Փաստ ինֆո

Նախագահն ունի իր խաղը այս ներքաղաքական գործընթացում. նա ծրագիր է իրականացնում և այդ ծրագրերի մեջ, հավանաբար, մտնում էր ԳՇ պետին պաշտոնից ազատելու որոշումը, նոր պետին չնշանակելու գործընթացը: «Փաստինֆո»-ի հետ զրույցում նման տեսակետ է հայտնել քաղտեխնոլոգ Արմեն Բադալյանը.

«Շատերը նշում են, որ նախագահը գտնվում է վարչապետի հսկողության տակ, վարչապետը կոմպրոմատ ունի նրա դեմ, բայց նման տեսակետ հայտնողները հաշվի չեն առնում մի շատ պարզ ճշմարտություն, որ ՀՀ նախագահը հաստատ նախագահի աշխատավարձով չէ, որ ապրում է և ստիպված չի զբաղեցնում այդ պաշտոնը: Նա ցանկացած ժամանակ կարող է լքել նախագահի պաշտոնը, գնալ Լոնդոն, որտեղից եկել է, բայց, քանի որ նա այստեղ է և կարգավիճակ ունի, որոշակի գործառույթ է իրականացնում, շատ դեպքերում նրա գործառույթը համապատասխանում է վարչապետի իրականացրած քաղաքականությանը, դրանից է, որ մարդիկ խառնվում են, և կարծում են, որ վարչապետը ճնշում է կամ շանտաժի է ենթարկում: Դա այդպես չէ»,-ասաց քաղտեխնոլոգը՝ վստահեցնելով, որ նախագահը ծրագիր է իրականացնում.

Իսկ թե, ինչ ծրագիր է, կիմանան քաղաքական այն շրջանակները, որոնց աջակցությամբ երրորդ նախագահը Արմեն Սարգսյանին նշանակեց ՀՀ նախագահ:

«Նախագահը 2018թ-ի ապրիլ-մայիսյան իրադարձությունների մեջ ուներ համապատասխան մասնաբաժին և հիմա այդ գործառույթը ինքն իրականացնում է»,-ասաց Արմեն Բադալյանը՝ նշելով, որ այդ շրջանակները, որոնք Արմեն Սարգսյանին նշանակել են նախագահ, որոշակի ծրագրեր են դրել նրա առջև.

« Այդ ծրագրերի մեջ, հավանաբար, մտնում էր ԳՇ պետին պաշտոնից ազատելու որոշումը, նոր պետին չնշանակելու գործընթացը: Միշտ չէ որ նախագահի խաղը և գործող վարչապետի քաղաքականությունը կարող են իրար համապատասխանել, բայց քանի որ վարչապետը չենթարկվող չի սիրում, նա ստիպում է, որ նախագահը այդ խաղի մեջ ուղղումներ մտցնի, և շարունակելով խաղ իրականացնել, որոշակի փոփոխությունների ենթարկի նախապես գծված գիծը, որը նա առաջնորդվում է»,-ասաց Բադալյանը:

Փորձագետը հիշեցրեց, որ 2018թ-ի ապրիլ- մայիսյան իրադարձություններում բավականին ակտիվ էին անգլիական հիմնադրամները, որոնք մեծ ազդեցություն ունեցան հեղափոխական գործընթացներին:

«Այդ շրջանակները այն ժամանակ Սերժ Սարգսյանի հետ կարողացան գալ համաձայնության , որպեսզի Արմեն Սարգսյանը դառնա ՀՀ նախագահ»,-ասաց քաղտեխնոլոգը՝ հավելելով՝ գործող նախագահը երրորդ նախագահի, ինչպես նաև անգլոսաքսոնական իր ղեկավար շրջանակների հետ կապը չի կորցնում, համագործակցում է նրանց հետ, և, ըստ այդմ, գործողություն է իրականացնում.

«Քանի դեռ հրաժարական չի տվել, չի գնացել, ուրեմն ինչ- որ բան ստացվում է և ինչ-որ խնդիրներ ունի լուծելու: Կարելի է ենթադրել Հայաստանի վերաօրիենտացիան դեպի արևմուտք»,-ասաց Արմեն Բադալյանը:

Վերջինս բացառում է, որ նախագահի վրա վարչապետը որևէ ճնշում ունի, քանի որ, ըստ քաղտեխնոլոգի,գործող նախագահը չունի ճնշման ենթարկվելու մոտիվացիա.
«Եթե իր վրա ճնշումներ լիներ և խնդիրներ չունենար լուծելու, նա հրաժարական կտար և կգնար»,-կարծում է Բադալյանը:

Քաղտեխնոլոգը ենթադրում է, որ այս պահին էլ կապ կա գործող նախագահի և երրորդ նախագահի միջև.

«Նրանց միջև ենթադրում եմ կա որոշակի անդրկուլիսյան համագործակցություն, կա որոշակի ինֆորմացիա և բավականին խորը վերլուծություն սրա վերաբերյալ:Երրորդ նախագահը իր կապիտալները, ըստ օդում կախված լուրերի, Արևմուտքում է պահում և որոշակի կախվածություն ունի Արևմուտքից: Նա արևմտյան խաղ է խաղում և այդ խաղի մեջ է նաև գործող նախագահը, գործող նախագահի և երրորդ նախագահի համագործակցությունը այդ կտրվածքով է»,-եզրափակեց Արմեն Բադալյանը։

Աղբյուր` Փաստինֆո