Փաստ ինֆո

ՀՀ ԶՈՒ ԳՇ պետ Օնիկ Գասպարյանի փաստաբանը հանցագործության մասին հաղորդում կներկայացնի։ Այս մասին «Փաստինֆո»-ի հետ զրույցում ասաց փաստաբան, Օնիկ Գասպարյանի ներկայացուցիչ Արթուր Հովհաննիսյանը։

Ինչպես ավելի տեղեկացրել ենք՝ ՀՀ ԶՈՒ ԳՇ պետ Օնիկ Գասպարյանը երեք հայցադիմում է ներկայացրել ՀՀ վարչական դատարան՝ վիճարկելով իրեն ԳՇ պետի պաշտոնից ազատելու որոշման իրավաչափությունը։ Ներկայացված հայցադիմումներից մեկի շրջանակներում ՀՀ վարչական դատարանը բավարարել է հայցի ապահովման միջոց կիրառելու մասին փաստաբանի միջնորդությունը, ինչը ենթադրում է, որ Օնիկ Գասպարյանը պետք է պաշտոնավարի մինչև սույն գործով դատարանի վերջնական որոշումը։ Նշենք, որ հայցի ապահովման միջոց կիրառելու մասին դատարանի որոշումն օրինական ուժի մեջ է մտնում հրապարակման պահից, մինչդեռ՝ այսօր Փաշինյանը հայտարարեց, որ Արտակ Դավթյանն իրավունքի ուժով նշանակվել է ՀՀ ԶՈՒ ԳՇ պետի պաշտոնում։

Փաստաբան Արթուր Հովհաննիսյանը մեզ հետ զրույցում, մեկնաբանելով Կառավարության հայտարարությունը, նշեց, որ գործադիրը թքած ունի դատական ակտի վրա, արհամարհում են երրորդ իշխանության փաստաթղթերը և երրորդ իշխանության դիրքորոշումն իրենց հետաքրքիր չէ, իրենք անում են այն, ինչ իրենք են գտնում ճիշտ և հարմար։ Փաստաբանը պատրաստվում է հանցագործության մասին հաղորդում ներկայացնել, քանի որ, ըստ նրա, ցանկացած քայլում, որն ուղղված է խոչընդոտելու պարոն Գասպարյանին՝ իր լիազորություններն իրականացնելուն, առկա է առերևույթ պաշտոնեական դիրքի չարաշահման, դատական ակտերի չկատարման հատկանիշներ։ Բացի դա՝ հաշվի առնելով կառավարության այսօրվա հայտարարությունը, ՀՀ վարչական դատարանում արդեն առկա հայցերը լրամշակվելու են, նոր ապահովման միջնորդություններ կներկայացվեն և փաստաբանը չի բացառում, որ կունենան մի դատական ակտ, որով կասվի, որ Օնիկ Գասպարյանն է ԳՇ պետը և մեկ դատական ակտ, որով կասվի, որ Արտակ Դավթյանը ԳՇ պետ չէ։

«Դրանից հետո կհասկանանք, թե մինչև երբ է գործադիրը ոտնահարելու մեր իրավական պետությունը»,- նշեց փաստաբանը։

Նա տեղեկություն չունի՝ Օնիկ Գասպարյանն այսօր գնացել է աշխատանքի, թե ոչ, սակայն իրավաբանական տեսանկյունից իր գնալ-չգնալը կարևոր չէ, կարևորը, թե ինչպես են մեկնաբանում դատական ակտը և ինչ խոչընդոտներ են իր համար ստեղծում։

«Հետևանք պետք է առաջացներ դատական ակտը, սակայն ինչպես տեսնում ենք հետևանք չի առաջացնում գործադիրի համար»,- նշեց փաստաբանը։

Անդրադառնալով ՀՀ արդարադատության նախարար Ռուստամ Բադասյանի հայտարարությանը, թե որևէ իրավական կազուս չկա, Հովհաննիսյանը նշեց. «Ամեն օր վարչապետը կարող է առաջարկել նախագահին նոր ԳՇ պետ՝ առանց հնին ազատելու, հիմա ի՞նչ, մի քանի օր հետո իրավունքի ուժով հինգ ԳՇ պետ ենք ունենալո՞ւ։

Հիմա օրինակ, Արտակ Դավթյանը դիցուկ ԳՇ պետք է, եթե առանց իրեն ազատելու վաղը նոր ԳՇ պետ առաջարկեն ու անցնի որոշակի ժամանակ, իրավունքի ուժով նոր ԳՇ պետ ունենում ենք, թե ոչ, եթե Արտակ Դավթյանն ազատված չէ պաշտոնից։ Հիմա՝ կազուս կա՞, թե ոչ։

Եթե չլիներ հայցի ապահովման միջոցի վերաբերյալ դատական ակտը, կազուս չէր լինի, բայց քանի կա դատական ակտ, որն ավելի շուտ էր ուժի մեջ մտել, քան իրենց ասած՝ իրավունքի ուժով պարոն Դավթյանի նշանակումը, նշանակում է, որ պարոն Դավթյանն այլևս չի կարող նշանակվել իրավունքի ուժով, որովհետև պաշտոնը թափուր չէ»։

Հեղինակ՝ Իզաբել Սահակյան

Աղբյուր` Փաստինֆո