Փաստ ինֆո

Խորհրդարանում մեկնարկեց Վճռաբեկ դատարանի դատավորի ընտրության երկրորդ փուլը։

Վճռաբեկ դատարանի դատավորի թեկնածու Արմեն Հայկյանցը, դիմելով պատգամավորներին, մեջբերեց Եվրոպական դատավորների խորհրդատվական խորհրդի եզրակացություններին, որտեղ նշվում է՝ իշխանական բոլոր թևերն օժտված են նշանակալի իշխանությամբ․

«Դատավորներին տրվում են ընդարձակ իշխանություն և իրավասություններ, հետևաբար հասարակությունը և իշխանական մյուս թևերը պետք է բավարարված լինեն, որ բոլոր այն դատավորները, որոնց վստահված է նման իրավասություն, պետք է լեգիտիմ հիմք ունենան, որի հիման վրա ամբողջ հասարակության անունից հանդես կգան նման իշխանությամբ։ Որտեղի՞ց և ինչպե՞ս են դատավորները ստանում այդ լեգիտիմությունը։ Եվրոպական դատավորների խորհրդատվական խորհուրդը հստակ նշում է, որ դատավորը, որը նշանակվում կամ ընտրվում է Սահմանադրությանը և օրենքների սահմանած կանոնների խստիվ պահպանմամբ, այդքանով ձեռք է բերում իր սահմանադրական իշխանությունը և լեգիտիմությունը»,-նշեց Արմեն Հայկյանցը։

Վերջինս նկատեց՝ Վճռաբեկ դատարանի դատավորի ընտրության առաջին փուլում ԲԴԽ նախագահը դատավորների թեկնածուներին ներկայացնելուց բացի որևէ այլ դերային գործառույթ չուներ, սակայն նրան առաջադրված հարցերի շրջանակը փաստում է այն մասին, որ քննարկման ժամանակ դուրս եկան նախատեսված ընթացակարգային կարգավորումից․ «Թեկնածուներին ներկայացնող իրավասու անձն ընդամենը պետք է կատարեր նման գործառույթ։ Չենք ժխտում, որ այն հարցերը, որոնք այդ ժամանակ բարձրացվեցին և քննարկվեցին, կարևոր չեն պետության համար, բայց դրանք պետք է քննարկվեն օրենսդրորեն նախատեսված ընթացակարգի շրջանակներում։ Վճռաբեկ դատարանի դատավորի ընտրության համար նախատեսված ընթացակարգը նման կարևորության հարցերի համար նախատեսված չէր»,-ասաց Արմեն Հայկյանցը։

Աղբյուր` Փաստինֆո