Փաստ ինֆո

Այս փուլում գնդակը Սահմանադրական դատարանի դաշտում է։ Այս մասին ԱԺ-ում լրագրողների հետ զրույցի ժամանակ ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը։

Պատգամավորը նշեց, որ ՍԴ-ն գործը վարույթ ընդունելիս կարող է կասեցնել հրամանագրի կամ վարչապետի հայտարարության իրավական ուժի մեջ մտնելը, քանի դեռ նշված իրավակարգավորումների սահմանադրականության հարցը չի որոշվել․ «Հետևաբար ՍԴ-ն հենց հիմա կարող է որոշել, որ Օնիկ Գասպարյանը շարունակի պաշտոնավարել։ Այստեղ Հանրապետության նախագահը հնարավորություն է ստեղծել, որ ՍԴ-ն, եթե սահմանադրական արդարադատության համատեքստում քայլ ունի անելու, այդ քայլը կատարի»,-նշեց Էդմոն Մարուքյանը։

Վերջինս նշեց, որ ԼՀԿ-ն մշակել էր մի առաջարկ, որը վերաբերում էր իրավիճակից ելքին, այն է ԳՇ-ին հանգիստ թողնել, ինչին ի պատասխան նրանք պատրաստ էին հուշագիր կնքել․ «Մենք լուծում առաջարկեցինք, ինչը մերժվեց։ Մեր մեկնած ձեռքը թողնվել է անպատասխան և այս պահին այլևս մեր առաջարկությունն իր ուժը կորցնում է։ Արտահերթ խորհրդարանական ընտրությունների օրակարգը շարունակելու է թևածել Հայաստանում և լինելու է թիվ մեկ օրակարգը, որովհետև զինված ուժերն ամբողջությամբ միացել են այդ օրակարգին»,-ասաց Էդմոն Մարուքյանը։

Հարցին՝ իշխանության հետ հուշագիր չե՞ն կնքի, Էդմոն Մարուքյանն ասաց․ «Ոչ, որովհետև այս փուլում այն առաջարկությունը, որը ներկայացրել ենք, այլևս ուժի մեջ չէ»։

Աղբյուր` Փաստինֆո