Փաստ ինֆո

«Կորոնավիրուսային վարակի աճն այս պահին, եթե իհարկե այն կա, միայն մի հանգամանքով կարող եմ հիմնավորել՝ վարակները սեզոնային բնույթ են կրում, իսկ մենք գիտենք, որ ամեն գարնանն և աշնանը դրանք ակտիվանում և սրվում են, և սա, հատկապես, վերաբերում է օդակաթիլային վարակներին»,- «Փաստինֆո»-ի հետ զրույցում ասել է համաճարակաբան Ռուբեն Հովհաննիսյանը։ 

Վարակաբանը նկատում է՝ հատկապես կորոնավիրուսային վարակի նոր բռնկման, առավել ևս՝ համաճարակային իրավիճակի և անվերահսկելի ծավալների հասնելու վտանգ չի տեսնում, ընդհակառակը.

«Որպես կանոն, օրինաչափություն է, որ եղանակների փոփոխության ընթացքում, մարդկանց օրգանիզմը որոշակի վերափոխումների է ենթարկվում, իմուն համակարգը՝ մասնավորապես և տարբեր վարակների նկատմամբ մարդիկ ավելի խոցելի են դառնում: Խոսքը, հիմնականում օդակաթիլային վարակների մասին է: Այս ամենով հանդերձ՝ վարակների որոշակի բարձրացում, իհարկե, կլինի: Ինչ վերաբերում է կորոնավիրուսային վարակին, ապա հստակ պետք է նշեմ, որ դրա տարածման, առավել ևս անվերահսկելի չափերի հասնելու ոչ մի վտանգ ես այս պահին չեմ տեսնում: Ավելին, ամբողջ աշխարհում այս վարակը նահանջի տեմպեր է գրանցում, իսկ եղանակների տաքացմանը զուգահեռ, կորոնավիրուսը համարյա աննշան չափերի կարող է հասնել: Չմոռանանք նաև, որ այս վիրուսի տարածմանը կանխարգելում է նաև այն հանգամանքը, որ ազգաբնակչության ճնշող մեծամասնությունն արդեն իսկ վարակվել է կորոնավիրուսով և այլևս, որպես այդպիսին, վարակի փոխանցման աղբյուր չի հանդիսանում: Սա ևս խոսում է այն մասին, որ վարակի տարածումը հիմա արդեն զգալի տեմպերով նվազման, այլ ոչ թե աճի պետք է գնա»,- ասում է համաճարակաբանը:

Անդրադառնալով Առողջապահության նախարարության վերջին օրերին տարածած հաղորդագրությանը, թե կորոնավիրուսային վարակը աճի վտանգավոր տեպմեր է գրանցում, Ռուբեն Հովհաննիսյանը նկատում է՝ այստեղ ինչ–որ չափով մանիպուլյացիայի տարրեր է տեսնում և չի բացառում, որ դա կարող է ինչ – որ կապ ունենալ քաղաքական որոշ հարցերի հետ. «Չի բացառվում, որ սա արվում է երկրի ներսում արտակարգ դրության ռեժիմ մտցնելու, նոր խստացումներ սահմանելու, հավաքներն ու ակցիաները թույլ չտալու համար: Ամեն դեպքում, առնվազն անհասկանալի է, ինչպե՞ս էին կորոնավիրուսային վարակի թվերը աննախադեպ ու ինչ – որ չափով անտրամաբանական աճի տեմպեր գրանցում հատկապես պատերազմի օրերին, որի ավարտից հետո, մինչև վերջերս, կորոնավիուրսային վարակի հետ կապված այս թեման, կարծես, անուշադրության և, նույնիսկ, մոռացության էր մատնվել: Հիմա, երբ երկրում բողոքի ցույցերի ակտիվացման վտանգ և հեռանկար կա, վարակը կրկին ակտուա՞լ է դառնում: Իհարկե, կարծում եմ, այստեղ ինչ- որ բան անհասկանալի է մնում»,- եզրափակելով զրույցն, ասում է համաճարակաբան Ռուբեն Հովհաննիսյանը:

Հիշեցնենք, որ Կառավարության վերջին նիստի ընթացքում ՀՀ-ում վարչապետ աշխատող անձը հայտարարել էր, թե կորոնավիրուսային իրավիճակն անհանգստացնող է՝ նշելով, որ թվերի աճ կա:

Առողջապահության նախարար Անահիտ Ավանեսյանն էլ հավելել էր, որ, եթե հունվարի, փետրվար ամիսների սկզբին թեստավորումների 5-6 տոկոսի դեպքում էր հաստատվում կորոնավիրուսը, ապա այժմ հաստատվում է 16 տոկոսի դեպքում, հաջորդ շաբաթ էլ, ըստ նախարարության կանխատեսումների, այդ թիվը կարող է ավելանալ, հետևաբար, անհրաժեշտություն է առաջացել վերադառնալ դիմակների կրմանն ու այլ կանխարգելիչ միջոցառումների խիստ պահպանմանը:

Նախարարը նշել էր, որ մարտի 3-ի դրությամբ, արձանագրվել է կորոնավիրուսային վարակի 491 դրական դեպք, միաժամանակ հավելելով, որ հիվանդներից 20 տոկոսի մոտ կա ծանր ընթացք, հինգ տոկոսի մոտ՝ ծայրահեղ ծանր վիճակ է:

Հեղինակ՝ Նվարդ Մանվելյան

Աղբյուր` Փաստինֆո