Փաստ ինֆո

«Մինչև հունիսի 20-ը որևէ կերպ չեն խոչընդոտելու խորհրդարանի լուծարման գործընթացին»։ Այս մասին լրագրողների հետ զրույցում հայտարարեց «Լուսավոր Հայաստան» խմբակցության ղեկավար Էդմոն Մարուքյանը:

Էդմոն Մարուքյանը՝ պատասխանելով արտահերթ ընտրությունների գնալու մասին հարցին, նշեց, որ ընտրական օրենսգրքի նախագծի վրա շուրջ մեկ տարի աշխատանքներ են ընթացել, որոնց  ամենակառուցողական ձևով մասնակցել է «Լուսավոր Հայաստան»-ը։ 

«Այս պահին մենք ունենք իրողություն՝ խորհրդարանական ուժերի կոնսենսուսի արդյունքում կա հայտարարված խորհրդարանական արտահերթ ընտրությունների օր, և այդ օրը հայտարարելու պահից սկսած՝ մեկնարկել է ըստ էության սպասվող ընտրությունների աշխատանքը»,- հայտարարել է ՀՀ ԱԺ «Լուսավոր Հայաստան» խմբակցության ղեկավարը։

Ըստ Մարուքյանի,  եթե փորձ արվի նոր օրենսգիրքը ընդունել, ապա այդ գործընթացը կտևի 20 օրից մինչև մեկ ամիս։

«Ոնց որ, ասենք, շախմատ խաղալուց լինենք և մեկը գնդակով մտնի այդտեղ։ Խաղի կանոները կփոխվի։ Հետևաբար այս փուլում մենք հնարավոր չենք համարում գալ կոնսենսուսի այդ հարցում, իսկ առանց կոնսենսուսի ընդունել Ընտրական օրենսգիրք, հնարավորություն չեմ տեսնում»։

Մարուքյանը նշեց, որ իրենց անհանգստացնում է այն, որ խաղի ընթացքում խաղի կանոնները փոխելը հետ կգցի պրոցեսները, մարզային ներկայացվածությունը կվազի ապագա խորհրդարանում և բազմաթիվ այլ խնդիրներ ևս կլինեն։

«Հիմա կան գործող խաղի կանոններ և դրանով պետք է պատրաստվենք ընտրությունների։ Ամենալավ օրենսգրքով կարելի է կազմակերպել ամենախայտառակ ընտրությունները և հակառակը»,-վստահեցնում է Մարուքյանը։

Խմբակցության ղեկավարի կարծիքով՝ եթե ընտրակաշառք բաժանվի, իշխանությունները պետք է ամեն ինչ անեն նրանց ձերբակալելու, կալանավորելու, դատապարտելու համար:

«Պետք է իշխանությունն ամեն ինչ անի, որ ադմինիստրատիվ ռեսուրս ինքը չկիրառի: Բազմաթիվ պարտավորություններ ունի իշխանությունը: Ընդդիմությունն էլ այդ ամբողջ գործընթացը հսկելու, հասարակությանը տեղեկացնելու լիազորություններ ունի»,- ասաց նա, նաև անդրադառնալով մյուս ուժերի՝ արտահերթ ընտրություններին պատրաստվելու հարցին։

«Հիմա խմբեր կան, որ զինաթափվել են, խմբեր կան, որ կարծում եմ՝ դեռ պետք է զինաթափվեն, տեղեկություններ կա, որ խմբեր կան զինվում են։ Եթե չանենք ընտրություններ՝ ո՞րնէ այլընտրանքը»։

Լրագրողների հետ զրույցում Մարուքյանը հույս հայտնեց, որ արտահերթ ընտրությունների օրը հայտարարելուց հետո գնալով կթուլանա քաղաքական լարվածությունը:

«Վաղ թե ուշ՝ հիմնական դերակատար ուժերը կմասնակցեն ընտրություններին, այդ թվում նաև նրանք, ովքեր բացառում էին այս իշխանությունների օրոք մասնակցել կազմակերպված ընտրություններին: Տեսնում ենք, որ նրանք քայլ առ քայլ ասում են, որ կմասնակցեն: Քաղաքականություն է»,- ասաց Մարուքյանը:

Նրա խոսքով՝ ընտրությունների միջոցով իշխանություն փոխելու հնարավորություն է ստեղծվել, ինչո՞ւ պետք է ընդդիմադիր ուժը չմասնակցի»,- ասաց Մարուքյանը:

«Լուսավոր Հայաստանի» ղեկավարը նշեց, որ արդար ընտրություններ անցկացնելու հարցում ունեն մտահոգություններ, բայց դրանք հիփոթետիկ են: «Մենք էլ պետք է հսկենք, որ արդար անցկացվեն»,- ասաց նա:

Աղբյուր` Փաստինֆո