Փաստ ինֆո

«Բարգավաճ Հայաստանը» կմասնակցի արտահերթ խորհրդարանական ընտրություններին՝ անկախ նրանից ընտրական օրենսգիրքը փոփոխության կենթարկվի, թե ոչ,-«Փաստինֆո»-ի հետ զրույցում հայտարարել է Ազգային Ժողովի «Բարգավաճ Հայաստան» խմբակցության քարտուղար Արման Աբովյանը: 

Նկատենք, որ այսօր «Իմ քայլը» խմբակցության ղեկավար Լիլիթ Մակունցը հայտարարել է, որ իշխող խմբակցությունը հակված է փոփոխություններ կատարել ընտրական օրենսգրքում եւ ընտրությունների գնալ համամասնական ընտրակարգով։

Ա.Աբովյանի փոխանցմամբ՝ ընտրություններին մասնակցելու իրենց որոշման վրա ընտրական օրենսգրքի փոփոխությունը ազդեցություն ունենալ չի կարող, բայցեւ նկատեց, որ խմբակցութունը չի պատրաստվում մասնակցել քննարկումներին կապված ընտրական օրենսգրքում փոփոխություններ կատարելու հետ։

Հիշեցնենք՝ այսօր խորհրդարանում քննարկման առարկա էր դարձել նաեւ ռազմական դրությունը չեղարկելու հարցը, որպիսի նախաձեռնությամբ հանդես էր եկել ընդդիմադիր պատգամավորը։ Գլխադաս,ային հանձնաժողովը տվել էր բացասական եզրակացություն, սակայն ԱԺ նախագահը կոչ արեց իշխող ուժի պատգամավորներին կողմ քվեարկել՝ կարծիք հայտնելով, որ առաջիկայում հնարավոր է նման նախաձեռնությամբ հանդես գա կառավարությունը։

Ա.Աբովյանը դժվարացավ նշել, թե ինչի հետեւանք է Արարատ Միրզոյանի դիրքորոշման փոփոխությունը, սակայն փաստեց, որ ռազմական դրության ռեժիմը պետք է վաղուց չեղարկվեր։ «Արդեն ակնհայտ է, որ Հայաստանում չկա ռազմական դրության անհրաժեշտություն։ Ավելին, այդ ռեժիմը պետք է չեղարկվեր շատ վաղուց, դեռ 2020 թվականին։ Ակնհայտ է, որ ռազմական դրությունը արդեն վաղուց չի լուծում որեւէ ռազմական հարց»,- նշել է Աբովյանն ու ավելացրել, որ ռազմական դրությունը պետք էր միայն իշխանությանը՝ իրենց նպատակներին հասնելու համար։

«Ռազմական դրության պահպանումը քաղաքական, ոչ թե ռազմական որոշում էր»,- ընդգծել է Աբովյանը։

Հեղինակ՝ Անի Մշեցյան

Աղբյուր` Փաստինֆո