Փաստ ինֆո

Ֆեյսբուքյան ուղիղ եթերի ժամանակ հետախույզ-դիպուկահար Անդրանիկ Պողոսյանը կրկին անդրադարձել է բանակում տիրող իրավիճակին։ Ամիսներ առաջ Պողոսյանը հայտնել էր, որ դիրքերում տեղադրված վրաններում զինվորներն ապրում են անմխիթար պայմաններում։ Այժմ կրկին անդրադատնալով թեմային  հավաստիացնում է, որ խնդիրը այդպես էլ չի լուծվել:

«Տեսանյութեր ունեմ, թե ինչպես է քամին քշում-տանում վրանը՝ զինվորներին ծեփելով գետնին: Այդ տեսանյութերը ես չեմ հրապարակում, որ աշխարհում Հայաստանի դեմքը չխայտառակվի: Սակայն եթե էդ խնդիրը լուծում չստացավ, ես դրանք կհրապարակեմ: Ու ոչ մեկը թող ինձ չասի՝ թշնամին տեսնում, խնդում է: Թշնամուն խնդալու թեմա վարչապետը կոչվածն էնքան է տվել, որ ես ինչ էլ անեմ, չի երևա: Թշնամին մի հատ Նիկոլի դեմքին նայում, արդեն խնդալուց մեռնում են, այդքան խնդալու թեմա կա»։

Պողոսյանը նաև անդրադարձավ այլ խնդիրների։ Տեղեկացրեց, որ մի դիրքից մյուսը 10 կմ է, սահմանը հսկողներին իրենք են սար բարձրանալով սնունդ հասցնում, որովհետև ճանապարհ չկա։

«Բա որ մի հատ հարձակում լիներ այդ պոստի վրա, ի՞նչ հույսով էին այդտեղ կռվելու։ Թե ամեն ինչ լռելու վրա է։ Մարդկանց հեռախոսները հավաքեք, ինչա չնկարեն, դուք էլ խաբեք, ասեք գիտեք՝ մեր բանակում կլուբնիկ են ուտում։ Չասեմ ինչ են ուտում»։

Պողոսյանը հայտնեց, որ հերթափոխ իրականացնողների թիվն էլ քիչ է, այնինչ, նրա խոսքով՝ Բաղրամյան-Դեմիրճյան փողոցներում սովորական քաղաքացիների դիմաց 10 հազար ոստիկան է կանգնած։

«Մեր մոտ սմենափոխ են գալիս 5 հոգի, որից մեկը կին է։ Մեր բանակի վիճակը այդ տիպի է, որ գալիս է կին է փոխում։ Հինգ հոգին ինչ պիտի պահի։ Որ հարձակում լինի՝ մի շաբաթ հետո եք իմանալու, մինչև հաջորդ սնունդ բերելու օրը»։

Պողոսյանը մտավախություն ունի, որ թշմանին կարող է կրկին հարձակվել, իսկ սահմանը հսկողներն ապահովված չեն, իսկ զինվորների բջջայինները հավաքում են, որ չկարողանան նկարել և ֆիքսել անմխիթար վիճակը։

«Կապանի պոստերը նկարել են, զենք չեք տվել։ Պատերազմի ժամանակ ռացիա չեք բերել պոստերի մի ծայրից մյուսը,  գոռալով էինք հրաման տալիս։ Հիմա ռացիայի էղածը 6000 դրամ է։ Դա է ձեր պահած բանակը այ տուշոնկեք։ Պալատկեքի հարցը լուծեք ինչով կուզեք,  դեմը պատերազմ ունենք, իսկ էդ պալատկաները մեր զորքն է՝ սկուտեղի վրա, որ պիտի տանեք տաք թշնամուն։

Ամեն պոստը մի ռակետի պատմություն է, լուծեք էդ հարցը, մինչև պատերազմ սկսվելը։ Այնպիսի կադրեր եմ հրապարակելու, որ չեք հասցնելու Հայաստանից փախչեք»։

Պողոսյանը բարձրաձայնեց նաև այլ կարևոր խնդիրների մասին, որոնց ականատեսն են եղել պատերազմի հետևանքով վիրավորված զինվորները։ Նա նաշեց, որ մարտական ընկերներից մեկը պատերազմի ընթացքում վիրավորվել է ու քանի որ հիվանդանոցներում տեղ ու դադար չի եղել, պայմանավորվել է շտապ բժշկական օգնություն ստանալուց հետո տեղը զիջել ավելի ծանր վիճակում գտնվող զինվորներին։

«Ասկոլկեքն իր ջանի մեջ մարդը գնում է իր տուն, պառկում, լավանում, ներկայանում ծառայության։ Իմանում ենք, որ պատերազմի հետևանքով վիրավորում ստացած զինծառայողներին դրամական աջակցություն ինքը չի ստանալու։ Նախարարությունից երկու անգամ մերժում են, որովհետև ինքը ստացիոնար բուժում չի ստացել։ Այդ մարդը անձնազոհության է գնացել, տուն գնացել, որ ոտք ու ձեռք չունեցողը տեղ ունենա։ Ի վիճակի չէ իր կարգավիճակով ուրիշ աշխատանքի անցնել ու նրան կարգ չեն տալիս, ոչ էլ ֆինանսական կարգավիճակից են կարողանում օգտվել»,- մանրամասնում է Պողոսյանը։

Աղբյուր` Փաստինֆո