Փաստ ինֆո

Չի կարելի, որ Հայաստանը գնա այդպիսի կեղտոտ գործարքի։ Գերիների վերադարձը Ադրբեջանի պարտականությունն է, այլ ոչ թե՝ ինչ-ինչ քաղաքական առևտրի առարկա։ Այս մասին «Փաստինֆո»-ի հետ զրույցում ասաց ՀՀ առաջին ՄԻՊ Լարիսա Ալավերդյանը՝ անդրադառնալով գերիների փոխանակման գործընթացին։

Ալավերդյանի դիտարկմամբ՝ գերիներին պահելը և չվերադարձնելը հանցագործություն է, միջազգային հումանիտար իրավունքի լուրջ խախտում, Ադրբեջանի կեցվածքը և գործողությունները միջազգային իրավունքի դեմ լուրջ հանցագործություններ են եւ նման պետությունները պետք է դատապարտվեն, մինչև անգամ՝ սանկցիաներ կիրառվեն։

Ավելի վաղ «Փաստինֆո»-ն տեղեկացրել է, որ իշխանական շրջանակները անհետ կորած զինվորների հարազատներին վստահեցրել են, թե առաջիկայում հնարավոր է 30 գերի վերադառնա՝ ակնարկելով, որ կան բարդություններ. թշնամին տարածքներ է պահանջում։ Նշենք, որ ըստ շրջանառվող լուրերի՝ թշնամու հերթական թիրախը Արցախի Կարմիր Շուկան է, որի դիմաց Ադրբեջանը հայկական կողմին կփոխանցի մի քանի գերի։

Այս հանգամանքին անդրադառնալով՝ Ալավերդյանը նշեց, որ դա դատապարտելի է և չի կարելի, որ Հայաստանը գնա այդպիսի կեղտոտ գործարքին։ Նա ընդգծեց, որ շատ լավ է հասկանում ծնողների վիճակը, բայց իրենք էլ իրենց չեն ներելու, եթե կուլ գնան այդպիսի հանցագործ պայմանավորվածություններով իրենց որդիների վերադարձին, ամբողջ կյանքում իրենց խիղճը տանջելու է։

«Բացի դա՝ պարզ չէ, թե դա ինչքան կարող է տևել և արդյոք Ադրբեջանն իսկապես վերադարձնում է, թե տալիս է այն մարդկանց, որոնց մարմնի վրա դաժան վերաբերմունքի հետքերը չեզոքացվել են, չեն երևում»,- ասաց Ալավերդյանը՝ նշելով, որ հիմնավոր կասկածներ ունի առ այն, որ եթե ոչ ֆիզիկական, ապա հոգեբանական ճնշում և մարդկային արժանապատվությունը նսեմացնող բոլոր ձևերը կիրառվում են։

Ըստ նրա՝ Հայաստանը պետք է տասնապատկի իր բոլոր ջանքերը, որ այդ բոլոր հարցերը լուծվեն միջազգայնորեն ընդունված նորմերին համապատասխան, որ հնարավորինս շատ պետություններ և միջպետական կազմակերպություններ միանան մեր պահանջին, հասնենք նրան, որ Ադրբեջանի կողմից այդ կեցվածքն արժանանա պատժամիջոցների, ինչպես եղել է այլ դեպքերում։

Կարմիր շուկան, որը համառորեն պահանջում է Ադրբեջանը՝ 30 գերու դիմաց, ունի ռազմավարական նշանակություն։ Մեր զրուցակցի փոխանցմամբ՝ Կարմիր Շուկայում տները ճանապարհից 5-10 մետր հեռավորության վրա են եւ փորձ է արվում Մարտունի շրջանն ամբողջովին կտրել Ասկերանի շրջանից, Ստեփանակերտից։

«Ոչ միայն դատապարտելի է Ադրբեջանի լկտի պահվածքը, այլև Հայաստանի կողմից այդ անհասկանալի կրավորական դիրքորոշումը»,- նշեց Ալավերդյանը։

Ինչ վերաբերում է իշխանությունների կողմից անհայտ կորած կամ գերեվարված զինծառայողների ծնողներին համոզելու փորձերին, ակցիաներ չիրականացնելու կամ խնդիրը չբարձրաձայնելու վերաբերյալ հորդորներին, նա ընդգծեց, որ օրվա իշխանության քայլերը և քաղաքականությունը գիտակցաբար համաձայնեցված են Թուրքիայի և Ադրբեջանի ռազմավարական և մարտավարական նպատակներին։

Ալավերդյանը գտնում է, որ պատերազմը խայտառակ ձևով պարտվելուց և թշնամուն նույնիսկ եռակողմ պիղծ հայտարարությամբ նախատեսված տարածքներից ավել տարածքներ հանձնելուց հետո իշխանությունները չունեն որևէ հեղինակություն և այդ քաղաքականությունը շարունակում են օգտագործել մանիպուլյատիվ ձևով՝ օգտագործելով ամենացավոտ կողմը, այն է՝ անհայտ կորածների կամ գերիների ծնողների զգացմունքները, ինչն անբարոյականություն է և թող չասեն, որ բարոյականությունը և օրենսդրությունը կամ իրավունքը կապ չունեն։

«Դրանով Հայաստանը խախտում է թե մարդու իրավունքները, թե միջազգային հարաբերությունների վերաբերյալ ընդունված հայեցակարգը, թե դրանով վնաս է հասցնում ոչ միայն առանձին մարդկանց, այլև՝ հարված է Հայաստանի Հանրապետության պետական անվտանգությանը»,- ասաց Ալավերդյանը՝ հավելելով, որ տարիներ շարունակ պնդել են, որ չկա Արցախի Հանրապետության և Հայաստանի Հանրապետության անվտանգություն, դա միասնական անվտանգություն է։

«Պահանջում եմ օրվա իշխանություններից՝ վերաբերել այս ամենին այնպես, որ գերակա չլինեն իրենց նեղ խմբակային շահերը, որովհետև այդ կեցվածքը հեռահար առումով չի համապատասխանում նաև այդ նեղ իշխանական խմբի շահերին»,- ընդգծեց Ալավերդյանը՝ հավելելով, որ համոզմունք ունի, որ օրվա իշխանությունները համոզմունք ունեն առ այն, որ Արցախն ամբողջովին պետք է բռնակցվի Ադրբեջանին, ինչը դատապարտելի է։

Հեղինակ՝ Իզաբել Սահակյան

Աղբյուր` Փաստինֆո