Փաստ ինֆո

Կապանի դիրքերից հրապարակված տեսանյութի կապակցությամբ հենակետի պատասխանատու, կամավորական Արտակ Հարությունյանը երեկ հրավիրվել էր Էջմիածնի Ռազմական ոստիկանություն՝ բացատրություն տալու։ Իրավապաշտպան, փաստաբան Ռուբեն Մելիքյանը «Փաստինֆո»-ի հետ զրույցում ասաց, որ Արտակ Հարությունյանը բանավոր շատ մանրամասն պարզաբանում է ներկայացրել՝ հենակետում առկա խնդիրների վերաբերյալ, սակայն, օգտվելով սահմանադրական իրավունքից, այս փուլում գրավոր բացատրություն չի տվել՝ հաշվի առնելով նախ այն հանգամանքը, որ ընդունելի չէր գիշերվա կեսին մարդուն այդքան արագ ՌՈ հրավիրելը։

«Ես լավ չեմ պատկերացնում, թե ինչպես է այդ տեսանյութը համացանցում հայտնվել, բայց այդ տեսանյութի՝ համացանցում հայտնվելու արդյունքում մի շարք խնդիրներ տեղում կարգավորվել են։ Ըստ էության, սա դրական արդյունք տված տեսանյութ է եղել։ Մենք ունենք տեղեկատվության իրավունք և խնդիրները պետք է լուծվեն» ,- նշեց Մելիքյանը։

Հիշեցնենք, որ երեկ համացանցում տեսանյութ է տարածվել՝ Կապան քաղաքի հարակից հատվածում տեղակայված ՀՀ ԶՈւ մարտական հենակետում տիրող վիճակի մասին, որտեղ զինծառայողներից մեկը պատմել է, թե իրենց ասել են լքել դիրքը, քանի որ Կապանը տվել են։ Գորիսի կայազորի զինվորական դատախազ Հայկ Մարգարյանի հանձնարարությամբ հրապարակված այդ տեսանյութի առթիվ ՀՀ ՊՆ Կապանի ռազմական ոստիկանության բաժնում քրեադատավարական կարգով նախապատրաստվում են նյութեր՝ ծառայության պայմանների, կազմակերպման հանգամանքների ստուգման, դրանցում առերևույթ հանցավոր մոտեցման առկայությունը պարզելու և ըստ այդմ՝ ընթացքը լուծելու նպատակով: Նախապատրաստվող նյութերի շրջանակներում երեկ ուշ երեկոյան Էջմիածին քաղաքի ՌՈ է հրավիրվել հենակետի պատասխանատու, կամավորական Արտակ Հարությունյանը՝ բացատրություն տալու։

Մելիքյանի խոսքով՝ իրենց չեն ներկայացրել, թե ՀՀ քրեական օրենսգրքի որ հոդվածի շրջանակներում է իրականացվում նյութերի նախապատրաստությունը։

«Մեզ տեղեկացրեցին, որ նյութերի նախապատրաստությունն իրականացնող բուն ստորաբաժանումը Սյունիքի ստորաբաժանումն է, սակայն հանձնարարություն է տրված՝ կոնկրետ անձից բացատրություն ստանալու հետ կապված, որովհետև նա տվյալ պահին գտնվում էր Էջմիածնում։

Արդյունքում մենք այդպես էլ չիմացանք, թե ՀՀ քրեական օրենսգրքի որ հոդվածով է իրականացվում նյութերի նախապատրաստություն, ենթադրյալ որ արարքներն են , որ այստեղ կարող են խնդրահարույց լինել»,- նշեց նա՝ ընդգծելով, որ, եթե խոսքը վերաբերում է պետական, ռազմական գաղտնիքին, ապա դա որևէ քննադատության չի դիմանում այն պարզ պատճառով, որ այդ դիրքը գտնվում է թշնամու անմիջական դիտարկման ներքո՝ մի քանի կետից, գրեթե՝ շրջափակման մեջ գտնվող դիրք է, հետևաբար, այն ամենն ինչի մասին խոսվում էր այդտեղ, ուղղակի գաղտնիք չէր կարող լինել թշնամու համար։

«Եթե թշնամու համար չէր կարող գաղտնիք լինել, ապա որն է այն պետական գաղտնիք կամ ռազմական գաղտնիք համարելու նպատակը»,- ասաց իրավապաշտպանը՝ ավելացնելով, որ տեսանյութի հրապարակման փաստում չի տեսնում որևէ հանցակազմ, ավելին՝ տեսնում է մի բան, որը դրական արդյունք է տվել՝ խնդիրների լուծման տեսանկյունից։

Իրավապաշտպանի դիտարկմամբ՝ պետական գաղտնիքի գաղափարը լուրջ վերանայման կարիք կա, այսօր պետությունը, ՊՆ-ն պետական գաղտնիք է համարում մեր գերիների, զոհվածների, անհայտ կորածների թիվը, մինչդեռ՝ շատ դեպքերում թշնամուն հասու են այդ տեղեկությունների մի մասը, օրինակ՝ գերիների թիվը։

«Պետական գաղտնիքն առհասարակ նրա համար է, որ այդ տեղեկատվության հասու լինելը թշնամուն՝ կարող է պաշտպանունակությանը վնաս հասցնել։ Որն է այստեղ տրամաբանությունը։ Նույնն էլ այս դեպքին է վերաբերում՝ հենակետն ամբողջությամբ գտնվում է թշնամու դիտարկման ներքո»,-նշեց Մելիքյանը՝ ընդգծելով, որ պետք է լրջորեն վերանայել մեր պետական գաղտնիքի համար պատասխանատվության չափանիշները, որ այն լինի որոշակի և տրամաբանված, օրինակ՝ պատասխանատվություն սահմանվի ինչ-որ փաստեր բացարձակապես անհիմն պետական գաղտնիք հայտարարելը կամ ձևական մոտեցումը պետական գաղտնիքին։

Նշենք, որ մամուլում նաև տեսանյութ է հրապարակվել զինվորական համազգեստով ևս մեկ տղամարդու մասնակցությամբ, որը ներկայանում է որպես գեներալ և հերքում է ավելի վաղ Հարությունյանի կողմից հենակետում ստեղծված իրավիճակի վերաբերյալ հայտարարությունները։ Հատկանշական է, որ գեներալ ներկայացող անձի վերաբերյալ համացանցում լուսանկարներ կան, որտեղ վերջինս «Իմ քայլը» պաստառի ֆոնին է, տղամարդը հայտնի է որպես հայտնի ՔՊ-ական։

Ռուբեն Մելիքյանը նշեց, որ ստի չափաբաժիններ կան, որոնք անգամ զավեշտի աստիճանի են, մասնավորապես, տեսանյութում կան կոնկրետ խնդիրներ, որոնք բանավոր կերպով հերքում են, ինչը, մեղմ ասած, հավատ չի ներշնչում։

«Ամենազավեշտալի հատվածը, երբ մարդիկ ցրտի մասին են խոսում, գոլորշին դուրս է գալիս բերաններից, բայց իրենք ասում են, որ ցրտի խնդիր չունեն։ Դա արդեն բավարար էր հասկանալու համար, որ դա բեմադրություն էր՝ տիպիկ իմքայլական »,- ասաց նա՝ հավելելով, որ որպես գեներալ ներկայացող անձի թատերական բեմականացումը պետք է մտածելու տեղիք տար իսկապես ուսադիրներ կրող գեներալներին։

Հեղինակ՝ Իզաբել Սահակյան

Աղբյուր` Փաստինֆո