Փաստ ինֆո

Հնարավոր է ռազմական գործողություններ տեղի ունենան, բայց այս տարածաշրջանում խաղացող պետությունների՝ Թուրքիայի և Ռուսաստանի դերակատարության և ազդեցության ոլորտների ճշգրտման համար։ «Փաստինֆո»-ի հետ զրույցում ասաց ռազմական փորձագետ Կարեն Հովհաննիսյանը։

Փորձագետի խոսքով պատերազմի վտանգը ծագեց այն ժամանակ, երբ նոյեմբերի 9-ին ստորագրվեց տխրահռչակ փաստաթուղթը։ Այժմ պատերազմի վտանգը կա և դեռ երկար ժամանակ լինելու է։

Կարեն Հովհաննիսյանը նկատեց՝ Սյունիքի հետ կապված Ալիևի հոխորտանքները հող են նախապատրաստում իրենց ազդեցության ոլորտներն ընդլայնելու համար․ «Ռուսաստանը ևս ազդեցության ոլորտների խնդիր ունի և քանի գնում է դրանք պակասում են տարածաշրջանում։ Կանխատեսում եմ ռուս-թուրքական պատերազմ, որը տեղի չի ունեցել ավելի քան 100 տարի, սակայն ամեն ինչ հիմա գնում է նրան, որ հնարավոր են նմանատիպ ռազմական գործողություններ»,-ասաց փորձագետը՝ ընդգծելով, որ ռուս-թուրքական բախումը սարերի հետևում չէ։

Նրա դիտարկմամբ՝ դիրքային առումով Սյունիքում, Գեղարքունիքում վատ վիճակում կլինենք, սակայն իր կանխատեսած պատերազմի դեպքում դիրքային առավելություններն այդքան էլ էական չեն լինի․ «Այստեղ արդեն հեռահար զինտեխնիկա է օգտագործվելու։ Կարծում եմ՝ ռուս-թուրքական հնարավոր բախումը երկար չի լինի և կօգտագործվեն ոչ կոնտակտային պատերազմին բնորոշ զինտեխնիկա, այդ թվում հեռահար հրթիռներ, անօդաչու սարքեր և այլն։ Այդ պատերազմի նպատակը լինելու է ոչ թե տարածքներ գրավելը, այլ պարզապես Սյունիքը կամ Զանգեզուրն ազդեցության ոլորտներում ամրապնդելը»,-նշեց փորձագետը։

Վերջինս նկատեց՝ այդ պատերազմը միանշանակ որոշիչ դեր է ունենալու, և, հավանաբար, լինելու է տարածաշրջանի հակամարտությունների վերջակետը։

Փորձագետը կարծում է՝ այդ ռազմական սադրանքը ոչ թե այս զորավարժությունների շրջանում է լինելու, այլ ավելի ուշ։ Հնարավոր է մեկ կամ մինչև հինգ տարվա ընթացքում։

Հարցին՝ այժմ պատերազմի համար պահը հասունացած չէ՞, Կարեն Հովհաննիսյանը նշեց, որ հիմա Ռուսաստանի և Թուրքիայի միջև սառը հակամարտություն է ընթանում․ «Թե՛ Ռուսաստանի, թե՛ Թուրքիայի կողմից ամեն ինչ արվում է, որ պատերազմի չվերածվի, մյուս կողմից էլ ամեն ինչ արվում է, որ իրար հասկացնեն ազդեցության ոլորտները։ Մի կողմից ցույց են տալիս, որ ռուս-թուրքական հարաբերությունները շատ լավ են, բայց մյուս կողմից էլ տեսնում են ինչպես են Ադրբեջանի տարածքից բարձրացվում թուրքական դրոշներ, իսկ Հայաստանի տարածքից՝ ռուսական դրոշներ։ Այսինքն՝ պետություննեըը հայտնվել են հակամարտող կողմերում։ Իրավիճակը բավականին խրթին է և դժվար է ասել, թե երբ տեղի կունենա այդ պատերազմը»,-ասաց Կարեն Հովհաննիսյանը։

Ավելի վաղ ԱԺ «Լուսավոր Հայաստան» խմբակցության ղեկավար Էդմոն Մարուքյանը հայտարարել էր, որ «Greek Times»-ը զգուշացնում է՝ Ադրբեջանը Թուրքիայի հետ միասին պատրաստվում է նոր պատերազմի, այս անգամ՝ ընդդեմ Հայաստանի՝ նպատակ ունենալով «հետ վերադարձնել պատմական Զանգեզուրը»։

Աղբյուր` Փաստինֆո