Փաստ ինֆո

Ռուսաստանի պատվիրակությունը, որը մասնակցում է Ժնեւում ընթացող ՄԱԿ-ի Մարդու իրավունքների խորհրդի 46-րդ նստաշրջանին, գնահատել է որպես «չափազանց ոչ օբյեկտիվ» Սիրիայի վերաբերյալ բանաձևը, որն ընդունվել է Մեծ Բրիտանիայի, Եվրամիության երկրների, Թուրքիայի, Հորդանանի, Քաթարի եւ Քուվեյթի նախաձեռնությամբ:

ՌԴ պատվիրակության ներկայացուցիչ Դմիտրի Վորոբյովը նստաշրջանում ունեցած ելույթում հայտարարել է, որ այդ փաստաթուղթը «չափազանց կողմնակալ է, կառուցված է ոչ հրապարակային ենթադրությունների եւ կեղծ դատողությունների վրա, խեղաթյուրում է իրականությունը եւ կրում է բացահայտ քաղաքականացված բնույթ»:

Դիվանագետը նշել է, որ ռուսական պատվիրակությունը փորձել է հայտնաբերել բանաձեւի նախագծում, որը «պատրաստել են բրիտանացի գործընկերները», »գոնե ինչ-որ առողջ հատիկ կամ օբյեկտիվության ակնարկ»: Սակայն հեղինակները, «չամաչելով, մաքսիմալ խտացրել են գույները՝ պատրաստելով միակողմանի, չհավասարակշռված եւ ուղղման չենթարկվող փաստաթուղթ, դրանում ներառել են բոլոր մտացածին եւ աներևակայելի մեղադրանքները՝ դրանք հասցեագրելով սիրիական հակամարտության կողմերից միայն մեկին»: ՌԴ պատվիրակության ներկայացուցիչն ուշադրություն է հրավիրել այն փաստի վրա, որ բանաձևում «չկա հստակ հղում ահաբեկչության դեմ պայքարի հրամայականին և դրանով իսկ խեղաթյուրվում է Սիրիայում տեղի ունեցած ողբերգության իրական պատճառը»: Բացի այդ, բացահայտված չէ «Սիրիայի տարածքի մի մասի արտաքին օկուպացիայի եւ բնական հարստությունների թալանի» թեման, աննկատ են մնացել սիրիական իշխանությունների ջանքերը՝ ճգնաժամը հաղթահարելու համար:

Բանաձևում որպես քննադատության և դատապարտման գլխավոր թիրախ են ընտրվել Սիրիայի իշխանությունները։ Դրանում նշվում է, որ «տասնյակ հազարավոր մարդիկ են սպանվել իշխող վարչակարգի կողմից կալանքի տակ պահելու ժամանակ», ասվում է նաեւ այն մասին, որ «սիրիական իշխանությունները լայնածավալ եւ սիստեմատիկ հարձակումներ են իրականացրել քաղաքացիական բնակչության վրա՝ ամուր արմատավորված քաղաքականության համաձայն, ներառյալ մարդկության դեմ հանցագործությունները»:

Բանաձևին, Ռուսաստանից բացի, դեմ են քվեարկել Հայաստանը, Բոլիվիան, Վենեսուելան, Չինաստանը և Կուբան։ Չինաստանի ներկայացուցիչն իր ելույթում նշել է, որ դրա բովանդակությունը «անարդար եւ ոչ օբյեկտիվ» է, իսկ փաստաթուղթն ինքը «միակողմանի ճնշում է գործադրում Սիրիայի կառավարության վրա»: «Բանաձեւի նման նախագիծը չի նպաստի սիրիական հարցի քաղաքական լուծման հասնելուն եւ չի կարողանա թեթեւացնել սիրիացի ժողովրդի տառապանքները», - ամփոփել է դիվանագետը:

Աղբյուր` Փաստինֆո