Փաստ ինֆո

ՀՀ վարչապետ Նիկոլ Փաշինյանի այցն Արագածոտնի մարզ կարող է հետախուզական բնույթ կրել, որն ամեն դեպքում կարող ենք համարել նախընտրական քարոզարշավի նախնական էտապ։ «Փաստինֆո»-ի հետ զրույցում նման կարծիք արտահայտեց քաղտեխնոլոգ Վիգեն Հակոբյանը։

Վերջինս նշեց, որ քանի դեռ վարչապետի հրաժարականի և խորհրդարանի ցրման գործընթացը չի սկսվել, չենք կարող հստակ ասել, որ Հայաստանում տեղի են ունենալու արտահերթ խորհրդարանական ընտրություններ՝ հաշվի առնելով նաև այն հանգամանքը, որ իշխանությունները Հայաստանում իրավիճակային որոշումներով են շարժվում․

«Եթե այդ պահին վտանգ է զգում և այլ տարբերակ չի գտնում, նա արտահերթ ընտրությունների թեման է օրակարգ բերում։ Կարծում եմ՝ Արագածոտնի մարզ այցով վարչապետն ուզում էր մի կողմից ցույց տալ, որ ի տարբերություն Սյունիքի՝ կան տեղեր, որտեղ ինքը կարող է մտնել։ Մյուս կողմից ուզում էր շոշափել՝ ինչ տրամադրություններ կան, նման միջոցառումների ժամանակ ընդդիմությունն ինչ վարքագիծ է դրսևորում և ինչ կարող է անել։ Կարծում եմ՝ սա ավելի շատ հետախուզական բնույթ ուներ, բայց այդ հանդիպման ժամանակ մի քանի կարևոր մեսիջներ էր տալիս»,-ասաց քաղտեխնոլոգը։

Վիգեն Հակոբյանի խոսքով բոլորի համար ակնհայտ դարձավ, թե մոտավորապես ինչ օրակարգով է վարչապետը նախատեսում անցկացնել նախընտրական քարոզարշավը․ «Նորից նախկիններ, ամեն ինչում նախկիններն են մեղավոր, նույնիսկ որ իրենք ինքնաթիռ են գնել առանց սպառազինության, պարզվում է՝ էլի նախկիններն են մեղավոր։ Կար բավական վտանգավոր կոնցեպտուալ մեսիջ․ դա այն էր, որ մեր տարածաշրջանում կարող ենք նորմալ, խաղաղ ապրել, բայց ցավոք ոմանք մեզ համարում են թշնամի, մենք ոմանց ենք համարում թշնամի ու պարզ չի՝ երբվանից դա սկսվեց։ Այսինքն այստեղ կասկածի տակ է դրվում Հայոց ցեղասպանության կոնցեպտը։ Ո՞ւմ պարզ չէ, թե ինչից է գալիս այդ թշնամությունը։ Այսինքն` նախապատրաստում է արտաքին քաղաքական հերթական նոր կոնցեպցիան, նոր զիջումը, որն ուղղակիորեն արտաքին քաղաքական պատվեր է»,-նշեց Վիգեն Հակոբյանը։

Քաղտեխնոլոգը նկատեց՝ պատրաստվում է Հայոց ցեղասպանությունն օրակարգից հանելու թեման․ «Դա վտանգավոր է՝ հաշվի առնելով, որ դեմոկրատների իշխանությունն ԱՄՆ-ում և անձամբ Բայդենը վարչապետին, կարծես թե, նախապատրաստում են ցեղասպանության հարցով հատուկ հայտարարությամբ հանդես գալ։ Կարծում եմ՝ սա Նիկոլ Փաշինյանի մեսիջն էր այն ուժերին, որոնք թեկուզ իրենց երկրի շահերից ելնելով փորձելու են ցեղասպանության հարցը բարձրացնել և ԱՄՆ-ի այսօրվա ադմինիստրացիային հասկացնում են, որ Հայաստանը և Թուրքիան այլ օրակարգով են գնում»,-նշեց քաղտեխնոլոգը։

Աղբյուր` Փաստինֆո