Փաստ ինֆո

Նիկոլ Փաշինյանի՝ Գլխավոր շտաբ այցի նպատակը 10 վայրկյանանոց կադրեր ունենալն է, որտեղ զինվորականները հոտնկայս դիմավորում էին մի մարդու, որի հրաժարականն էին պահանջում։ Այս մասին հրավիրված ասուլիսին ասաց իրավապաշտպան Ռուբեն Մելիքյանը։ 

Մելիքյանն ընդգծեց, որ դա PR քայլ է, զինվորականները հեռու լինելով PR-ից, ընկան ծուղակը և հեռուստադիտողի համար ամենևին էական չէ, որ դրանից հետո նրանք բավականին սուր հարցեր են բարձրացրել։

Մելիքյանի դիտարկմամբ՝ ԳՇ չի ունեցել գործողությունների հստակ ծրագիր, քանի որ ի սկզբանե գործողություններ իրականացնելու մտադրություն ունեցողը հրապարակավ չի հայտարարում, այլ՝ միանգամից անում է գործողություններ։ Նա նկատեց, որ գործողություններ անելու համար եղել է շատ ավելի բարենպաստ ժամանակաշրջան հենց պատերազմի ընթացքում։

Մելիքյանը չի բացառում, որ նրանք վախենում են պատասխանատվություն վերցնելուց, որովհետև եթե այդպես չլիներ, ապա գործողությունները ճիշտ ժամանակին կկատարվեին, հենց պատերազմի օրերին և չէինք ունենա այս ազգային աղետը։

«Այն, որ մարդն ունի բարձր և մեծ կշիռ ունեցող ուսադիրներ, ամենևին չի խոսում մարդու անձնային որակների մասին, ամենևին չի նշանակում, որ մարդն ունի բավականին վճռականություն»,- նշեց Մելիքյանը։

Անդրադառնալով նախագահ Արմեն Սարգսյանի դերակատարությանը՝ իրավապաշտպանը նկատեց, որ տվյալ հարցում նրա ազդեցությունը բացասական է եղել, նա արեց կես քայլ և հայտարարեց, որ կա սահմանադրականության խնդիր, և ակնհայտ էր, որ մի փոքր հետևողականություն ունեցող հանրային անձն այլ տարբերակ չպետք է ունենար, քան ՍԴ-ում վիճարկել այդ հրամանագրի սահմանադրականությունը։

Մելիքյանը նաև չբացառեց, որ Արմեն Սարգսյանին հնարավոր է սպառնացել են, որ կատարի հայրենիքի դավաճանի պահանջները։

Աղբյուր` Փաստինֆո