Փաստ ինֆո

Հանգուցալուծումը մոտ է, պետք է արժանապատվորեն գնանք այդ ընտրություններին և մեր ժողովուրդը լուրջ հնարավորություն ունի ձևավորելու նոր իշխանություն և կառուցելու այն Հայաստանը, որը մենք միշտ երազել ենք։ Այս մասին լրագրողների հետ զրույցում ասաց ՀՀ ԱԺ «Բարգավաճ Հայաստան» խմբակցության պատգամավոր Միքայել Մելքումյանը։ 

Ինչ վերաբերում է շրջանառվող լուրերին, որ Նիկոլ Փաշինյանի և Գագիկ Ծառուկյանի հանդիպումն իրենց համար անակնկալ է եղել, Մելքումյանը նշեց, որ իրենք տեղյակ եղել են և խորհրդակցությունների ձևաչափով միշտ են շփվում։

Դիտարկմանը, որ ԲՀԿ-ն շարժման շրջանակներում պայքարում էր և նպատակը Փաշինյանի հրաժարականին հասնելն էր, հետևաբար այդ դեպքում ինչու հետ կանգնեց ԲՀԿ-ն, Մելքումյանն արձագանքեց՝ նշելով, որ ԲՀԿ-ն որևէ բանից ետ չի կանգնել, նպատակը եղել է հրաժարականը, որը լինելու է։

«Երբ ասում ենք հունիսի 20-ին ընտրություններ, դա նշանակում է, որ առանց հրաժարականի չի լինելու»,-նշեց նա՝ հավելելով, որ շատ հանգամանքներ են դեր խաղացել և ինքը չի ասում, թե «17»-ի շարժման գործունեությունը դեր չի խաղացել։

Նա հայտնեց, որ փողոցային պայքարի լինելու դեպքում ԲՀԿ-ն ևս կմասնակցի։ Նրա խոսքով՝ մենք ապրում ենք մի երկրում, որ կարող են զարգանալ այնպիսի գործընթացներ, որի մասին այսօր չգիտենք և որևէ մեկը 17-ի ձևաչափը չի լուծարել։

«Եթե ժամանակավոր դադարեցում կամ կասեցում լինի, 17-ն ինքը հանդես կգա։ Այսօր ունենք այն, ինչ ունենք, նոր բան չի հայտարարվել։ Հայտարարվել է միայն այն, որ լինելու են արտահերթ ընտրություններ, իսկ մենք ընկալում ենք, որ արտահերթ ընտրությունները կարող է լինել միայն վարչապետի հրաժարականի դեպքում»,-նշեց Մելքումյանը։

Աղբյուր` Փաստինֆո