Փաստ ինֆո

Ուժային կառույցների կառավարման համակարգը, չի աշխատում, բարոյալքված են, կարգապահությունը չի գործում և դրա պատճառը Փաշինյանի անհիմն քայլերն են: Այս մասին «Փաստինֆո»-ի հետ զրույցում ասաց քաղաքագետ Ստեփան Դանիելյանը:

Ըստ նրա՝ Փաշինյանի և Զինված ուժերի միջև տարաձայնությունը վաղուց է նկատվել, սակայն ավելի ընդգծվել է ԳՇ պետի առաջին տեղակալ Տիրան Խաչատրյանին աշխատանքից ազատելուց հետո.

«Վարչապետի և Գլխավոր շտաբի տարաձայնությունները սկսվեցին այն բանից հետո, երբ գործող վարչապետը, առանց որևէ հիմնավորման, ազատեց ԳՇ պետի առաջին տեղակալին:

Հիշում ենք վարչապետի՝ իսկանդերի մասին հայտարարությունը, ԳՇ պետի առաջին տեղակալը լրագրողների հարցին քմծիծաղով էր պատասխանել և ասել՝ նման բան հնարավոր չէ, որից հետո նրան վարչապետը հեռացրել էր: Դրանից հետո էլ վարչապետի խոսնակը հայտնեց, որ սխալվել են, վարչապետին սխալ տեղեկություն են տվել, այսինքն՝ Փաշինյանն ընդունել է, որ ԳՇ պետի տեղակալին սխալ տեղն է աշխատանքից հանել, բացահայտորեն, նա սխալ և չհիմնավորված քայլ է կատարել և դրանով հարվածի տակ է դրել Գլխավոր շտաբի հեղինակությունը»,-ասաց քաղաքագետը՝ ավելացնելով.«Գլխավոր շտաբի համբերությունն արդեն լցվել է և չէր կարող թույլ տալ նման բարձրաստիճան սպային առանց հիմնավորման աշխատանքից հեռացնեն և նման պայմաններում բանակը քայքայման գործընթացի առաջ էր կանգնել, մինչ այդ էլ էր նման վտանգի առաջ սա արդեն վերջին կաթիլն էր»,-ասաց Ստեփան Դանիելյանը:

Հիշեցնենք, որ Գլխավոր շտաբի՝ Փաշինյանի հրաժարականի պահանջով հայտարարույթւոնից հետո, Փաշինյանը հայտարարեց, որ ԶՈՒ ԳՇ պետին ազատելու որոշում է կայացրել և հրամանագիրն ուղարկել է նախագահին: Նախագահը փետրվարի 27-ին ԳՇ պետի ազատման հրամանագիրը առարկություններով ետ էր ուղարկել կառավարություն, նույն օրն էլ Նիկոլ Փաշինյանը կրկին առաջարկությունն ուղարկել էր նախագահին։

Այսօր առավոտյան վարչապետի աշխատակազմը հայտարարություն տարածեց, որ ՀՀ ԶՈՒ գլխավոր շտաբի պետ Օնիկ Գասպարյանն իրավունքի ուժով համարվում է ազատված զբաղեցրած պաշտոնից:

Նախագահ Արմեն Սարգսյանն էլ հայտարարեց, որ դիմել է ՍԴ «Զինվորական ծառայության և զինծառայողի կարգավիճակի մասին» 2017թ. նոյեմբերի 15-ի ՀՀ օրենքի՝ Սահմանադրությանը համապատասխանելու հարցը որոշելու խնդրանքով:

Քաղաքագետը հիշեցրեց, որ պատերազմի ժամանակ 5 ԱԱԾ պետ է փոխվել, մի քանի ոստիկանապետ է փոխվել, բանակում արագորեն նախարարներ և շտաբի պետեր են փոխվել, ինչն էլ վկայում է, որ անվտանգություն ապահովող կառույցներում անհասկանալի իրավիճակ է ստեղծվել.

«Նման իրավիճակում, երբ կառույցները չեն կարողանում իրենց գործառույթները կատարել, վարչապետի անհիմն որոշումների պատճառով, մենք տեսանք հետևանքն ինչ եղավ պատերազմում, տեսանք, որ ուժային կառույցների կառավարման համակարգը, չի աշխատում, բարոյալքված են, կարգապահությունը չի գործում և դրա պատճառը Փաշինյանի անհիմն քայլերն են»,-ասաց Ստեփան Դանիելյանը:

Քաղաքագետն արձանագրում է, որ մեր անվտանգության, բանակի վերակազմակերպման հարցը կասկածի տակ է դրվում, ինչի մասին Գլխավոր շտաբը, բարձրաստիճան սպաները իրենց հայտարարություններում նշել են:

Զրուցակիցն անհասկանալի է համարում նաև նախագահի քայլերը

«Ինձ համար անհասկանալի են նաև նախագահի քայլերը, դրանց տրամաբանությունը չեմ հասկանում»,-ասաց քաղաքագետը՝ չբացառելով, որ նախագահի վրա ճնշումներ են եղել.

«Ճնշումների մասին հայտարարել է նախագահի աշխատակազմը, հայտարարություն էր տարածել, որ նախագահին ճնշումների ենթարկելն անթույլատրելի է, ինչն էլ նշանակում է, որ նախագահի վրա եղել են ճնշումներ: Թե որ կողմից են եղել ճնշումները չգիտենք, բայց քանի որ ընդդիմության ճնշելու գործիքները սահմանափակ են , ճնշումները զուտ հայտարարությունների տեսքով են, այլ ճնշում չեն կարող անել, կարելի է ենթադրել, որ եղել են անօրինական ճնշումներ կառավարության կողմից: Թե ինչու է նախագահը ճնշումների ենթարկվել, ինքը պետք է պատասխանի»,-եզրափակց Ստեփան Դանիելյանը:

Աղբյուր` Փաստինֆո