Փաստ ինֆո

Նախագահի դիմումի հիման վրա «Զինվորական ծառայության և զինծառայողի կարգավիճակի մասին» օրենքի հակասահմանադրական ճանաչվելը կունենա ազդեցություն՝ ՀՀ ԶՈՒ ԳՇ պետ Օնիկ Գասպարյանի պաշտոնանկության հարցում։ Հակասահմանադրական ճանաչվելու դեպքում Գասպարյանը կարող է վերականգնվել պաշտոնում։ Այս մասին «Փաստինֆո»-ի հետ զրույցում ասաց սահմանադրագետ Վարդան Այվազյանը՝ նշելով, որ Նախագահը կարող էր նաև միջնորդություն ներկայացնել ՍԴ՝ Գասպարյանի պաշտոնանկության գործընթացը մինչև օրենքի սահմանադրականության հարցի լուծումը կասեցնելու մասին։ Նախագահի կողմից նման միջնորդությամբ չդիմելու դեպքում ՍԴ-ն իրավունք ունի իր նախաձեռնությամբ կասեցնելու գործընթացը։

Հիշեցնենք, որ Նիկոլ Փաշինյանը ՀՀ ԶՈՒ գլխավոր շտաբի պետ Օնիկ Գասպարյանին պաշտոնից ազատելու մասին միջնորդություն է ներկայացրել նախագահ Արմեն Սարգսյանին այն բանից հետո, երբ ՀՀ ԶՈՒ գլխավոր շտաբը հայտարարություն տարածեց պահանջելով Նիկոլ Փաշինյանի և կառավարության հրաժարականը։ Փաշինյանի առաջին միջնորդությունը նախագահի կողմից առարկություններով վերադարձվել է՝ նշելով, որ այն առերեւույթ պարունակում է Սահմանադրության խախտումներ։ Փաշինյանը, չի ընդունել առարկությունները, եւ առանց որեւէ փոփոխության կրկին ուղարկել է այն։ Նախագահը չի ստորագրել առաջարկությունը, սակայն դրա սահմանադրականության հարցը ևս չի վիճարկել ՍԴ-ում՝ սահմանված ժամկետում։ Փոխարենը ՍԴ է դիմել՝ «Զինվորական ծառայության և զինծառայողի կարգավիճակի մասին» սահմանադրականության հարցով։ Այսօր արդեն Փաշինյանը հայտարարեց, որ ՀՀ ԶՈՒ ԳՇ պետ Օնիկ Գասպարյանն ազատվել է պաշտոնից՝ իրավունքի ուժով։ Օնիկ Գասպարյանն էլ հայտարարությամբ հանդես եկավ՝ նշելով, որ կդիմի ՀՀ վարչական դատարան՝ վիճարկելով իրավունքի ուժով իրեն պաշտոնից ազատելը։

Սահմանադրագետ Վարդան Այվազյանը «Փաստինֆո»-ի հետ զրույցում ասաց, որ Օնիկ Գասպարյանը կարող էր դիմել Վարչական դատարան՝ մինչև իրավունքի ուժով իրեն պաշտոնից ազատելու հրամանագրի օրինական ուժի մեջ մտնելը։ Վարչական դատարանը կարող էր վարչապետի հակասահմանադրական միջնորդությունը կասեցնել՝ մինչև վերջնականապես հարցին լուծում կտրվեր։ Բացի դա, սահմանադրագետը գտնում է, որ Գասպարյանը կարող էր չկատարել հակասահմանադրական հրամանը։

«Քանի որ և իրեն ազատելը, և այդ ամենն անտրամաբանական է, ընդհանրապես իշխանությունների երեք տարվա ամբողջ գործունեությունը սահմանադրական կարգավորումների տիրույթից դուրս է և այդ պարագայում, եթե վարչապետին, նախագահին, մի ամբողջ ԱԺ-ին կարելի է թքել Սահմանադրության և օրենքների վրա, ուրեմն նույն հաջողությամբ Օնիկ Գասպարյանն էլ իրավունք ունի չկատարել նրանց հակասահմանադրական հրամանները։ Ինչու՞՝ իրենց կարելի է, իրեն՝ ոչ»,- նշեց Այվազյանը։

Ինչ վերաբերում է նախագահի գործողություններին, սահմանադրագետը նշեց, որ վերջինս անտրամաբանական քայլ է դրսևորել, որովհետև իր առարկությունները ներկայացնելիս նա հիմնավորել է, որ վարչապետի առաջարկությունը Սահմանադրությանը հակասող է։

«Բացի դա՝ վարչապետին տրված էր հնգօրյա ժամկետ՝ պնդելու առաջարկությունը։ Ժամկետի տրամաբանությունն այն էր, որ վարչապետը պետք է լրացուցիչ քննարկեր նախագահի ներկայացրած առարկությունները և լրացուցիչ հիմնավորում ներկայացներ՝ պնդելու իր առաջարկությւոնը, բայց ինքը մեկ րոպե անգամ չհապաղեց և առանց որևէ հիմքի պնդեց։ Տրամաբանությունն այն էր, որ նախագահն առանց մտածելու պետք է դիմեր ՍԴ, որովհետև վարչապետը ոչ մի նոր բան չի ասել, ոչ մի հիմնավորում չի ներկայացրել և նախագահի առարկություններն էլ մնում են ուժի մեջ այն առումով, որ վարչապետի առաջարկությունն հակասահմանադրական է »,- ասաց նա՝ հավելելով, որ նախագահի կողմից ՍԴ չդիմելը կարելի է բնութագրել կամ ներկայացնել որպես վարչապետի և նախագահի թատերականացված գործողություն՝ թատրոնի ժանրից։ Սահմանադրագետը նկատեց՝ նախագահը չի կատարել իր սահմանադրական պարտավորությունը, ինչը հիմք է պաշտոնանկության գործընթաց սկսելու համար։

Հեղինակ՝ Իզաբել Սահակյան

Աղբյուր` Փաստինֆո