Փաստ ինֆո

Փաստաբան Մուշեղ Շուշանյանին մեղադրանք է առաջադրվել՝ ֆեյսբուքյան իր էջում Նիկոլ Փաշինյանի նկատմամբ բռնություն գործադրելու կոչեր կատարելու համար։ 

Մեղադրանք առաջադրելու համար նախաքննական մարմնին հիմք է ծառայել 2020թ դեկտեմբերի 13-ին իր ֆեյսբուքյան էջում արված գրառումը, որով վերջինս գրել էր. «Կիլոլին դատելը միգուցե ցանկալի կլիներ՝ դավաճանության լիարժեք պատկերը ստանալու առումով, բայց նրան դատելն անիրատեսական է:Կիլկոլի մահավճիռը կայացված է, մահապատիժը պետք է ի կատար ածվի: Ու նա նույնիսկ արժանի չէ թալեաթի պես արժանապատիվ շանսատակ արվելուն՝ նրա ուն նրա պիղծ ընտանիքի պատիժը լինելու է անգութ, դաժան և արդար»։

Բացի դա, նախաքննական մարմինը բռնության կոչ է տեսել նաեւ 2020 թվականի դեկտեմբերի 14-ի գրառման մեջ. «Սա ավելի վտանգավոր թշնամի ու թուրք է, քան ամենաիսկական թուրքը: Նա վտանգավոր է քան էնվերը, թալեաթը, աթաթուրքը:Սա թուրքերի կողմից ներդրված «ական» է՝ հայոց ցեղասպանությունն ավարտին հասցնելու և հայության վերջին ծվենների ոչնչացման զենք: Ուստի աս ու սրա պիղծ ընտանիքը ենթակա են ոչնչացման: Սատկացրեք սրան, Հայեր»՝ նշված կոչի ներքևի հատվածում տեղադրելով Նիկոլ Փաշինյանի նկարը:

«Փաստինֆո»-ի հաղորդմամբ՝ փաստի առթիվ հարուցվել է քրեական գործ, որի շրջանակներում փաստաբանին մեղադրանք է առաջադրվել ՀՀ քրեական օրենսգրքի 226.2-րդ հոդվածի 1-ին մասով։ Նշենք, որ ՀՀ ՔՕ 226.2-րդ հոդվածը վերաբերում է բռնություն գործադրելու հրապարակային կոչերին՝ պայմանավորված խտրականությամբ, այդ թվում՝ քաղաքական կամ այլ հայացքների նկատմամբ, ազգային պատկանելիությամբ և այլն։

Շուշանյանի նկատմամբ որպես խափանման միջոց է ընտրվել ստորագրությունը՝ չհեռանալու մասին։

Քրեական գործով նախաքննությունն ավարտվել է և գործն ուղարկվել է դատարան, որը մակագրվել է Երևանի ընդհանուր իրավասության դատարանի դատավոր Վաչե Մարգարյանին։

Աղբյուր` Փաստինֆո