Փաստ ինֆո

ԱԺ-ն լիագումար նիստերի օրակարգ չընդգրկեց «Լուսավոր Հայաստան» խմբակցության ներկայացրած «Զինվորական ծառայության և զինծառայողի կարգավիճակի մասին» փոփոխություն կատարելու մասին օրենքի նախագիծը։ 

«Լուսավոր Հայաստան»-ի պատգամավոր Տարոն Սիմոնյանը նշեց, որ երեք տարի առաջ Սահմանադրական դատարանը հակասահմանադրական էր ճանաչել օրենքի այն դրույթը, համաձան որի՝ եթե զինծառայողները կուտակում են իրենց ամենամյա արձակուրդները, իրավունք չունեն երկու տարուց ավել արձակուրդային վճար ստանալ․

«Սա հակասահմանադրական ճանաչված դրույթ էր, և ՍԴ-ն պարտադրել էր, որ բոլոր չօգտագործված արձակուրդների համար վճար ստանան։ Կառավարությունը երեք ամիս ժամանակ ուներ, որ հակասահմանադրական օրենքի մեջ փոփոխություն կատարեր, բայց երեք տարի է անցել, և կառավարությունը ոչինչ չի արել։ Նախագիծը 7 ամիս շրջանառության մեջ է եղել, կառավարությունից ոչ մի արձագանք չի եղել, և հիմա կառավարությունը որոշեց, որ պետք է առաջարկի նորից հետաձգել, բայց սա անհետաձգելի որոշում է»,-ասաց պատգամավորը՝ նշելով, որ նախագծի ընդունումը հետաձգելու դեպքում ծանրաբեռնելու ենք դատական համակարգը, քանի որ զինծառայողները կդիմեն դատարան և կստանան բոլոր արձակուրդայինների վճարները։

ԱԺ «Իմ քայլը» խմբակցության պատգամավոր Արմեն Խաչատրյանը նշեց, որ ԱԺ պաշտպանության և անվտանգության հանձնաժողովը բացասական եզրակացություն է տվել նախագծին և առաջարկել հետաձգել նախագծի ընդունումը, որպեսզի ավելի համապարփակ լուծումներ գտնեն․

«Այն, որ այս խնդիրը հաստատապես պետք է լուծվի, դրանում կասկած չկա, հետևաբար իրավական ակտը պետք է բխի ՍԴ-ի որոշման պահանջներից, սակայն այս նախագծով հաշվի չի առնվել՝ ինչ ծավալի գումարների մասին է խոսքը, որը պետք է փոխհատուցվի այն զինծառայողներին, որոնք տարիներ շարունակ չեն օգտվել իրենց արձակուրդից»,-նշեց Արմեն Խաչատրյանը։

Աղբյուր` Փաստինֆո