Փաստ ինֆո

«Ոնց տապալվեց պատերազմը այնպես էլ տապալվում է գերիների հարցը։ Բերեք մի փաստարկ, որ ընդդիմության գործունեությունը խանգարում է գերիներին բերելուն»,- այս մասին ասաց «Հայրենիքի փրկության շարժման» միասնական թեկնածու Վազգեն Մանուկյանը՝ լրագրողների հետ զրույցում անդրադառնալով իշխանական պատգամավորների հայտարարություններին, թե ընդդիմության հայտարարությունների պատճառով տապալվում է գերիների վերադարձի հարցը։

Վազգեն Մանուկյանը տեղեկացրեց, որ քրեական գործի նախաքննությունն ավարտված է, միևնույն ժամանակ հայտնեց, որ մեղադրանքը լրացվել է ևս մեկ դրվագով։

«Երբ որ ասել եմ բանակը պետք է ցասում ցուցաբերի և չենթարկվի անօրինական որոշումներին, դա մտել է մեղադրանքի մեջ։ Գործն ուղարկվել է դատարան»։

Լրագրողների հետ զրույցում Մանուկյանը մեկ անգամ էլ շեշտեց, որ սպասում են նախագահի որոշմանը՝ կվիճարկի՞ ԳՇ պետին ազատելու հրամանը դատարանում, թե ոչ։ Բացի այդ,  կարևոր են համարում նաև, թե դրանից հետո վարչապետն ինչ քայլերի կդիմի։

«Ես համոզված եմ, որ բանակը չի նահանջելու, որովհետև այստեղ մեկ մարդու հարց չէ։ Օնիկ Գասպարյանի անձնական հարցը չէ, ամբողջ բանակը սա ընդունում է, որպես միասնական կոլեկտիվ հարց։ Նահանջ չի լինում այդտեղ։ Եթե հրամանագիր լինի Նիկոլ Փաշինյանի կողմից, որ հանում է աշխատանքից, ես համոզված եմ, որ բանակը նրան չի ենթարկվի, մնալու են իրենց տեղերում»։

Մանուկյանն անդրադարձավ նաև հարցին, թե երբ են անցում կատարելու «Պլան Բ-ին», նշեց, որ «Պլան Ա-ով» էին առաջնորդվում, երբ որ Գլխավոր շտաբի հայտարարությունը եղավ, գործողությունները ծավալեցին միայն այդ կետի շուրջ, որովհետև վճռական նշանակություն ուներ հայտարարությունը։

«Այսօր, վաղը կլինի հանգուցալուծումը և կտեսնենք մեր գործունեության շարունակությունը։ Վճռական գործողություններն առջևում են։ Դուք մի բան հաշվի առեք Նիկոլ Փաշինյանն իշխանությունը պահել չի կարող, որովհետև ժողովրդի օրեցօր ավելի լայն հատվածներ իրեն չեն ընդունում, մնում է մի ձև՝ անցնել բռնապետության։ Դրան անցնելու համար իրեն պետք է բանակը, դրա համար ուզում էր ջարդել բանակը, բայց դա չհաջողվեց մինչև հիմա ու վստահ եմ չի հաջողվի»,- եզրափակեց Մանուկյանը։

Հիշեցնենք, որ Բաղրամյան պողոտայում մեկնարկել է «Հայրենիքի փրկության» շարժման հերթական հանրահավաքը։

Աղբյուր` Փաստինֆո