Փաստ ինֆո

Սյունեցիներն արդեն ցույց են տվել իրենց վերաբերմունքը գործող իշխանությունների վերաբերյալ։ Այս մասին «Վերածնվող Հայաստան» կուսակցության վարչության մամուլի ասուլիսի ժամանակ ասաց Գորիսի քաղաքապետ Առուշ Առուշանյանը։

Անդրադառնալով ԱԺ «Իմ քայլ»-ի պատգամավոր Արմեն Խաչատրյանի այն հայտարարություններին, որ Սյունիքի ինքնապաշտպանական խմբերը գործել են թիկունքում և, որ Սյունիքն այս պահին անվտանգ է, Առուշ Առուշանյանը նշեց, որ ինքը հոկտեմբերի 1-ից համաքաղաքացիների հետ եղել է առաջնագծում և մասնակցել մարտական բոլոր գործողություններին․

«Ես գիտեմ, որ ձեր նշած մարդու համար ամբողջ ընթացքում խրամատ եղել է Գորիսի համայնքապետարանը։ Եթե նա նկատի ուներ, որ այդ հատվածում պատերազմ չի տեսել, այդ դրվագով ճիշտ է։ Մինչև դեկտեմբերի 14-15-ը ես եղել եմ առաջնագծում, ուղղակի կանոնավոր չենք այնտեղ գտնվել, ինչպես պատերազմի ընթացքում»,-նշեց Գորիսի քաղաքապետը։

Քաջարանի քաղաքապետ Մանվել Փարամազյանն էլ հավելեց․  «Արմեն Խաչատրյանը համայնքապետարանում ընդամենը սուրճ էր խմում, ի՞նչ պետք է իմանար, թե առաջնագծում ինչ է տեղի ունեցել։ Մենք ենք մեր ջոկատներով առաջնագծում եղել։ Վարչապետը հոկտեմբերի 17-ին կոչ արեց Սյունիքի համայնքապետերին անցնել ինքնապաշտպանության և այն ժամանակ հասկացանք՝ ինչ է կատարվում։ Ինչպես էր հնարավոր՝ մարտերը Ջաբրայիլում ընթանային, իսկ վարչապետը Սյունիքի ինքնապաշտպանության կոչ աներ։ Մենք Սյունիքի սահմանից մոտավորապես 40 կմ անվտանգության զոնան պահել էինք, ընդ որում դա հեշտ չի եղել, մենք կռվով ենք այդ ամեն ինչը վերցրել։ Դրանից հետո եկավ նախարարը և ժամանակ տվեց, որ պետք է լքենք մեր խրամատները, այն ինչ ունենք, այն ինչ արյան գնով վերցրել ու պահում էինք, ստիպեցին, որ լքենք։ Գիտե՞ք ինչի լքեցինք, որովհետև ասացին՝ ոչ մի բանով չեն կարող օգնել մեզ, ոչ մի ռազմամթերք, ոչ մի փամփուշտ»։ 

Աղբյուր` Փաստինֆո