Փաստ ինֆո

ԲԴԽ նախագահ Ռուբեն Վարդազարյանի կինը հրավիրվել է ՀՔԾ՝ վկայի կարգավիճակով հարցաքննության։ «Փաստինֆո»-ն կապ հաստատեց ՀՔԾ-ի հետ՝ պարզելում, թե ինչ քրեական գործի շրջանակներում է հրավիրվել ԲԴԽ նախագահի կինը, սակայն ՀՔԾ-ից չմեկնաբանեցին։

Հիշեցնենք, որ իշխանական շրջանակները ԲԴԽ նախագահի նկատմամբ ճնշումների նոր ալիք են սկսել՝ դժգոհելով դատարանների՝ երբեմն ոչ իշխանահաճո դատական ակտեր կայացնելու դեմ։

Օրերս ԱԺ-ում քննարկվում էր Վճռաբեկ դատարանի դատավորի ընտրության հարցը, որի ընթացքում թեկնածուներին ներկայացնում էր ԲԴԽ նախագահը եւ պատգամավորները պետք է իրենց հարցերը պետք է ուղղեին՝ կապված Վճռաբեկ դատարանի դատավորի թեկնածուների հետ, սակայն հարցերը հիմնականում քաղաքական բնույթի էին և վերաբերում էին ԲԴԽ նախագահի ավելի վաղ արված հայտարարությանը։

«Օրհասական և պատմական պահն է հասունացել՝ գործնականում ի ցույց դնելու մեր` արդարադատություն իրականացնողներիս բարձր պրոֆեսիոնալիզմը, նվիրումը մեր հայրենիքին` իրավունքի գերակայության և օրենքի իշխանության պահապանի բարձր դերակատարությունը ապահովելու ճանապարհով:

Հայրենիքին նվիրումը և մեր առաքելությանը հավատարիմ մնալը ապացուցվելու է այս օրերին, և մենք ենք պատասխանելու այն հարցին, թե ունենք արդյոք անկախ դատական իշխանություն մեր երկրում, թե ոչ: Դատավորի բարձր արժանապատվությունը և պատիվը զուտ բառե՞ր են, թե՞ մեր գործունեության հիմնաքարը: Այսօր է, թերևս, առարկայական ու վերջնական տրվելու շուրջ երկու տարի ողջ հանրությանը ալեկոծած և դատավորներիս համար ամոթալի չարաբաստիկ հարցի պատասխանը. մենք պատերի տակ վնգստացող դատավորնե՞ր ենք, թե՞ հայրենիքին նվիրված ազնիվ պրոֆեսիոնալներ»,- նոյեմբերի 15-ին հայտարարել էր ԲԴԽ նախագահը:

ԲԴԽ նախագահից հաշվետվություն պահանվելու իմքայլական պատգամավորների վարքագիծը մասնագիտական հանրության շրջանում դիտարկվեց որպես ուղիղ ճնշման փորձ՝ Վարդազարյանի նկատմամբ, իսկ մարտի 4-ին հայտնի դարձավ, որ Վարդազարյանի կինը հրավիրվել է ՀՔԾ՝ հարցաքննության։

Մարտի 4-ին նշանակված հարցաքննությունը տեղի չէր ունեցել, քանի որ ԲԴԽ նախագահի կինը հեռախոսով էր հրավիրվել, ինչին ի պատասխան ասել էին, որ միայն պատշաճ՝ գրավոր ծանուցագրի պայմաններում կգնան հարցաքննության։

Աղբյուր` Փաստինֆո