Փաստ ինֆո

Ինտերպոլի կողմից ՀՀ նախկին գլխավոր դատախազ Գևորգ Կոստանյանի նկատմամբ հետախուզում հայտարարելու պահանջը մերժելու վերաբերյալ ԱԺ պատգամավոր Թագուհի Թովմասյանի կողմից հայտնած տեղեկությունները քննարկման առարկա կդարձվեն Վերաքննիչ քրեական դատարանում։ Այս մասին «Փաստինֆո»-ն տեղեկացավ փաստաբան Գևորգ Գևորգյանից։

Հիշեցնենք՝ նախկին գլխավոր դատախազ Գեւորգ Կոստանյանի նկատմամբ ՀՀ իշխանությունները հետախուզում են հայտարարել «Մարտի 1»-ի քրեական գործով ու նրա նկատմամբ որպես խափանման միջոց ընտրել կալանավորումը։ Նախկինում փաստաբանները Գևորգ Կոստանյանի նկատմամբ ընտրված խափանման միջոց կալանավորումը վերացնելու մասին միջնորդություն էին ներկայացրել դատարան, ինչը մերժվել էր։ Հետագայում պաշտպանները վերաքննիչ բողոք են ներկայացրել՝ պահանջելով բեկանել առաջին ատյանի դատարանի որոշումը և վերացնել Կոստանյանի նկատմամբ ընտրված խափանման միջոց կալանավորումը, որով դեռ որոշում չի կայացվել։ Փաստաբանի փոխանցմամբ՝ նշված վերաքննիչ բողոքի շրջանակներում վերաքննիդ դատարանում քննարկման առարկա են դարձնելու նաեւ ԱԺ պատգամավոր Թագուհի Թովմասյանի հրապարակած տեղեկությունները։

Ավելի վաղ հայտնել ենք, որ Թագուհի Թովմասյանը հրապարակել է աղմկահարույց փաստաթղթեր առ այն, որ Ինտերպոլի գլխավոր քարտուղարությունը մերժել է Գևորգ Կոստանյանի նկատմամբ հետախուզում հայտարարելու ՀՀ իրավապահների պահանջը՝ գտնելով, որ քաղաքական հետապնդում է իրականացվում և, դիմել Ինտերպոլի միջազգային ստորաբաժանումներին՝ հորդորելով իրենց տվյալների բազայից հեռացնել Կոստանյանի վերաբերյալ տվյալները։

Փաստաբան Գևորգ Գևորգյանը «Փաստինֆո»-ի հետ զրույցում հայտնեց, որ Թագուհի Թովմասյանի կողմից լրատվամիջոցներին հայտնած տեղեկությունը պաշտպանական կողմին ավելի վաղ հայտնի չեն եղել:

Փաստաբանն ընդգծեց, որ մինչ այդ Ռուսաստանի Դաշնությունը ևս մերժել է ՀՀ իրավասու մարմնի պահանջը Գևորգ Կոստանյանի նկատմամբ հետախուզում հայտարարելու վերաբերյալ՝ հաշվի առնելով, որ հայտարարված հետախուզումն ի սկզբանե եղել է ակնհայտ ապօրինի:

Պաշտպանական կողմի դիտարկմամբ՝ Թագուհի Թովմասյանի հայտարարությունից ակնհայտ է դառնում, որ համաշխարհային մակարդակով, այլ ոչ թե Եվրոպական կամ Ասիական միջազգային կազմակերպությունների մակարդակով, Քրեական ոստիկանության միջազգային կազմակերպությունը Գևորգ Կոստանյանի նկատմամբ միջազգային հետախուզումը գնահատել է Ինտերպոլի կանոնադրության 3-րդ հոդվածի պահանջներին հակասող՝ որպես քաղաքական ու ապօրինի։

«Գևորգ Կոստանյանի նկատմամբ հարուցված քրեական հետապնդումը թե´ Ռուսաստանի Դաշնության իրավասու մարմինների, թե´ Ինտերպոլի կենտրոնական մարմնի կողմից գնահատվել են որպես անօրինական, ինչը կրկին վերահաստատում է մեր այն եզրահանգումը, որ Գևորգ Կոստանյանի նկատմամբ հարուցված քրեական հետապնդումը որևէ փաստական կամ իրավական հիմք չունի, այդ կապակցությամբ որևէ ապացույց չկա և չի էլ կարող լինել»,- հայտնեց նա՝ հավելելով, որ Թագուհի Թովմասյանի հայտարարության մասին տեղեկանալուց անմիջապես հետո փաստարկները ներկայացրել են Վերաքննիչ քրեական դատարան՝ Գևորգ Կոստանյանի նկատմամբ կիրառված խափանման միջոց կալանավորումը վերացնելու պահանջը քննարկելիս դրանք որպես նոր հանգամանքներ հաշվի առնելու նպատակով:

Փաստաբանը հայտնեց, որ Վերաքննիչ քրեական դատարանում՝ դատավոր Լուսինե Աբգարյանի նախագահությամբ, արդեն մեկ դատական նիստ կայացել է, որի ընթացքում ներկայացվել է բողոքը՝ հիմնավորումներով։ Հաջորդ դատական նիստը նշանակվել է ապրիլի 1-ին՝ ժամը 10։30-ին։

Հիշեցնենք, որ Գևորգ Կոստանյանին «Մարտի 1»-ի գործով որպես մեղադրյալ ներգրավելու մասին ՀՔԾ-ն հայտարարել է նոյեմբերի 25-ին, սակայն միայն 10 օր անց՝ դեկտեմբերի 5-ին, հայտարարվեց նրան մեղսագրվող հոդվածները։ Ըստ այդմ՝ նա մեղադրվում է ՀՀ քրեական օրենսգրքի 5 հոդվածով՝ 314-րդ հոդվածի 1-ին մասով, 38-308-րդ հոդվածի 2-րդ մասով, 38-314-րդ հոդվածի 1-ին մասով, 38-334-րդ հոդվածի 1-ին մասով և 38-349-րդ հոդվածի 3-րդ մասի 1-ին կետով, այսինքն՝ պաշտոնեական կեղծիք կատարելու, ծանր հետևանք առաջացնող պաշտոնեական լիազորությունների չարաշահման օժանդակման, պաշտոնեական կեղծիքի օժանդակման, ծանր կամ առանձնապես ծանր հանցագործության պարտակելը օժանդակելու և ծանր կամ առանձնապես ծանր հանցագործությունների վերաբերյալ գործերով ապացույցների կեղծմանը օժանդակելու համար ։

Գ.Կոստանյանի նկատմամբ հետախուզում հայտարարվելու մասին ՀՔԾ-ն հայտնեց 2019թ. նոյեմբերի 28-ին և քննիչը նրա նկատմամբ կալանավորումը որպես խափանման միջոց ընտրելու մասին միջնորդություն ներկայացրեց դատարան, ինչը բավարարվել է 2019թ. դեկտեմբերի 4-ին։ ՌԴ իրավապահները մերժել են Գևորգ Կոստանյանի նկատմամբ հետախուզում հայտարարելու վերաբերյալ ՀՀ իշխանությունների պահանջը, իսկ 2021թ մարտի 16-ին հայտնի դարձավ, որ Կոստանյանի նկատմամբ հետախուզումը մերժել է նաև Ինտերպոլը։

Հեղինակ՝ Իզաբել Սահակյան

Աղբյուր` Փաստինֆո