Փաստ ինֆո

Անիմաստ է տրամադրել մի պարզաբանում, որը չի լսվելու և չի ընդունվելու դատարանի կողմից, բայց չեմ ցանկանում Ձեզ հաճույք պատճառել՝ շատ արագ իմ վարքագծի վերաբերյալ կայացնել մի որոշում, որն արդեն վաղուց Ձեր մեջ կայացրել եք։ Այս մասին ՀՀ երկրորդ նախագահ Ռոբերտ Քոչարյանի և մյուսների գործով դատական նիստին ասաց Արմեն Գևորգյանի պաշտպան Էրիկ Ալեքսանյանը։

Նշենք, որ դատարանը քննարկում է Արմեն Գևորգյանի պաշտպան Էրիկ Ալեքսանյանի նկատմամբ դատական սանկցիա կիրառելու մասին հարցը՝ կապված փետրվարի 23-ին նշանակված դատական նիստին չներկայանալու հետ։

Փաստաբանը հիշեցրեց, որ դեռևս փետրվարի 16-ին դատական նիստի ընթացքում խնդրել էր դատարանին փետրվարի 23-ին դատական նիստ չնշանակել, քանի որ այդ օրը նախապես նշանակված դատական նիստ էր նշանակված Վերաքննիչ քրեական դատարանում՝ կապված իր և դատավոր Աննա Դանիբեկյանի իրավական վեճով, իսկ Վերաքննիչ դատարանում նշանակված դատական նիստի օրը փոփոխել հնարավոր չի եղել։

«Իմ խնդրանքն ինքնանպատակ չի եղել, ես ներկայացրել եմ համապատասխան ապացույցը»,-ասաց պաշտպանը, ընդգծելով, որ դատավորը հնարավորություն ուներ ընդառաջ գնալու, սակայն ընդառաջ չի գնացել, հակառակը հայտարարել է, որ բացակայությունը կհամարվի անհարգելի։

Փաստաբանը նշեց, որ կարևորում է Վերաքննիչ քրեական դատարանում ընթացող վարույթը, քանի որ Վերաքննիչ քրեական դատարանի կողմից իր օգտին որոշում կայացնելու դեպքում հետևանքը լինելու էր դատավոր Աննա Դանիբեկյանի գործողությունների վերաբերյալ քրեական գործ հարուցելը, իսկ այդ պարագայում, պաշտպանն ինքնաբացարկի միջնորդություն էր ներկայացնելու, քանի որ այդ պայմաններում վերջինս օրինական դատարան լինել չի կարող։ Ալեքսանյանը նաև ուշադրություն հրավիրեց այն հանգամանքին, թե ինչպես է ստացվել, որ փետրվարի 23-ին՝ ժամը 13։00-ին նշանակված դատական նիստը չի սկսվել ուղիղ ժամը 13։00-ին, զանգել են դատավորի աշխատակազմ՝ տեղեկանալու նիստ եղել է, թե ոչ կամ արդյոք դատավարության մասնակիցը ներկայացել է նիստին։

«Դուք այդ ինչ օպերատիվ-հետախուզական գործողություններ եք իրականացնում ինձ փնտրելու ուղղությամբ։ Փետրվարի 23-ին ժամը մեկին իմ՝ դատական նիստին չներկայանալը եղել է հարգելի։ Կրկնում եմ, դուք ունեցել եք բավարար տվյալներ դրա վերաբերյալ»,-ընդգծեց Ալեքսանյանը՝ հավելելով, որ բացի այն, որ դատարանն ինչ որ անհասկանալի գործողություններ է կատարել՝ իրեն հայտնաբերելու ուղղությամբ, այլև՝ թույլ է տվել մեղադրանքի կողմին իր վարքագծի վերաբերյալ տալ գնահատական՝ իր բացակայության պայմաններում։
Դատարանն արձանագրեց, որ պաշտպանի կողմից որևէ ողջամիտ պատճառաբանություն չի ներկայացվել։

«Դատարանն արձանագրում է, որ Էրիկ Ալեքսանյանի կողմից թույլ է տրվել իր դատավարական պարտականության չարամիտ չկատարում, ինչը դրսևորվել է սույն թվականի փետրվարի 23-ին դատական նիստին չներկայանալուն»,- նշեց դատավոր Աննա Դանիբեկյանը՝ որոշելով Էրիկ Ալեքսանյանի նկատմամբ կիրառել դատական սանկցիա՝ նկատողության տեսքով։

Հիշեցնենք՝ սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։

Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու համար, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու համար։

Հեղինակ՝ Իզաբել Սահակյան

Աղբյուր` Փաստինֆո