Փաստ ինֆո

Նախագահի հանդիպման առաջարկը լավ է այնքանով, որ ստեղծում է երկխոսելու և խոսքի միջոցով խնդիրները լուծելու հնարավորություն, բայց արդյունքները տեսանելի կլինեին, եթե բոլորն ընդունեին հանդիպման հրավերը և գնային: Այս մասին «Փաստինֆո»-ի հետ զրույցում ասաց քաղաքագետ Թևան Պողոսյանը:

Հիշեցնենք, որ նախագահի աշխատակազմը մարտի 10-ին հայտարարություն տարածեց առ այն, որ նախագահը հանդիպման հրավեր է ուղարկել վարչապետին, խորհրդարանական խմբակցությունների և Հայրենիքի փրկության շարժման ղեկավարներին:

Նշենք, որ նախագահի հանդիպման առաջարկին համաձայնել են ԱԺ «Իմ քայլը» և «Լուսավոր Հայաստան» խմբակցությունները, իսկ վարչապետը դեռևս չի արձագանքել։ ՀՓՇ-ն նախօրեին հայտարարեց, որ համաձայն է մասնակցել հանդիպմանը, բայց իր առաջարկած պայմաններով, այն է՝ հանդիպումը պետք է լինի ԱԺ-ում, ուղիղ հեռարձակմամբ և հստակ օրակարգով՝վարչապետի հրաժարական, ժամանակավոր կառավարության ձեւավորում, արտահերթ խորհրդարանական ընտրություններ։
Քաղաքագետը դժվարանում է կանխատեսել՝ հանդիպումը կկայանա՞, թե՞՝ ոչ, քանի որ ոչ բոլոր կողմերն են համաձայնել հանդիպման առաջարկին.

«Հնարավոր է ՀՓՇ-ի առաջարկն ընդունվի՝ գնան ԱԺ և բաց հանդիպում լինի: Չէ՞ որ 2018թ-ին վարչապետը այդ նույն մոտեցման ջատագովն էր , չէ՞ որ ինքն էլ էր ասում, որ պետք է բաց, թափանցիկ և լրատվամիջոցների առջև քննարկում անեն: Հիմա, հուսով եմ, որ վարչապետը կընդունի հանդիպման հրավերը»,-ասաց Թևան Պողոսյանը:

Զրուցակիցը հույս հայտնեց, որ կողմերը գիտակից կգտնվեն և կկարողանան սեղանի շուրջ նստեն և ամեն ինչ պայմանավորվեն.

«Օրակարգերը կողմերի համար հայտնի են, բուն օրակարգը գործող իշխանության հեռացումն է և արտահերթ ընտրությունները, բոլորը նույնն են պահանջում են: Կկարողանա՞ իշխանությունը համոզել, որ այլ լուծում կա, թող համոզեն, եթե ոչ՝ թող գնան, այդ օրակարգով քննարկեն և կարողանան իրավիճակը շտկել, քանի որ Հայաստանի առջև ամեն րոպե մարտահրավերներ են ավելանում, տարածաշրջանը ամեն րոպե լարվում է: Չմոռանանք, որ մարտի 15-18 Ադրբեջանն է պատրաստվում զորավարժությունների, Հայաստանը` ի պատասխան սրա, մարտի 16-20 է զորավարժություններ անելու»,-ասաց քաղաքագետը՝ ընդգծելով, որ պետք է բոլորը գիտակցեն ինչպես են այդ մարտահրավերները միասնական ուժերով հաղթահարելու .

«Դրա համար պետք է կարողանանք պառակտման աղբյուրը հանենք, կարողանանք հասնել այն կետին, որտեղ իշխանությունները կհեռանան և տեղ կբացեն միասնական ուժերով մարտահրավերներին լուծելու հնարավորությանը»,-ասաց Պողոսյանը:

Անդրադառնալով ՀՓՇ-ի առաջադրած պայմաններին, զրուցակից ընդգծեց, որ դրանք բանակցությունները փակուղի չեն մտցնի.

«Ընդդիմության իրավունքն է ունենալ պայմաններ և ներկայացնել դրանք: Բանակցությունները փակուղի չեն մտցնի այդ պայմանները, փակուղի կստեղծի այն կողմը, որը չի ցանկանա փնտրել լուծումներ»:

Քաղաքագետն արձանագրում է, որ նման հանդիպումներն անհրաժեշտ են ստեղծված իրավիճակի լուծման համար.

«Պետք է կարողանալ երկիրը փրկել,որ պետականություն չկորցնենք, և դա անենք գիտակցված և խաղաղ, ոչ թե՝ բռնի»,-ասաց Թևան Պողոսյանը:

Աղբյուր` Փաստինֆո