Փաստ ինֆո

Արտահերթ խորհրդարանական ընտրությունների վերաբերյալ ՀՀԿ-ն իր դիրքորոշումը կհայտնի, երբ դե յուրե կհայտարարվի ընտրությունների օրը։ Այս մասին «Փաստինֆո»-ի հետ զրույցում ասաց ՀՀԿ-ի խոսնակ Էդուարդ Շարմազանովը՝ նշելով, որ այս պահին հստակ կարող է միայն ասել, որ ՀՀԿ-ն քաղաքական գործընթացներում դիտորդ չի լինելու:

Հիշեցնենք, որ Նիկոլ Փաշինյանը այսօր «Բարգավաճ Հայաստան» խմբակցության ղեկավար Գագիկ Ծառուկյանի հետ հանդիպումից հետո հայտարարեց, որ հունիսի 20-ին Հայաստանում արտահերթ խորհրդարանական ընտրություններ կանցկացվեն:

«Հաշվի առնելով նաեւ՝ Հայաստանի Հանրապետության նախագահի հետ, «Իմ քայլը» խմբակցության հետ, «Լուսավոր Հայաստան» խմբակցության ղեկավար Էդմոն Մարուքյանի հետ իմ ունեցած քննարկումները՝ սույն թվականի հունիսի 20-ին Հայաստանի Հանրապետությունում կանցկացվեն արտահերթ խորհրդարանական ընտրություններ,-գրել էր Նիկոլ Փաշինյանը:

Էդ. Շարմազանովը «Փաստինֆո»-ի հետ զրույցում արձանագրեց, որ ընտրությունների վերաբերյալ դեռևս շատ անորոշություններ կան։

«Ընտրությունների օրը հայտարարել է վարչապետի աթոռին նստած անձը, բայց դեռ դե յուրե ընտրությունների օր հայտարարված չէ: ԿԸՀ-ն ընտրություն չի հայտարարել, Փաշինյանը հրաժարական չի տվել, դեռ չգիտենք՝ի՞նչ օրենսգրքով պետք է լինեն ընտրությունները, Փաշինյա՞նն է լինելու վարչապետի պաշտոնակատար, թե՞ այլ մարդ»,-ասաց Շարմազանովը և ավելացրեց. «Մի ֆեյսբուքյան գրառում է կատարել ու վերջ: Որպեսզի հունիսի 20-ին ընտրություններ են լինեն, ինքը պետք է ապրիլի 20-ից հետո նոր հրաժարական տա, բա մարտի 18-ից ապրիլի 25-ը ի՞նչ է անելու: Մեկ ամսվա ընթացքում կարող է GPS-ով տարածք է հանձնում, թուրքին նոր հող է տալիս, նոր ճանապարհ»:

Էդուարդ Շարմազանովը վստահեցրեց, որ ՀՀԿ-ն չի լքելու պայքարի խրամատը, շարունակելու է ավելի ակտիվ գործել և ձայնն ավելի լսելի է դառնալու.

«Հանրապետականը եղել ու լինելու է այս իշխանությունից ազատվելու համար պայքարի առաջամարտիկը: ՀՀԿ-ն քաղաքական գործընթացներում դիտորդ չի լինելու, մնացածը կուսակցությունը կքննարկի և իր դիրքորոշումը կասի: Կլինի կուսակցության ԳՄ նիստ խորհրդի նիստ, կքննարկենք մեր դիրքորոշումը կասենք»,-ասաց Շարմազանովը:

Աղբյուր` Փաստինֆո