Փաստ ինֆո

Հասարակությունն առանց այդ էլ բավական հոգնած է փոխադարձ մեղադրանքներից և նման արտահայտություններից՝ դավաճան, ոչ դավաճան, ապաստան, անվտանգության խնդիր և այլն: Ամեն մեկը պետք է կենտրոնանա և մտածի իր քաղաքական վարկանիշի մասին: Այս մասին այսօր լրագրողների հետ զրույցում ասաց Արդարադատության նախարար Ռուստամ Բադասյանը՝ անդրադառնալով՝ ՀՀ առաջին նախագահ Լևոն-Տեր Պետրոսյանի առաջարկին, որ ստեղծված իրավիճակից միակ ելքը Նիկոլ Փաշինյանի հրաժարականն է և անվտանգության երաշխիքների ապահովմամբ ապաստանումը արտերկրում:

Նախարարի խոսքով՝ նման քննարկումները լուրջ չեն և պետք է սկսել բովանդակային քննարկումներ.

«Նման անբովանդակ առաջարկները ամենևին էլ չեն նպաստելու քաղաքական վարկանիշի բարձրացմանը: Դրանք քաղաքական բնույթի հայտարարություններ են և դրանց բովանդակային քննարկումը բացառված է, լուրջ չի: Պետք է խոսել գաղափարների, առաջարկների մասին, բովանդակային քննարկում սկսել, որովհետեւ հասարակությունը հոգնել է նման տեսակի մեղադրանքներից»,-ասաց նա:

Հարցին, թե ինչու է վարչապետը մեծ թիկնազորի ուղեկցությամբ շրջում, նախարարն արձագանքեց, որ վարչապետն ունի անվտանգություն, ԱԱԾ-ն պետք է ապահովի նրա անվտանգությունը և այդտեղ սենսացիա փնտրել պետք չէ.

«Պետությունն ի զորու է անվտանգությունը պաշտպանելու: Դա չի նշանակում, որ վտանգներ չեն եղել: Վտանգներ եղել են, բոլորդ ականատես եք եղել նոյեմբերի 9-ի և 10-ի զանգվածային անկարգությունների, որն ակնհայտորեն ունեցել է կազմակերպված, ուղղորդված բնույթ, և նպատակ է հետանդել անգամ սպանությունների գնով որոշակի հարցեր կարգավորել, որը լիարժեքորեն մերժվել է հանրության կողմից»:

Նախարարը վստահեցնում է, որ վարչական ռեսուրսի հնարավոր կիրառումը արտահերթ ընտրութունների ժամանակ զավեշտի ժանրից է.

«Առնվազն 2018 թվականից հետո Հայաստանում ընտրությունների կեղծման փորձ չի եղել։ Իշխող ուժը ունի մեծ վարկանիշ»,- եզրափակեց նախարարը:

Աղբյուր` Փաստինֆո