Փաստ ինֆո

Իրավիճակն այնպիսին է, որ հանցավոր խումբն ամբողջ ծավալով պետք է բացահայտվի և պետք է բացահայտվեն բոլոր այն գործերը, որոնց նկատմամբ Փաշինյան Նիկոլը դատավարական ղեկավարում է իրականացրել և պատվերներ տվել, ովքեր են պատվերներ կատարել։ Այդ խումբը պետք է կանգնի դատարանի առաջ։ «Փաստինֆո»-ի հետ զրույցում ասաց փաստաբան Ամրամ Մակինյանը՝ անդրադառնալով Փաշինյանի օգնականի կողմից Ռուբեն Հայրապետյանի գործով ապօրինի միջամտության փաստի առթիվ ԱԱԾ-ում նախապատրաստվող նյութերին։

Հիշեցնենք, որ աղմկահարույց տեսանյութը, որով ապացուցվում է, որ Աննա Վարդապետյանի հետ համաձայնեցվել են մեղադրանքի որշումները, ավելին՝ նա իրեն իրավունք է վերապահել խմբագրել ու ցուցումներ տալ քննիչին, թե ինչ մեղադրանք առաջադրի Հայրապետյաններին, տարածվել է մարտի 10-ին։ Մարտի 11-ին դատախազությունը հայտարարեց, որ մամուլի հրապարակումներն ուղարկվել են ԱԱԾ՝ նյութեր նախապատրաստելու, մինչդեռ՝ ՀՀ քրեական դատավարության օրենսգրքի 190-րդ հոդվածի համաձայն՝ պաշտոնատար անձանց, իրավապահ մարմինների աշխատակիցների կողմից առերեւույթ կատարված հանցագործության դեպքերով նախաքննության կատարումը վերապահված է հատուկ քննչական ծառայությանը եւ ոչ թե ԱԱԾ-ին։ Նկատենք, որ մասնագիտական համայնքում առկա են մտավախություններ առ այն, որ ԱԱԾ-ում քրեական գործը ցանկանում են հարուցել ոչ թե Վարդապետյանի կողմից առերևույթ արդարադատությանը խոչընդոտելու, պաշտոնեական լիազորություններն անցնելու հատկանիշներով, այլ՝ ինֆորմացիայի արտահոսքի վերաբերյալ, ինչի մասին վկայում է նաև այն հանգամանքը, որ գործն ուղարկվել է ոչ թե ՀՔԾ, այլ՝ ԱԱԾ։

Ավելին՝ ՔԿ-ն եւս ծառայողական քննություն չի նշանակել, վարչապետի օգնականից հանձնարարություններ ստացած քննիչի լիազորությունները չեն կասեցվել, փոխարենը՝ վերջինս զեկուցագիր է ներկայացրել այն մասին, որ իր անձնական էլեկտրոնային փոստին ապօրինի հասանելիություն են ստացել և ներբեռնել տեղեկություններ։

ՀՖՖ նախկին նախագահ Ռուբեն Հայրապետյանի գործով Նիկոլ Փաշինյանի՝ իրավական գծով օգնական Աննա Վարդապետյանի կողմից հնարավոր ապօրինի միջամտության փաստերի առթիվ քրեական գործ դեռ չի հարուցվել։ «Փաստինֆո»-ն այսօր ևս դիմեց ԱԱԾ՝ պարզելու, թե ինչ փուլում է գտնվում վարույթը, արդյոք կա քրեական գործ հարուցելու կամ մերժելու մասին որոշում, որտեղից մեզ հայտնեցին, որ դեռ նյութեր են նախապատրաստվում։

Հայրապետյանների փաստաբան Ամրամ Մակինյանը «Փաստինֆո»-ի հետ զրույցում ասաց, որ վերջիններս հասկանում են, որ վիճակն անելանելի է և նյութերի նախապատրաստման տասնօրյա ժամկետի հնարավորություններից օգտվելով՝ փորձում են մեկ-երկու օր ավել երկարացնել այս բանդայի բացահայտման ամսաթիվը, բայց այդ ընթացքում նաև հնարավորություն են տալիս, որ հանձնաժողովի անդամներն ապացույցները փորձեն վերացնել, ինչը չի ստացվելու։

Փաստաբանը տեղյակ չէ, թե արդյոք նախապատրաստվող նյութերի շրջանակներում Աննա Վարդապետյանը հրավիրվել է ԱԱԾ՝ բացատրություն տալու։ Ինչ վերաբերում է այն հանգամանքին, որ ՔԿ-ում նշանակված չէ ծառայողական քննություն և քննիչի լիազորությունները ժամանակավորապես կասեցված չեն, Մակինյանը նշեց, որ չի ցանկանում մեկնաբանել անձանց ապօրինի անգործությունը։ Բացի դա՝ փաստաբանը պարզաբանումներ է ակնկալում նաև ՔԿ նախագահից, որովհետև այդ հարցով հանցավոր կլանի խնդիրն ամբողջ ծավալով բացահայտվել է։

«Ցանկացած երկրում, որը քիչ թե շատ իրավունքի հետ կապ ունի, պետք է հետևեին անհապաղ հրաժարականները, քրեական գործ հարուցվեր և տվյալ մարդկանց գործողություններին շատ արագ իրավական գնահատականներ տրվեին»,- ասաց Մակինյանը՝ հավելելով, որ հիմնավորվել է, որ այդ մարդիկ գործում են օրենքից դուրս, իսկ օրենքն օգտագործում են որպես իրենց գործողությունների ապահովման միջոց. «Որևէ մեկը թող մեր հետ այլևս նմանատիպ գործերով օրենքի օրինականության մասին փորձ չանի խոսել, մտածել կամ մտքի ծայրով անց կացնել»։

«Փաստինֆո»-ն ավելի վաղ տեղեկացրել է, որ Աննա Վարդապետյանը մի քանի անգամ այցելել է նաեւ ԲԴԽ շենք ու հանդիպել Ջհանգիրյանի հետ, հետաքրքրվել կոնկրետ գործերով։ Փաստաբանը տեղեկացրեց, որ դիմել է նաև ԲԴԽ՝ Աննա Վարդապետյանի կողմից ԲԴԽ վարչական շենք այցելությունների նպատակների մասին պարզաբանումներ ստանալու պահանջով։

«Այո, ԲԴԽ աշխատակազմը պետք է պատասխանի այդ հարցերին, թե Փաշինյան Նիկոլի օգնական Աննա Վարդապետյանն ինչ գործերի առնչությամբ է ընդհանրապես գնում ԲԴԽ, ում հետ է հանդիպում, ինչ հարցեր է քննարկում, քննիչներն ինչ գործ ունեն ԲԴԽ-ում, ում հետ են հանդիպում և ինչ ցուցումներ են ստանում»,- նշեց փաստաբանը՝ հավելելով, որ բարձրացված հարցերն առնվազն պատասխանների կարիք ունեն, իսկ եթե պատասխաններն օրվա իշխանությունները՝ հանցավոր մարդկանց խումբը, չտան, ապա փաստաբանը կշարունակի օրենքով չարգելված բոլոր միջոցներով պաշտպանել իր վստահորդների շահերը և այդ ընթացքում կբացահայտվեն նաև այլ անձանց նկատմամբ ապօրինի ներգործության դեպքերը։

«Ավարտված է Փաշինյան Նիկոլական դատաիրավական արդարադատությունը։ Հիմա արդեն եկել է պատասխանատվության կանչելու ժամանակը՝ այն մարդկանց, որոնք հորջորջում էին օրինականությունից, օրենքից»,-նշեց Մակինյանը։

Հեղինակ՝ Իզաբել Սահակյան

Աղբյուր` Փաստինֆո