Փաստ ինֆո

ԲԴԽ նախագահ Ռուբեն Վարդազարյանի կինը ՀՀ ՀՔԾ-ում հարցաքննվել է՝ վկայի կարգավիճակով։ Այս մասին «Փաստինֆո»-ի հետ զրույցում ասաց ԲԴԽ նախագահ Ռուբեն Վարդազարյանը։

Հիշեցնենք, որ իշխանական շրջանակները ԲԴԽ նախագահի նկատմամբ ճնշումների նոր ալիք են սկսել՝ դժգոհելով դատարանների՝ երբեմն ոչ իշխանահաճո դատական ակտեր կայացնելու դեմ։

Օրերս ԱԺ-ում քննարկվում էր Վճռաբեկ դատարանի դատավորի ընտրության հարցը, որի ընթացքում թեկնածուներին ներկայացնում էր ԲԴԽ նախագահը եւ պատգամավորները պետք է իրենց հարցերը պետք է ուղղեին՝ կապված Վճռաբեկ դատարանի դատավորի թեկնածուների հետ, սակայն հարցերը հիմնականում քաղաքական բնույթի էին և վերաբերում էին ԲԴԽ նախագահի ավելի վաղ արված հայտարարությանը։ ԲԴԽ նախագահից հաշվետվություն պահանջելու իմքայլական պատգամավորների վարքագիծը մասնագիտական հանրության շրջանում դիտարկվեց որպես ուղիղ ճնշման փորձ՝ Վարդազարյանի նկատմամբ, իսկ մարտի 4-ին հայտնի դարձավ, որ Վարդազարյանի կինը հրավիրվել է ՀՔԾ՝ հարցաքննության։

Մարտի 4-ին նշանակված հարցաքննությունը տեղի չէր ունեցել, քանի որ ԲԴԽ նախագահի կինը հեռախոսով էր հրավիրվել, ինչին ի պատասխան ասել էին, որ միայն պատշաճ՝ գրավոր ծանուցագրի պայմաններում կգնան հարցաքննության։

Մարտի 9-ին հայտնի դարձավ, որ Ռուբեն Վարդազարյանի կինը կրկին հրավիրվել է ՀՔԾ՝ հարցաքննության։

Ռուբեն Վարդազարյանը «Փաստինֆո»-ի հետ զրույցում հայտնեց, որ կինը հարցաքննվել է ՝ վկայի կարգավիճակով։ Քրեական գործի տվյալների մասին Վարդազարյանը որևէ տեղեկություն չհայտնեց՝ նախաքննական գաղտնիքից ելնելով, սակայն նշեց, որ, ըստ ամենայնի, քրեական գործը իր դեմ չէ, քանի որ իր անձեռնմխելիությունը վերացված չէ։

«Իմ անձեռնմխելիությունը վերացված չի, հետևաբար, ենթադրում եմ, որ քրեական գործը պետք է որ իմ դեմ չլինի։ Եթե իմ դեմ լիներ, ապա անձեռնմխելիության հարց առաջ կգար»,- ասաց Վարդազարյանը։

Հեղինակ՝ Իզաբել Սահակյան

Աղբյուր` Փաստինֆո