Փաստ ինֆո

ՄԻՊ-ի ֆինանսավորումը կրճատելու իշխանությունների մշակած օրինագիծը կյանքի չի կոչվելու, - «Փաստինֆո»-ի հետ զրույցում նման կարծիք է հայտնել Արցախի նախկին ՄԻՊ, իրավապաշտպան Ռուբեն Մելիքյանը:

«Կարծում եմ, որ դրույթը կյանքի չի կոչվելու. Ինչ- որ փուլում այն կամ չի ընդունվելու, կամ ընդունվելու դեպքում հակասահմանադրական է համարվելու։ Իշխող քաղաքական ուժի ցանկությունը կյանքի չի կոչվելու», - նշել է նա:

Ինչպես արդեն տեղեկացրել ենք` կառավարությունը նախաձեռնել է վերացնել ՄԻՊ-ի գործունեության ֆինանսական երաշխիքը, որը հնարավորություն է տալիս կրճատել ՄԻՊ-ի տարեկան բյուջեն։ Մելիքյանը վստահ է՝ որքան էլ փորձեն, միեւնույն քաղաքական իշխանությանը է չի հաջողվելու քանդել Մարդու իրավունքների պաշտպանի հաստատությունը։

«Տեսնում եմ որոշ պատգամավորներ, որոնք թեկուզ այդ դավաճանական խմբակի անդամ են, բայց որոնք չեն կորցրել մտածելու ունակությունը և ես այն կարծիքին եմ, որ չընդունելու հավանականությունն առկա է»։

ՀՀ-ում ձևավորված ՄԻՊ բարձրակարգ ինստիտուտի երաշխիքներից մեկն էլ ըստ Մելիքյանի՝ ֆինանսական անկախության երաշխքին է, այն, որ չի կարող քաղաքական իշխանությունը կրճատել հաստատության բյուջեն։ Ի դեպ, դա նաև միջազգային ստանդարտ է և առանց այդ երաշխքիքի չի կարող ՄԻՊ հաստատությունը որակյալ՝ «Ա» կարգի համարվել։

«Այս իշխանությունը ինչպես քանդ ու քարափ է անում այլ ինստիտուտներ, հիմա էլ ուզում է ՄԻՊ ինստիտուտը քանդ ու քարափ անել և դա տրամաբանական է, որովհետև այս մարդիկ ոչ թե կառուցող են, այլ քանդող։ Այս պարագայում, ամենայն հավանականությամբ նրանց չի հաջողվի, որովհետև մեծ կասկած ունեմ, որ ԱԺ-ն կընդունի այս օրենքը»։

Ռուբեն Մելիքյանը հիշեցրեց, որ չնայած՝ Արման Թաթոյանը հայտարարել է, որ կդիմի ՍԴ, եթե 80 պատգամավոր կողմ քվեարկի նախագծին, հնարավոր է ՍԴ դիմի նաև ՀՀ նախագահը, որովհետև նախագահն՝ ի տարբերություն ՄԻՊ-ի, կարող է դիմել նախքան ուժի մեջ մտնելը։ ՍԴ կարող են դիմել նաև պատգամավորների 1/3-ը։ Նա ուշադրություն հրավիրեց նաև այն փաստին, որ արդեն հնչում են քննադատություններ արևմտյան հարթակներից։

Իրավապաշտպանն ասում է՝ սա ինստիտուտի խնդիր է և բացարձակ կապ չունի ՄԻՊ-ի անձը։

«Եթե օրինակ՝ վաղը լինի իշխանափոխություն, իշխանության գա նոր ուժ, ես չէի ուզի, որ նրանք ունենան իրենց համար կոմֆորտային ՄԻՊ, որը միշտ իմանա, որ եթե իրեն դրսևորի ոչ այնքան հաճելի ձևով, հեշտությամբ կարող են կտրել»։

Ռուբեն Մելիքյանն ուշադրություն դարձրեց ՄԻ պաշտպան Արման Թաթոյանի գործունեությանը, նշեց, որ վերջինս շատ սկզբունքային է ներքին հարցերում։ Երբ տեղի է ունենում ենթադրյալ խախտումներ, օպերատիվ արձագանքում է խնդիրներին։ Ի տարբերություն իշխող ուժին, շատ ակտիվ է Արցախի, Սյունիքի հետ կապված հարցերով, մեծ դերակատարություն ունի նաև միջազգային տարբեր գործընկերների մոտ։

«Այս քաղաքական որոշ՝ առանձնապես բարձր մակարդակ չունեցող և պետականությունից չհասկացող մարդկանց մոտ կա թյուր կարծիք, որ ՄԻՊ-ը նրա համար է, որ պաշտպանի իրենց ՀՀ քաղաքացիներից։ Այդ մասով դժգոհություն եղել է ՄԻՊ-ի կողմից, բարձրաձայնել է նաև ԱԺ-ում։ Կարծում եմ՝ այս ամենը լրիվ բավարար է, որ ՄԻՊ հաստատությունը իշխող քաղաքական ուժի համար համարվի ոչ այնքան հաճելի կառույց»։

Մելիքյանը նկատեց, որ ՄԻՊ հաստատությունը դրսևորում է բարձր պրոֆեսիոնալիզմ, հարկ եղած դեպքում խոսքեր է հնչեցնում օրինակ՝ իշխող քաղաքական ուժի հասցեին, երբ ՄԻՊ տեսանկյունից ոչ այնքան ընդունելի վարքագիծ են ընդունում։ ՄԻՊ-ը ըստ Մելիքյանի՝ քաղաքական գործունեություն չի իրականացնում։

«Բայց կոմֆորտային չէ, վստահ եմ, քաղաքական ներկայացուցիչների համար ունենալ այդպիսի ՄԻՊ։ Նրանք, օրինակ, կցանկանային երևի թե ունենալ Դանիել Իոսանիսյանի, Նիկոլայ Բաղդասարյանի նման մեկին, որոնք անընդհատ կծափահարեին, դատարանները շրջափակողներին, կասեին «մի բան էլ քիչ եք արել, պետք է ուրիշ բաներ անեիք, շրջափակելով չսահմնափակվեիք», կամ ՍԴ-ն կազմաքանդեն, ասեն՝ «լավ եք արել քիչ եք արել»»։

Մելիքյանը եզրափակեց, որ սկզբունքային հարց է, ինքն էլ փորձելու է հետևողական լինել հարցի կապակցությամբ։

Աղբյուր` Փաստինֆո