Փաստ ինֆո

Նիկոլ Փաշինյանի հայտարարությունը հունիսի 20-ին արտահերթ ընտրությունների վերաբերյալ դեռեւս փաստ չէ։ Ունենք բավարար բոլոր հիմքերը՝ կասկածելու, որ հունիսի 20-ին տեղի են ունենալու արտահերթ ընտրություններ, քիչ առաջ նման հայտարարությամբ է հանդես եկել ՀՓՇ համակարգող Իշխան Սաղաթելյանը՝ նշելով, որ ՀՓՇ-ն պնդում է իր ճանապարհային քարտեզը եւ անհնազանդության ակցիաները շարունակվելու են։

Ըստ նրա՝ նախ պետք է Նիկոլ Փաշինյանը հրաժարական տա, չընտրվի նոր վարչապետ երկու անգամ, խորհրդարանը լուծարվի եւ տեղի ունենան ընտրություններ։ «Ֆեյսբուքյան ստատուսն արտահերթ ընտրությունների մասին հավատ չի ներշնչում»,- հայտարարել է ՀՓՇ համակարգող, ՀՅԴ ԳՄ ներկայացուցիչ Իշխան Սաղաթելյանը եւ ավելացրել. «Այս ժամանակահատվածում մի քանի անգամ խոսել են արտահերթ ընտրության մասին, շատ արագ հրաժարվել են, պատերազմի ընթացում 44 օր ստով և կեղծիքով կերակրել են մեզ։ Մենք ունենք բավարար բոլոր  հիմքերը կասկածելու, որ հունիսի 20-ին տեղի են ունենալու ընտրություններ»,- նշեց Սաղաթելյանը։

Նրա խոսքով՝ խորհրդարանական ընտրությունների կազմակերպումը եղել է «Հայրենիքի փրկության շարժման» պահանջներից մեկը, եթե նույնիսկ տեղի ունենա խորհրդարանական ընտրություններ, դա բավարարում է ՀՓՇ-ի պահանջների ընդամենը մի մասը։

«Գտնում ենք, որ արտահերթ խորհրդարանական ընտրություններն անհրաժեշտ և կարևոր պայման են երկրում ստեղծված վիճակից դուրս գալու համար»,- նշեց Սաղաթելյանը՝ ընդգծելով, որ Նիկոլ Փաշինյանի կազմակերպմամբ արտահերթ խորհրդարանական ընտրությունների դեպքում  կա մեծ վտանգ, որ դա չի լինելու մրցակցային, հավասար պայմաններով, մեծժ հնարավորություն, որ այդ ընտրությունները կեղծվելու են։

Ավելին՝ Սաղաթելյանն ընդգծեց, որ այդ ընտրությունները կարող են լինել ոչ  թե ստեղծված իրավիճակից դուրս գալու ելք, այլ՝ նոր ճգնաժամի ստեղծում։ Նա հայտնեց, որ բողոքի անհնազանդության ակցիաները շարունակվելու են։

Աղբյուր` Փաստինֆո