մասը վստահ չեն, որ ռեյտինգային ընտրակարգով կանցնեն խորհրդարան.

««Իմ քայլում» կան պատգամավորներ, որ գիտեն, վարկանշային ընտրակարգով չեն կարող ընտրվել, քանի որ զրոյական վարկանիշ ունեն: Նրանք խորհրդարանում հայտնվելու ցանկություն ունեն, իսկ խորհրդարանում կհայտնվեն միայն այն դեպքում, երբ լինի համամասնական ընտրակարգ, շոգեքարշը լինի վարչապետը, իսկ նրանք էլ վակուումների մեջ նստած շարժվեն դեպի խորհրդարան,ուստի պայման դրեցին, որ ԸՕ-ն փոխվի, վարչապետն էլ ենթարկվեց նրանց»,-ասաց զրուցակիցը:

Արմեն Բադալյանը դժվարացավ պատասխանել՝ գործող իշխանությունը կդրսևորի արդար ընտրություններ անցկացնելու քաղաքական կամք, թե՝ոչ.

«Հայաստանում բոլոր իշխանությունները ասում են, որ մենք ազատ արդար թափանցիկ ընտրություններ ենք անցկացնելու, բայց բոլոր էլ կեղծում են, բացի 90թ-ի Գերագույն խորհրդի ընտրությունները և առաջին նախագահի առաջին ընտրությունները, մնացած ընտրությունները կեղծված են:

Քաղտեխնոլոգը կարծում է, որ քաղաքական ուժերի խորհրդարան անցնելու շանսերը մեծապես կախված են գրագետ և ճիշտ նախընտրական քարոզարշավ անցկացնելուց.

«Բոլոր այն ուժերը, որոնք գրագետ կաշխատեն, գագետ քարոզարշավ կանցկացնեն ընտրությունների ժամանակ հաջողություններ կունենան»։

Աղբյուր` Փաստինֆո