Փաստ ինֆո

Այն, որ Հայաստանը հատկապես վերջին երեք տարվա ընթացքում տոտալ հարձակման մեջ է օտարերկրյա լրտեսական ծառայությունների կողմից, արդեն բազմաթիվ փաստերով են ապացուցվում։ Ընդ որում, շրջանակը պարզորոշ տեսանելի է դառնում՝ ներառելով հենց այն պետությունները, որոնք կոնկրետ շահեր են են հետապնդում ՀՀ-ում և Արցախի Հանրապետությունում։

Այսինքն, մինչ ՀՀ ԱԱԾ-ն զբաղված է պետության ներսում ղեկավարի տարբեր հանձնարարականներով մի նոր 37 թիվ կազմակերպելով և իմիտացիա ստեղծելով, թե ՝ ֆեյսբուքյան ֆեյքեր, սատանաներ որսալով, ՀՀ քաղաքացիներին գաղտնալսելով ինչ-որ կարևոր գործ է անում, այդ նույն ժամանակ իր բուն, իրական գործը անտեր է մնում։

Կա՞ արդյոք որևէ երկրորդ երկիր, որին կոնկրետ փաստեր են ներկայացվում պետության ղեկավար անձանց՝ այս կամ այն երկրի կողմից հավաքագրված գործակալներ լինելու վերաբերյալ, իսկ Ազգային անվտանգության ծառայության արձագանքը լինում է «ձայն բարբառոյ յանապատի»։

Ընդ որում, ոչ մեկը կամ երկուսն են այդ փաստերը։ Դրանք հիմնականում դաջված են ներկա իշխանության ներկայացուցիչների կենսագրություններում, ինչը, բնականաբար, լուրջ ուսումնասիրության առարկա պիտի դառնար ՀՀ ԱԱԾ-ում ի սկզբանե։ Բայց ոչ միայն կենսագրություններում, այլև նրանց գործունեության մեջ վերջին 3 տարիներ ընթացքում, երբ տարբեր բարձր պաշտոններ են զբաղեցրել։

Օրերս հայտնի դարձած երկու լրտեսական գործունեության փաստեր առնչվում են Մեծ Բրիտանիայի հետ։ Պարզվում է՝ «HALO Trust» ընկերությունը, որն Արցախում զբաղվում էր բարեգործական աշխատանքով, ձեռքի հետ էլ լրտեսությամբ է զբաղված այնտեղ։ Ի մասնավորի՝ թուրքական հատուկ ծառայություններին է փոխանցել Արցախում առկա ականապատված տարածքների քարտեզը, որը հնարավորություն է տվել 44-օրյա պատերազմի ժամանակ հաջող կերպով հաղթահարել Արցախի ՊԲ-ի պաշտպանական ականապատված տարածքները։ Այս փաստը հանրայնացրել է Արցախի նախագահի հատուկ հանձնարարություններով ներկայացուցիչ Բորիս Ավագյանը։

Ընդհանրապես, բարեգործական և առողջապահական, կրթական և այլ սոցիալական ծրագրերի անվան տակ, ի վերջո, կրոնական կազմակերպություններ որպես, ինչպես նաև՝ լրատվական գործունեություն իրականացնող՝ հիմնականում մեր իրականություն մուտք գործեցին երկրաշարժից հետո, ավելի տարածվելով՝ արցախյան առաջին պատերազմից հետո։ Սկզբնական շրջանում լինելով գործակալական փոքրիկ ցանցեր, գլոբալացման գնացին 2013-18թթ, ըստ էության, լրջագույն դեր կատարելով 2018-ի գունավոր հեղափոխության նախապատրաստման և իրականացման համար։

Բորիս Ավագյանի խոսքով՝ «Հավաստի աղբյուրներից ինձ հայտնի է դարձել, որ «HALO Trust» ընկերությունը, որն աշխատում էր բրիտանական բարեգործական կազմակերպության անվան տակ ու զբաղված էր ականների չեզոքացման աշխատանքներով, Արցախում աշխատած ժամանակահատվածում ձեռք է բերել հայկական կողմի ականապատված տարածքների քարտեզներն ու փոխանցել թուրքական հատուկ ծառայություններին։ Սրա պատճառով պատերազմի ժամանակ հակառակորդը կարողացել է բարեհաջող կերպով անցնել ականապատված տարածքներով։ Վտանգավոր տարածքները ուսումնասիրելու անվան տակ այս ընկերությունն իրականացրել է հետախուզական գործողություններ Արցախի ամբողջ տարածքում»։

Օրերս մամուլն անդրադարձել էր լրտեսական մեկ այլ դրվագի. Այս անգամ խոսքը վերաբերվում էր ՅՈւՆԻՍԵՖ-ի հայաստանյան ներկայացուցիչ Մարիան Քլարկ-Հաթինգի պաշտոնավարման դադարեցմանը, որը ՀՀ ԱԳՆ-ի կողմից ձևակերպվեց որպես՝ «իր մանդատի իրականացման գործում թերացումների եւ ոչ համագործակցային աշխատելաոճի համար», իսկ նույն ընթացքում համացանցում ակտիվ շրջանառվում էր, թե հայաստանյան գրասենյակի արդեն նախկին ղեկավարը լրտեսություն է արել՝ հօգուտ Ադրբեջանի եւ Մեծ Բրիտանիայի, ավելին, մամուլում /«Ժողովուրդ»/տեղեկատվություն եղավ, որ որ ՅՈւՆԻՍԵՖ-ի տվյալ ներկայացուցչով զբաղվել է ԱԱԾ հակահետախուզությունը, սակայն լրտեսության բացահայտման վերաբերյալ պաշտոնական տեղեկատվություն առայսօր չկա։ ՈՒշագրավ է, որ երեկ այս գործի համատեքստում «ՎԵՏՕ» հասարակական-քաղաքական շարժումն է կոչով դիմել ՀՀ ԱԱԾ-ին՝ կոչ անելով « ՀՀ Ազգային անվտանգության ծառայությանը՝ քննության առնել Մ․ Քլարկ-Հաթինգի հնարավոր կապերը Եվրասիա համագործակցության հիմնադրամի Մարդու իրավունքների ծրագրի տնօրեն Իզաբելլա Սարգսյանի և սորոսականներ Դանիել Իոաննիսյանի ու Արթուր Սաքունցի հետ՝ գաղտնի տեղեկատվության փոխանակության ողջամիտ կասկածի շրջանակներում»։ 

Նույն Դանիել Իոաննիսյանի քույրը Արցախում պատերազմական օրերին՝ հեռախոսով լուսանկարում էր Արցախի նախագահի նստավայրը, այլ ռազմավարական օբյեկտներ, ընդհուպ՝ իրենց պատերի հաստությամբ՝ ըստ տեղեկատվության՝ աշխատելով Ադրբեջանի համար։

Այս ամենին եթե ավելացնենք ՀՀ նախագահի, ՀՀ վարչապետի, ՀՀ ԱԺ նախագահին վերաբերող ողջ տեղեկատվությունը, ի վերջո՝ վարչապետի կնոջ բազմակի անգամների ներկայությունը Արցախում՝ ԶՈՒ բունկերում, ուր բարձրաստիճան զինվորականներից զատ որևէ այլ, օտար մարմին չպետք է լինի․․․հարցեր կունենանք՝ ՀՀ ԱԱԾ-ին ուղղելիք։ Պատասխաններ դեռ չկան, բազմակետեր են։

Ի դեպ, ԱԱԾ նախկին ղեկավարներ ունենք՝ Արթուր Վանեցյան, Միքայել Համբարձումյան, ովքեր տարբեր ժամանակներում ահազանգեր հնչեցրել են՝ առաջինը՝ սորոսականների և աղանդների գործած ավերի, երկրորդը՝ վարչապետի՝ ազգային անվտանգության համատեքստում վարած քաղաքականության մասին։ Բացահայտումները, կարծում ենք՝ առջևում են դեռ։

Աղբյուր` Փաստինֆո