Փաստ ինֆո

Նախագահն ընդամենը Նիկոլի շահերի սպասարկուն է, նրա կամակատարը և իր քայլերով ամեն ինչ անում է, որ Նիկոլ Փաշինյանն իշխանության մնա։ «Փաստինֆո»-ի հետ զրույցի ժամանակ նման կարծիք հայտնեց քաղաքագետ Հրանտ Մելիք-Շահնազարյանը։

Հիշեցնենք, որ ՀՀ նախագահ Արմեն Սարգսյանն առաջարկել է երկրում առկա իրավիճակը քննարկելու նպատակով վարչապետին, ԱԺ խմբակցությունների ղեկավարներին և Հայրենիքի փրկության շարժման ղեկավարին հանդիպել մարտի 13-ին։

Քաղաքագետը նշում է, որ նախագահն ուղիղ պատասխանատվություն է կրում երկրում ստեղծված լարված իրավիճակի համար։ Հրանտ Մելիք-Շահնազարյանի խոսքով տարիներ շարունակ Արմեն Սարգսյանն ամեն կերպ նպաստել, ամեն ինչ արել է, որ Նիկոլ Փաշինյանը կարողանա կազմաքանդել պետության իրավական հիմքերը, ոտնատակ անել սահմանադրությունը, ճնշումներ գործադրել դատական համակարգի վրա․ «Նա օգնել է, որ Փաշինյանը վարկաբեկի մեր զինված ուժերին, բանակին և որևէ կերպ չի նպաստել երկրի անվտանգության աճին։ Հիմա, ըստ էության, երեսը փրկելու ինչ-որ գործողություններ է անում։ Ընդ որում` անմիջապես այն բանից հետո, երբ բառացիորեն դրանից մի քանի ժամ առաջ ինքը սահմանադրական վեճը լուծելուն ուղղված քայլ չարեց՝ լավ իմանալով, որ դա բերելու է նոր ցնցումների և բանակում առաջացնելու է նոր խնդիրներ։ Այդքանից հետո նման առաջարկ անելն առնվազն երեսպաշտություն է Արմեն Սարգսյանի կողմից և կարծում եմ, որ առողջ քաղաքական ուժերն այս օրակարգը քննարկելու որևէ պատճառ և առիթ չունեն»,-նշեց քաղաքագետը՝ հավելելով, որ առողջ քաղաքական ուժերը չպետք է համաձայնվեն մասնակցել այդ հանդիպմանը։

Քաղաքագետն ընդգծեց՝ վարչապետն ուզում է տպավորություն ստեղծել, որ հանրությունը և քաղաքական ուժերը համամիտ են իր օրակարգին և այդկերպ փորձում է շեղել մարդկանց ուշադրությունը երկրի գլխավոր քաղաքական խնդրից, իսկ նախագահը սպասարկում է այդ օրակարգին։

Հարցին՝ նշանակում է նման հանդիպումը որևէ հեռանկար չունի՞, Հրանտ Մելիք-Շահնազարյանը բացասական պատասխան տվեց․ «Պարտավոր ենք այնքան ժամանակ հանրահավաքներ և ցույցեր անել, քանի դեռ երկրում կա դավաճան իշխանություն։ Երբ մարդիկ դժգոհում են, թե ինչքան կարելի է ցույցեր անել, պետք է արձանագրել՝ այնքան ժամանակ, քանի դեռ դավաճան իշխանությունն է։ Ինձ համար միանշանակ է, որ այդ ցույցերով խնդիր է լուծվում, իշխանությունը կազմաքանդվում է և օր օրի ավելի թուլանում»,-ասաց քաղաքագետը։

Դիտարկմանը, որ Հայրենիքի փրկության շարժումը հանդիպման վերաբերյալ դեռ վերջնական որոշում չի հայտնել, սակայն Իշխան Սաղաթելյանը հայտարարել է, որ վարչապետի հետ կարող են հանդիպել միայն նրա հրաժարականի օրակարգը քննարկելու համար, Հրանտ Մելիք-Շահնազարյանը նկատեց՝ դա խելամիտ որոշում է․ «Դրանից զատ այլ հարցեր քննարկելն ինձ համար անհասկանալի կլինի։ Ավելի քան համոզված եմ, որ Հայրենիքի փրկության շարժումը ճիշտ ուղու վրա է և այն, ինչ ասել է Իշխան Սաղաթելյանը դրա դրսևորումներից մեկն է։ Նրանք, ովքեր կհամաձայնվեն այդ հանդիպմանը մասնակցել, քաղաքական սխալ կգործեն։ Ակնկալում եմ, որ առողջ քաղաքական ուժերը կհրաժարվեն կեղծ օրակարգից»,-ասաց Հրանտ Մելիք-Շահնազարյանը։

Վերջինս չի համարում, որ բանակի դիրքորոշման հետ կապված խնդիրները Փաշինյանի համար լուծված են։ Քաղաքագետի կարծիքով քաղաքական իշխանություններն իրենց գործունեությամբ նպաստեցին, որ զինված ուժերը ևս մեկ անգամ բարձրաձայնեն հրաժարականի մասին իրենց պահանջը․ «Ըստ էության հիմա խնդիրն այլևս հայտարարությունների մակարդակում չէ, այլ ընդգծված երևացող կոնֆլիկտի մակարդակում»։

Դիտարկմանը, որ շատերը կարծում են՝ Օնիկ Գասպարյանին պաշտոնից հեռացնելով՝ Նիկոլ Փաշինյանը հասավ իր ուզածին, քաղաքագետն ասաց․ «Վարչապետն իր ուզածին չի հասել։ Նա խաբում է հանրությանը, թե հարցն Օնիկ Գասպարյանի մեջ է, ոչ թե բանակի, բայց իր գործունեությամբ, իր քայլերով և նախագահի հետ կեղտոտ համագործակցությամբ, փաստացի ցույց տվեցին հակառակը, որ հարցն Օնիկը չէ, այլ ամբողջ բանակը։ Երեկ այդ կոնֆլիկտի երկրորդ փուլ մտնելուն ականատես դարձանք»,-եզրափակեց Հրանտ Մելիք-Շահնազարյանը։

Աղբյուր` Փաստինֆո