Փաստ ինֆո

«Արտառոց որևէ բան տեղի չի ունեցել, որևէ նոր բան՝ նույնպես: Պարզապես, ես իմ, ինչպես նաև՝ շարժման հույսը Օնիկ Գասպարյանի հետ չէի կապել: Ասեմ ավելին՝ ընդդիմադիր շարժումը գնալով ավելի մեծ թափ ու հզորություն է հավաքելու»,- «Փաստինֆո»-ի հետ զրույցում ասել է Հայաստանի Հանրապետության նախկին վարչապետ Հրանտ Բագրատյանը:

Հիշեցնենք՝ այսօր Նիկոլ Փաշինյանը հայտարարեց, որ իրավունքի ուժով Օնիկ Գասպարյանը դադարում է լինել ԳՇ պետ։ Ավելին՝ արդեն ՀՀ նախագահին է ներկայացվել Արտակ Դավթյանին այդ պաշտոնում նշանակելու մասին հրամանագրի նախագիծը։ Հայտարարությամբ է հանդես եկել նաեւ Օնիկ Գասպարյանը՝ վերահաստատելով Նիկոլ Փաշինյանի հրաժարականի պահանջը։ Բացի այդ՝ նա նշել է, որ դիմել է վարչական դատարան։

Հրանտ Բագրատյանը նկատում է՝ Օնիկ Գասպարյանի գնալ – չգնալով ընդդիմադիր դաշտի պահանջների կամ վճռականության հարցում ոչինչ չի փոխվում, բանակը, միևնույն է՝ շարունակում է պահանջել կապիտուլյանտ վարչապետի հրաժարականը, իսկ որպես պետական ամենակարևորագույն կառույց, բանակի պահանջն անբեկանելի է մնում՝ Օնիկ Գասպարյանի հետ, թե առանց նրա՝ միևնույն է:

Ինչ վերաբերում է նախագահ Արմեն Սարգսյանին, Հրանտ Բագրատյանը նկատում է՝ միշտ էլ թույլ է համարել նրան, այլ կերպ ասած, այսօր կատարվածի մեջ ինքը՝ պարոն Բագրատյանն անսպասելի ոչինչ չի տեսնում:

Հեղինակ՝ Նվարդ Մանվելյան

Աղբյուր` Փաստինֆո