Փաստ ինֆո

Անթույլատրելի է կրճատել ռազմական բյուջեն։ Հետպատերազմյան փուլը ենթադրում է ոչ միայն ռազմական բյուջեի կամ ծախսերի պահպանում, այլև դրանց էական ավելացում։ «Փաստինֆո»-ի հետ զրույցի ժամանակ այս մասին ասաց «Հենակետ» վերլուծական կենտրոնի ղեկավար Տիգրան Աբրահամյանը՝ անդրադառնալով շրջանառվող այն լուրերին, որ իշխանությունները քննարկում են ռազմական բյուջեն կրճատելու հարցը։

Տիգրան Աբրահամյանը նկատեց՝ իշխանությունն առ այս պահը չի հերքել այդ փաստը, ավելին ՊՆ փոխնախարար Արման Սարգսյանի պատասխաններն այդ հարցի հետ կապված էլ ավելի խորացրեցին ամեն ինչ․ «Նա խուսափողական պատասխան տվեց և հարցադրումներն ուղղորդեց դեպի Ֆինանսների նախարարություն։ Իհարկե, բյուջեում փոփոխությունների հիմնական իրականացնողներից է նաև Ֆինանսների նախարարությունը, բայց բնական է, որ ցանկացած գերատեսչություն ունի իր առաջնահերթությունները և ոլորտային հնարավոր կրճատումներն իրականացվում են ըստ առաջնահերթությունների։ Եթե ՊՆ-ին չի անհանգստացնում Ֆինանսների նախարարության այդ մոտեցումը, դա շատ ավելի վատ է»,-ասաց Տիգրան Աբրահամյանը։

Ոչ միայն ռազմական գործողությունների վերսկսման հավանականության վտանգն է, որ ստիպում է բյուջեն նվազագույնը պահել այնպիսին, ինչպես կար, այլև ստեղծված նոր իրողությունները․ «Ադրբեջանի հետ նոր սահմանագիծ ունենք և մեծածավալ ենթակառուցվածքների աշխատանքներ կան՝ սկսած մարտական դիրքերի կահավորումից մինչև ճանապարհներ, մշտական տեղակայման վայրեր։ Ցանկացած հաշվարկի պարագայում հետպատերազմյան փուլը ենթադրում է ոչ միայն ռազմական բյուջեի կամ ծախսերի պահպանում, այլ դրանց էական ավելացում։ Չկա որևէ տրամաբանական գործընթաց, ինչը մեզ կարող է հուշել, թե ինչու է այս կամ այն ծախսն իրականացվում կամ ինչու է այս պարագայում կրճատվում բյուջեն»,-ասաց Տիգրան Աբրահամյանը՝ նշելով, որ այնուամենայնիվ վերջնական դիրքորոշում արտահայտելու համար կսպասի թեմայի վերաբերյալ պաշտոնական հայտարարությանը։

Հարցին՝ եթե պաշտոնապես հաստատվի ռազմական բյուջեի կրճատումը, ի՞նչ հետևանքներ կունենա դա բանակի վրա, Տիգրան Աբրահամյանը նկատեց՝ դա պետության անվտանգային համակարգի ոչնչացման մասին կխոսի․ «Բանակում իրականացվող ծախսերը միայն զինված ուժերին չեն վերաբերում կամ ընթացիկ աշխատանքների իրականացմանը։ Մեր ամբողջ անվտանգային համակարգը հիմնված է զինված ուժերի վրա և նման ծանր իրավիճակում անկախ նրանից, թե պետությունն ինչ վիճակում է, անթույլատրելի եմ համարում այդ ոլորտում ծախսերի կրճատումը»,-նշեց Տիգրան Աբրահամյանը։

Աղբյուր` Փաստինֆո