Փաստ ինֆո

«Իմ քայլ»-ի կուլիսային խաղեր սկսելու և Նիկոլ Փաշինյանի փոխարեն այլ թեկնածուի առաջադրելու հավանականությունը չնչին է։ Այդ քաղաքական ուժում Նիկոլ Փաշինյանից բացի այլ երևացող դեմք չկա, և այդ թիմը բավականին խախուտ է։ «Փաստինֆո»-ի հետ զրույցում այս մասին ասաց քաղաքագետ Արմեն Բաղդասարյանը։

Քաղաքագետը նկատեց՝ Նիկոլ Փաշինյանը զգուշանում է իր թիմից, քանի որ հավանականություն կա, որ եթե իր փոխարեն որևէ մեկը նշանակվի այդ թիմից, կարող է օգտվել հնարավորությունից և կուսակցության ներսում հեղաշրջում իրականացնել․ «Նիկոլ Փաշինյանը, այս վտանգն աչքի առջև ունենալով, այդ քայլին չի գնա։ Նա ոչ մի դեպքում ինքնակամ թեկուզ կես ժամով իշխանությունը որևէ մեկին չի զիջի»,-նշեց Արմեն Բաղդասարյանը։

Հարցին՝ արդյոք իրենց թիմում չկա՞ն մարդիկ, որոնք վարչապետ դառնալու հավակնություն ունեն, այդ թվում Անդրանիկ Քոչարյանը, Տիգրան Ավինյանը, Արմեն Բաղդասարյանն ասաց․ «Հավակնություններ ունեն, բայց վստահաբար կարողություններ չունեն։ Պետություն ղեկավարելու ունակություններ այնտեղ որևէ մեկը չունի, այդ թվում նաև Նիկոլ Փաշինյանը»։

Քաղաքագետը նկատեց՝ իշխանությունը թեկուզ ձևականորեն կորցնելը Նիկոլ Փաշինյանի համար կործանարար է համարում, դրա համար իր ունեցած լծակներից թեկուզ չնչին մաս ուրիշին չի տա։

Ինչ վերաբերում է հարցին, թե որքանով է Նիկոլ Փաշինյանն ընդունելի վարչապետի թեկնածու «Իմ քայլ»-ի սորոսական պատգամավորների համար, քաղաքագետը նշեց, որ սորոսական թևն իր օրակարգն ունի և քանի դեռ նրանք կարողանում են Նիկոլ Փաշինյանի միջոցով իրենց օրակարգն առաջ տանել, նրանց համար ընդունելի է․

«Հիմա այնտեղ բավականին լուրջ առճակատում կա, փորձում են մինչև ընտրություններն ԸՕ բարեփոխումներն իրականացնել։ Քանի որ սորոսական թևն իր օրակարգն ունի, իսկ Հայաստանում «Իմ քայլ»-ից բացի որևէ այլ քաղաքական ուժ չի համաձայնվի այդ օրակարգն առաջ տանել, ուստի այդ թևն ուզած չուզած իր բոլոր ծրագրերը Նիկոլ Փաշինյանի հետ է կապում»,-եզրափակեց Արմեն Բաղդասարյանը։

Աղբյուր` Փաստինֆո