Փաստ ինֆո

ՀՀ ԶՈՒ ԳՇ պետի արդեն նախկին տեղակալ Տիրան Խաչատրյանն ընդդեմ ՀՀ նախագահ Արմեն Սարգսյանի գործով ՀՀ ԶՈՒ գլխավոր շտաբին և ՀՀ վարչապետին որպես երրորդ անձ ներգրավելու մասին որոշում է կայացվել։ «Փաստինֆո»-ի հաղորդմամբ՝ Վարչական դատարանը՝ դատավոր Մերի Համբարձումյանի նախագահությամբ, նման որոշում է կայացրել՝ սեփական նախաձեռնությամբ՝ հաշվի առնելով, որ սույն գործով վիճարկվում է Հայաստանի Հանրապետության նախագահի 24.02.2021 թվականի թիվ ՆՀ-25-Ա հրամանագիրը, որով Տիրան Խաչատրյանն ազատվել է Հայաստանի Հանրապետության զինված ուժերի գլխավոր շտաբի պետի առաջին տեղակալի պաշտոնից։ Դատարանը գտել է, որ տվյալ դեպքում առկա են Հայաստանի Հանրապետության վարչապետին և Հայաստանի Հանրապետության զինված ուժերի գլխավոր շտաբին սույն գործով դատավարության մեջ որպես երրորդ անձինք ներգրավելու հիմքերը: 

Ավելի վաղ հայտնել ենք, որ ՀՀ ԶՈԻ ԳՇ պետի արդեն նախկին տեղակալ Տիրան Խաչատրյանը մարտի 3-ին Վարչական դատարան հայցադիմում է ներկայացրել՝ պահանջելով անվավեր ճանաչել իրեն պաշտոնից ազատելու ՀՀ նախագահի փետրվարի 24-ի հրամանագիրը։ Վարչական դատարանը՝ դատավոր Մերի Համբարձումյանի նախագահությամբ, մարտի 10-ին վարույթ է ընդունել հայցադիմումը։
Նախնական դատական նիստ է նշանակվել ապրիլի 29-ը։

Հիշեցնենք, որ ՀՀ ԶՈԻ ԳՇ պետի առաջին տեղակալ Տիրան Խաչատրյանին պաշտոնից ազատելու պատճառը դարձել է Իսկանդերի վերաբերյալ Նիկոլ Փաշինյանի հայտարարությանը «ծիծաղով» արձագանքելը։ Մասնավորապես, Նիկոլ Փաշինյանը փետրվարի 23-ին լրատվականներից մեկին տված հարցազրույցում հայտարարել էր, թե պատերազմի ընթացքում կրակված «Իսկանդերը» չի պայթել կամ պայթել է 10 տոկոսով՝ ակնարկելով, որ գուցե Ռուսաստանը 80-ականների արտադրության զենք է տրամադրել Հայաստանին։
Փաշինյանի նշված հայտարարությունը բուռն արձագանք է ստացել թե՛ ՌԴ-ի կողմից, թե՛ փորձագիտական հանրության կողմից, քանի որ, ինչպես հայտնում են փորձագետները, դա առնվազն պրոֆեսիոնալ չէ։ Նշված հայտարարությունը ՀՀ ԶՈՒ ԳՇ պետի առաջին տեղակալը մեկնաբանել էր ծիծաղով՝ նշելով, որ դա հնարավոր չէ։

«Իհարկե՝ հնարավոր չէ... ո՞նց, «Իսկանդե՞րը»... Մեկ կրակո՞ցը... 10 տոկոսո՞վ... Կներեք սա լուրջ չէ(ծիծաղում է), չի կարելի նման բաներ խոսել, եզրահանգումներ անել: Չի կարելի առհասարակ հարցեր տալ այդ զինատեսակի մասին հեռախոսով և էդպես մակերեսորեն գնահատականներով եզրահանգումներ անել, լուրջ չէ: Ես չգիտեմ՝ ով ինչ է ասել, բայց դա հնարավոր չէ (նորից ծիծաղում է)։

Պարզապես կխնդրեմ չծավալել թեման ու այդ զինատեսակի մասին սխալ ընկալումներ չձևավորել»,- ասել էր Խաչատրյանը լրատվականներից մեկին տված հարցազրույցում։ Խաչատրյանի այս հայտարարությանը հաջորդել է նրա պաշտոնանկությունը, նախագահը փետրվարի 24-ին ստորագրել է Խաչատրյանին՝ պաշտոնից ազատելու մասին Փաշինյանի առաջարկությունը։

Խաչատրյանին պաշտոնից ազատելուն հաջորդել է ՀՀ ԶՈՒ գլխավոր շտաբի հայտարարությունը՝ Փաշինյանի հրաժարականի պահանջին միանալու մասին։ ԳՇ-ն իր վճռական բողոքն է արտահայտել անհեռատես և չհիմնավորված պատճառներով ՀՀ զինված ուժերի գլխավոր շտաբի պետի 1-ին տեղակալին պաշտոնից ազատման առնչությամբ, որն իրականացվել է առանց Հայաստանի Հանրապետության ազգային և պետական շահերը հաշվի առնելու՝ հիմնվելով միայն անձնական և հավակնոտ զգացմունքների վրա: Երկրի համար այսպիսի ծանր պայմաններում նման որոշումը հակապետական և անպատասխանատու քայլ է:

Աղբյուր` Փաստինֆո