Փաստ ինֆո

«Ինձ հետ մի քիչ լավ էին վարվում, բայց ես չէի ասի, որ արտակարգ լավ էին վարվում»,- ասել է ադրբեջանցիների կողմից գերեվարված Մարալ Նաջարյանը՝ «Շանթին» պատմելով, թե ինչպես է գերեվարվել և գերության մեջ գտնվելու ընթացքում ինչպես են իրեն վերաբերվել։

Մարալը պատմել է, որ ինքը գերեվարվել է Շուշի հասնելուց հետո, որտեղ իրեն եւ տաքսի վարորդին անմիջապես շրջապատել են։

«Հազիվ Շուշի հասանք, զինվորները եկան մեզ շրջապատեցին, հարցրին` որտեղի՞ց եք, պատասխանեցինք, որ Երևանից ենք գալիս, հարցրեցին` ինչո՞ւ, ասացինք, որ իրերը Շուշիի հյուրանոցում են, պիտի վերցնենք»։

Նաջարյանը պատմել է, որ ճանապարհին իրենց մեքենան կանգնեցրած ադրբեջանցիները վերցրել են իրենց իրերը, խոստացել՝ եթե խնդիր չլինի, բաց կթողնեն։

«Ասացին` անձնագրերը տվեք, հետո մեր դրամապանակները, հեռախոսները և մեքենայի բանալիները վերցրին։ Մեզ իջեցրին մեքենայից, ասացին` պետք է ստուգեն, եթե ամեն ինչ կարգին լինի, ձեզ կուղարկենք Երևան։ Հեռախոսում Վիգենի կամավորական նկարները տեսան, ասացին, որ մեզ չեն կարող թողնել՝ «դուք տեռորիստ եք»։ Վիգենին ծեծեցին, հետո մեզ նստեցրին ջիպի մեջ։ Մեքենայում գազի բալոններ կային, դռներն ու պատուհանները փակեցին։ Իմ աչքերը բաց էին, Վիգենի աչքերը՝ փակ։ Մտածեցի, որ մեզ ողջ–ողջ այրելու են։ Շատ վախեցա այդ ժամանակ, հույս չունեի, որ ողջ կմնամ։ Բայց աղոթում էի, ասում էի` Աստված, ինձ ուժ ու կարողություն տուր, որ դիմանամ»,–պատմել է Մարալը, հավելել, որ դրանից հետո իրենց Ադրբեջան են տեղափոխել։

«Ինձ հետ մի քիչ լավ էին վարվում, բայց ես չէի ասի, որ արտակարգ լավ էին վարվում, նորմալ»- պատմել է Մարալը։

Հիշեցնենք, որ լիբանանահայ կինը գերեվարվել էր Հայաստանի, Ռուսաստանի և Ադրբեջանի ղեկավարների միջև եռակողմ հայտարարության ստորագրումից անմիջապես հետո՝ նոյեմբերի 10-ին Շուշիում, որտեղ մեկնել էր անձնական իրերը վերցնելու։

«Փաստինֆո»-ի հաղորդմամբ՝ 4 ամիս գերության մեջ մնալուց հետո Մարալ Նաջարյանը մարտի 10-ին  ազատ է արձակվել ու վերադարձել տուն` Բեյրութ:

Նաջարյանի հետ գերեվարվել է նաեւ մեկ այլ լիբանանահայ՝ տաքսու վարորդ Վիգեն Էուլջեքյանը, որին Ադրբեջանը ներկայացնում է որպես 2500 դոլարի դիմաց կռվող վարձկան, նրան 5 մեղադրանք է առաջադրվել։

Աղբյուր` Փաստինֆո