Փաստ ինֆո

«Նախագահը, փաստորեն, հայտարարել է, որ չի ստորագրելու հրամանագիրը, բայց նրա կեցվածքից պարզ է դառնում, որ նա չի էլ շտապում դիմել ՍԴ»,- այս մասին «Փաստինֆո»-ի հետ զրույցում՝ նախագահի նստավայրի դիմաց ասաց Փաստաբանների պալատի նախագահ Արա Զոհրաբյանը, որոնք ՀՀ նախագահից պահանջում են՝ այսօր դիմել ՀՀ ՍԴ՝ ԶՈՒ ԳՇ պետին ազատելու վերաբերյալ վարչապետի առաջարկությունը Սահմանադրությանը հակասող ճանաչելու պահանջով։ 

Զոհրաբյանը տեղեկացրեց՝ այսօր վերջին օրն է, որ նախագահը կարող է դիմել ՍԴ։

«Ստացվում է, որ ՀՀ նախագահը ընտրել է անգործության ճանապարհը, որի իրավունքը չունի և այս պայմաններում նա՝  երկու սահմանադրական մարմինների միջև վեճը դատական հարթակ, այսինքն՝ քաղաքակիրթ լուծման հարթակ տեղափոխելու փոխարեն, բոլորիս թողնում է բախտի քմահաճույքին։ Հիմա պատկերացրեք՝ ՀՀ ԶՈՒ ԳՇ պետը և մյուս սպաները կարծում են, որ վարչապետը հրաժարական պետք է տա։ Ընդունենք շտաբի պետին ազատեցիք, բա մնացա՞ծը։ Եթե մյուս բարձրաստիճան սպաները չենթարկվեն վարչապետին՝ ի՞նչ է տեղի ունենալու։ Հետևանքները արձանագրել է նույն վարչապետը։
Հիմա այսքան հեռատեսություն ունեցող մարդը ինչո՞ւ է հանկարծ կեցվածք փոխում»,-ասաց Արա Զոհրաբյանը։

Նախաձեռնող խումբը նամակով դիմեց նախագահին՝ դիմել Սահմանադրական դատարան՝ Զինված ուժերի գլխավոր շտաբի պետին ազատելու վերաբերյալ վարչապետի առաջարկությունը Սահմանադրությանը հակասող ճանաչելու պահանջով:

Զոհրաբյանը նշեց՝ եթե նախագահն այսօր չդիմեց ՍԴ և բախտի քմահաճույքին թողեց հարցը, նախաձեռնող խումբը փորձելու է բացահայտել նախագահի վախերը, թե՝ ինչու՞ է նա վախենում վարչապետից ու ի՞նչ կատարվեց։

Հարցի լուծման երկու առաջարկ են տեսնում՝ կամ վարչապետը հրաժարվում է իր առաջարկից, կամ ՀՀ նախագահը դիմում է ՍԴ։ Նախագահն արդեն արտահայտել է դիրքորոշումը, որ վարչապետի առաջարկությունը հակասահմանադրական տարրեր է պարունակում։

«Ստացվում է՝ նախագահը ումից ավելի շատ է վախենում, նրա կողմն է բռնում»,- եզրափակեց Զոհրաբյանը։

Աղբյուր` Փաստինֆո