Փաստ ինֆո

Ես չեմ համարում, որ «Լուսավոր Հայաստանը» կողմ է արտահերթ ընտրություններին: Ես համարում եմ, որ ԼՀԿ-ն գտնում է՝ պետք չէ արտահերթ ընտրություններ անել, և գտնելու է բազմաթիվ պատճառներ որպեսզի խուսափի արտահերթ ընտրություններից՝ ուղղակի օգտագործելով այս ժամանակահատվածը՝ իր դիրքը կարևորելու համար: Այս մասին լրագրողների հետ ճեպազրույցում ասաց ԱԺ փոխնախագահ Ալեն Սիմոնյանը:

«Լավ եմ ճանաչում գործելաոճը, մշտապես ներկայացվում է մի տարբերակ, հետո փորձում են պայմանների ու պատճառների բերումով այդ պայմանավորվածությունից, հայտարարությունից կամ իրավիճակից խուսանավել: Սա հայտնի գործելաոճ է»,-ասաց Սիմոնյանը:

Վերջինս վստահ է, որ ընդդիմադիր կուսակցությունների մեծ մասը չի ուզում արտահերթ ընտրությունններ, քանի որ գիտակցում է, որ չեն հաջողելու ընտրութոյւններում:

ԱԺ փոխնախագահը հորդորեց ԼՀԿ ղեկավար Էդմոն Մարուքյանին հարցում պատվիրել և պարզել, որ դեպքում ԼՀԿ-ն կհաղթահարի 1%-ի շեմը.

«Եթե պարոն Մարուքյանն ասում է, որ իշխանությունը չի ուզում արտահերթ ընտրություններ, ապա կարող է իր համար ցանկալի դեսպանատան, ցանկալի կազմակերպության հարցմանն անդրադառնալ, կամ ինքը հարցում պատվիրել և տեսնել, թե որ դեպքում են իրենք հատում 1%-ի շեմը»,-ասաց Սիմոնյանը:

Հարցին՝ ինչու իշխանությունը չի ուզում համաձայնության գալ ընդդիմության հետ և ընտրությունները կազմակերպել մինչեւ հունիսի 1-ը, Ալեն Սիմոնյանն պատասխանեց.

«Ընտրության իմաստը քաղաքական դաշտում կայունություն բերելն է, իսկ դրա ամենակարևոր բաղադրիչ մասերից մեկն այն է, որ այսօր ԱԺ-ում ներկայացված քաղաքական ուժերը նույնպես այդ պրոցեսին մասնակից լինեն: Իշխանությունը արտահերթ ընտրությունների գնում է ներքաղաքական իրավիճակը լիցքաթափելու համար: Դա անել միանձնյա, քաղաքական առումով ճիշտ չէ»,-ասաց Ալեն Սիմոնյանը:

ԱԺ փոխնախագահը նաև հայտարարեց, որ ընտրությունների անցկացման Ժամկետների մասով որեւէ հստակեցում չկա.

«Ժամկետների վերաբերյալ քննարկում է տեղի ունենում իմ կողմից նշված ուժերի հետ, ուզում ենք, որ նաեւ իրենց համապատասխան լինեն ժամկետները»,-ասաց Ալեն Սիմոնյանը և հավելեց, որ կան նաև ընտրական օրենսգրքի հետ կապված հարցեր, որոնք պետք է լուծվեն:

«Մենք ասել ենք, որ ռեյտինգային ընտրակարգը պետք է փոխվի: Պետք է հասկանանք՝ ո՞րն է այսօր ավելի կարևոր: Ընտրությունները մի քիչ հետաձգենք, որ օրենսգիրքը փոխենք, թե՞ շուտ անենք ընտրություններ, բայց հին օրենսգրքով»,-ասաց ԱԺ փոխնախագահը:

Աղբյուր` Փաստինֆո