Փաստ ինֆո

Վարչապետի աշխատակազմի հաղորդագրությունն անհեթեթ փորձ է՝ իրավագիտության մեջ նոր բազմապատկման աղյուսակ մոգոնելու հարցում։ Այս մասին «Փաստինֆո»-ի հետ զրույցում ասաց ԵՊՀ սահմանադրական իրավունքի ամբիոնի վարիչ, իրավաբանական գիտությունների թեկնածու, «Երրորդ ուժ» քաղաքացիական նախաձեռնության անդամ Վարդան Այվազյանը։

Հիշեցնենք, որ ՀՀ վարչական դատարանը վարույթ է ընդունել Օնիկ Գասպարյանի ներկայացրած հայցադիմումն ընդդեմ ՀՀ նախագահ Արմեն Սարգսյանի, ՀՀ վարչապետ Նիկոլ Փաշինյանի՝ ԶՈՒ գլխավոր շտաբի պետ Օնիկ Գասպարյանին պաշտոնից ազատելու վերաբերյալ վարչապետի՝ Հանրապետության նախագահին արված առաջարկության հիման վրա Հանրապետության նախագահի կողմից վարչական ակտ ընդունված չլինելու պայմաններում իրավունքի ուժով ԶՈՒ գլխավոր շտաբի պետին պաշտոնից ազատելու իրավահարաբերության բացակայությունը ճանաչելու պահանջի մասին: Բացի այդ բավարարել հայցի ապահովման միջնորդությունը եւ մինչեւ դատական ակտի ուժի մեջ մտնելը` ճանաչել նրան պաշտոնից ազատելու իրավահարաբերության բացակայությունը: Այսօր վարչապետի աշխատակազմը հայտարարությամբ հանդես եկավ՝ նշելով, որ ՀՀ Սահմանադրության 139-րդ հոդվածի 2-րդ մասի համաձայն համապատասխան ակտը, տվյալ դեպքում՝ ՀՀ նախագահի հրամանագիրն ուժի մեջ է իրավունքի ուժով: Ըստ վարչապետի աշխատակազմի՝ սահմանադիրը նշված սահմանադրական նորմի ուժով ուժի մեջ մտած ակտի շրջադարձի հնարավորություն չի նախատեսել։

Սահմանադրական իրավունքի մասնագետ Վարդան Այվազյանը «Փաստինֆո»-ի հետ զրույցում ասաց, որ վարչապետի աշխատակազմի հաղորդագրությունն անհեթեթություն է և Սահմանադրության մեջ նման կարգավորում չկա։

«Վարչական դատարան դիմելու հիմքը հանդիսանում է հենց իրավունքի ուժի մեջ մտնելը, ակտի ուժի մեջ մտնելը։ Տվյալ դեպքում՝ վարչապետի վարչական ակտն ուժի մեջ է մտել և ուժի մեջ մտնելու հիմքով է նա ազատվել պաշտոնից, որ բողոքարկել է իր աշխատանքային իրավունքի պաշտպանությունը»,- ասաց նա՝ հավելելով, որ յուրաքանչյուր ոք ունի իրավունք՝ իր խախտված իրավունքները դատական կարգով պաշտպանելու։

Այվազյանը նկատեց՝ վարչական ակտն իրավունքի ուժով կմտնի ուժի մեջ, թե օրենքով սահմանված այլ ընթացակարգով՝ որևէ նշանակություն չունի և որևէ կերպ չի փոխում ակտի իրավական կշիռը։

«Պատկերացրեք, երբ ՍԴ-ն որոշի հակասահմանադրական ճանաչել օրենքի դրույթը և այդ հիմքով ամբողջ իրենց գործընթացները շրջվելու են՝ անկախ նրանից՝ իրավունքի ուժով է, թե ոչ»,- նշեց սահմանադրագետը՝ ընդգծելով, որ իրավաբանության մեջ շրջադարձության նման հիմք, հասկացություն գոյություն չունի, դա չգիտես ով է մոգոնել, լավ կլինի, որ վարչապետի աշխատակազմը նորմալ իրավաբաններով համալրվի, որ իրենց վրա ծիծաղել չտան։

«Խեղաթյուրել են և Սահմանադրությունը ենթարկել կամային, սուբյեկտիվ մեկնաբանության։ Սահմանադրության մեջ նման դրույթ չէր էլ կարող լինել։ Կա քաղաքացի, որի աշխատանքային իրավունքը ոտնահարվել է՝ վարչապետի ոչ իրավաչափ ակտով։ Վարչապետի ակտն իրավական ուժի մեջ է մտել և ուժի մեջ մտած ակտը բողոքարկվել է դատարան՝ դրա օրինականությունը վիճարկելու հիմքով։ Դատարանն էլ որպես հայցի ապահովման միջոց կասեցրել է վարչապետի ակտի գործողությունը՝ մինչև վերջնական վճռի ընդունումը։ Դա և՛ Սահմանադրությամբ, և՛ ընթացիկ օրենսդրությամբ նախատեսված իրավական գործընթաց է»,- նշեց նա։

Հարցին՝ արդյո՞ք նման հայտարարությունը չի նշանակում, որ վերջիններս չեն պատրաստվում կատարել դատարանի որոշումը, Այվազյանը պատասխանեց, որ եթե նման նպատակ են հետապնդում, ապա դա գործադիր իշխանության կողմից ևս մեկ փորձ է՝ ուզուրպացնել իշխանությունը և ոտնահարել Սահմանադրության այն դրույթը, որն ամրագրում է իշխանությունների տարանջատման և հավասարակշռման սկզբունքը, որով դատական իշխանությունը՝ օրենսդիրի և գործադիրի հետ իրավահավասար իշխանության թև է և երբեք չի կարող լինել գործադիրի կցորդը։

«Գործադիրը որևէ իրավունք չունի չկատարելու՝ դատական իշխանության կողմից ընդունված ակտերը։ Նույն հաջողությամբ՝ վարչապետի աշխատակազմը կարող է տարածել հայտարարություն, որ այսուհետև՝ արևը պետք է դուրս գա արևմուտքից և գետերը պետք է հոսեն իրենց հունին հակառակ։ Դա չի նշանակում, որ եթե նման հայտարարություն է արել, այդ երևույթները լինելու են՝ ըստ այդ հայտարարության»,- նշեց նա։

Ինչ վերաբերում է շրջանառվող լուրերին առ այն, որ վարչապետի աշխատակազմի տարածած հայտարարության վրա աշխատել են փաստաբան Տիգրան Եգորյանը և ՍԴ դատավոր Վահե Գրիգորյանը՝ մեր զրուցակիցը չբացառեց՝ նշելով, որ նկատի ունենալով նրանց իրավագիտական որակական հատկանիշները և գիտելիքները, հավանական է համարում, որ իրենք են գրել դա։

«Իրենց ոճին շատ նման է այդ անհեթեթությունը»,- նշեց սահմանադրագետը։

Հեղինակ՝ Իզաբել Սահակյան

Աղբյուր` Փաստինֆո