Փաստ ինֆո

ԲՀԿ առաջնորդը  պարբերական սրացումների օրերին սիրում է հայտարարել, որ իր կուսակցությունը ընդդիմադիր ուժ է, բացառապես այդ օրերին սուր ճոճելով իշխանությունների դեմ․ ընդ որում՝  բոլոր ոլորտներում, քարը քարին չթողնելով։  

Բայց թե որքանով է ընդդիմադիր ուժ «բարգավաճը», որի ընդդիմադիր կեցվածքը կախված է մեկ մարդուց՝ Գագիկ Ծառուկյանից, դատեք ինքներդ։

Հարց՝  ու՞մ է նա  ընդդիմադիր՝ վարչապետի աթոռին կառչած Փաշինյանի՞ն, որի թավշյա հեղաշրջումը  հրապարակում սատարողներից մեկն է եղել՝ իր կուսակցությամբ, հետո էլ՝  նրան  իր պատգամավորական ողջ  կորպուսով  կողմ քվեարկելով՝  իշխանության բերողը եղավ։ Ավաղ, արդեն նույնիսկ թիվ 1 օլիգարխի համարում ունեցող՝  իր իսկ խնամի Խաչատուր Սուքիասյանին ընդդիմադիր չէ նա։

Ընդհանրապես, 2018-ի դեկտեմբերին  ձևավորված ՀՀ Ազգային Ժողովը տխուր պատկեր ունի՝  բավական չէ՝խորհրդարանական հանրապետությանը հատկանշական՝  բազմակուսակցականությունից շատ հեռու է, բավական չէ՝ խորհրդարանի մեծամասնությունը 80 տոկոսով իմքայլականներից  է կազմված,  որպիսի քանակ  չի ունեցել ոչ մի ժամանակի իշխանություն, դեռ մի բան էլ՝ անորակ է այդ մեծամասնությունը։

Բայց  իշխանության գլուխը՝ քարը, արի ու տես՝ ընդդիմությունն էլ մի բան չէ։ Թողնենք  ԼՀԿ-ին, քանզի նրա հարազատական  կապն  իշխանության հետ ակնհայտ է, ուղղակի որոշակի երանգներ են փոխվել ժամանակի թելադրանքով։

Իսկ  Ծառուկյանի  փոխատեղությունները՝ իշխանություն-ընդդիմություն դաշտում միշտ կանխատեսելի են, քանի որ այս դեպքում մենք գործ չունենք քաղաքական կերպարի հետ, ուստի զարմանալի չէ, որ   հերթական անգամ երկակի խաղեր տալուց հետո նա թեքվում է դեպի իշխանություն, մի տեսակ՝ նաև թավշյա կերպով ձերբազատելով ինքզինքը քննադատական խոսք և կեցվածք ունեցող իր պատգամավորներից։ Ըստ տարբեր  գնահատականների՝ Գևորգ Պետրոսյանին հետևողներ կլինեն։

Այսինքն, ծառուկյանական այս  անսկզբունքայնությունը քաղաքականության դիրքերից չէ, որ պիտի քննարկման արժանանա, քանի որ ԲՀԿ նախագահը երբեք էլ քաղաքական այր չի եղել։ Ավելին, ինքն իրեն ոչ մեկ անգամ է խոստացել՝ այլևս քաղաքականությունը պրոֆեսիոնալներին թողնելու մասին։ ԽԾԲ կապերը, բիզնես շահերը, ի վերջո՝ գոյություն ունեցող քրգործերը մշտապես նրան հետապնդել են՝ ստիպելով իշխանությունից՝ ընդդիմություն և ընդդիմությունից՝ իշխանություն՝ կտրուկ և ապաքաղաքական   անցումներ կատարել՝ զոհաբերելով կուսակիցներին։

Դեռ որոշ ժամանակ առաջ էր «Փաստինֆոն»  անդրադարձել «Հայրենիքի փրկության շարժման» ուժերից մեկը հանդիսացող ԲՀԿ-ի՝ իշխանության հետ խաղերի մեջ լինելուն։ Գուցե  այստեղ էական դեր է ունեցել     ավագ որդու  հարսանիքը իշխանության կողմից  չհարամելու պա՞հը։ Գաղտնիք չէ, որ  իշխանությունը պարբերաբար, երբ իրեն պետք է լինում,  մեջտեղ է հանում Ծառուկյանի ընտանիքի հետ առնչություն ունեցող քրեական գործերը։ Այդ համատեքստում են և՛ Աբովյանի «Պարտեզ» ռեստորանում տեղի ունեցածը, որի  արդյունքում մարդիկ էին զոհվել, և մարզիկի հորը ծեծելու հետ կապված քրեական պատմությունը, որով անցնում էր ԱՕԿ նախագահ Ծառուկյանի խորհրդական Էդ․Բաբայանը։ Ի վերջո,  այս գործի հետ կապված ՀՔԾ-ն ժամանակին հայտարարել էր՝ քաղաքացու հանդեպ կիրառված բռնությանը՝ ԱԺ պատգամավոր Գագիկ Ծառուկյանի հնարավոր մասնակցության վերաբերյալ տվյալների առկայության մասին։

Այնպես որ, բոլորովին պատահական չէր՝ Հայրենիքի փրկության շարժման օրակարգից հրաժարումը և Փաշինյանի վարչապետությամբ արտահերթ  ընտրությունների գնալու պատրաստակամությունը:

Երևի ժողովուրդը մի բան գիտի, որ Ծառուկյանին «կեղծ ընդդիմություն» որակումն է տալիս։

Աղբյուր` Փաստինֆո