Փաստ ինֆո

Պատերազմը դադարեցրել ենք այն ժամանակ, երբ շարունակելն այլեւս իմաստ չուներ,- Ուջանում հայտարարել է ՀՀ վարչապետ Նիկոլ Փաշինյանը։

Հիշեցնենք, որ Ն. Փաշինյանը հայտարարել է արտահերթ ընտրությունների մասին ու, թեեւ քարոզարշավը դեռ չի սկսվել, եւ ընտրությունների օրը պաշտոնապես չի հաստատվել, բայց նա այսօր արդեն մեկնել է Արագածոտն մարզ ու հանդիպումներ ունեցել տարբեր համայնքներում։

Մարզում կանգառներից մեկը եղել է Ուջանում, որտեղ Նիկոլ Փաշինյանը խոսել է պատերազմի, կրած պարտության մասին ու հայտարարել. «Մենք կանգնել, և մեր ժողովրդի ձգտումները պաշտպանել ենք մինչև վերջին վայրկյանը և պատերազմը դադարեցրել ենք այն ժամանակ, երբ շարունակելն այլևս իմաստ չուներ: Եվ խնդիր էր դրված մեր 25-30.000 զինվորների կյանքը փրկել, շրջափակման վտանգից ազատել»,- ասել է նա:

Փաշինյանը պնդել է, թե Արցախն այսօր թեկուզ վիրավոր, բայց կանգուն է, բնականոն կյանքը վերականգնվում է մեր նահատակների, մեր բանակի շնորհիվ:

«Շատ ծանր օրեր ենք ապրել և ապրում ենք: Տեղի ունեցածից պետք է կարողանանք հետևություններ անել»,- հայտարարել է Նիկոլ Փաշինյանը ու կարեւորել այն, որ չնայած պարտությունից հետո Հայաստանում ստեղծված աննախադեպ ներքաղաքական լարվածությանը, հաջողվել է խուսափել քաղաքացիական բախումներից։

«Դժվար է գտնվել երկրներ, որ նման կատակլիզներով անցել են ու քաղաքացիական բախումներ չեն եղել»,- ասել է նա։

Փաշինյանը անդրադառնալով երկրում տիրող իրավիճակին և քաղաքական գործընթացներին, ասաց, որ ինքը դեկտեմբերից արտահերթ ընտրություններ է առաջարկել, սակայն ընդդիմադիր ուժերը չեն համաձայնել:

«Դեկտեմբերից ասում եմ եկեք անենք արտահերթ ընտրություններ: Ասում են չէ, որովհետև իրենք չեն ուզում, որ ժողովուրդը որոշի: Բայց մենք ասել ենք մի բան. մենք ժողովրդից ստացած իշխանությունը կարող ենք հանձնել միայն ժողովրդին: Բայց մեր պրոբլեմը դատարաններն են:

Դատավորները 20 տարի Հայաստանում ինքնուրույն որոշում կայացնելու հնարավորություն չեն ունեցել: Մենք տվեցինք նրանց այդ հնարավորությունը, բայց նրանց մի մասը այդ հնարավորությունն օգտագործեցին, վազեցին հին տերերի մոտ, նրանց կամքը կատարելու: Եվ դրա համար պետք է պատժվեն: Բայց այսօր մեր ձեռքերը թուլացած են, պատերազմը մեծ հարված հասցրեց մեզ: Ես պարտությունն իմ վրա եմ վերցնում, որ դուք ձեզ պարտված չզգաք, պարտությունն իմն է: Ես մինչև վերջին վայրկյանը կկանգնեմ հանուն ձեր հաղթանակի: Պարտությունն ինձ, հաղթանակը՝ ձեզ»,-ասաց Փաշինյանը:

Աղբյուր` Փաստինֆո