Փաստ ինֆո

Հայրենիքի, պետության ապագայով մտահոգված քաղաքացիները մարտի 5-ին Կառավարության շենքի մոտ ուսապարկեր էին տարել։ Չնայած նրանց ակցիան քաղաքական էր, բայց ակցիայի կազմակերպիչները վստահեցնում են՝ չեն սատարում ո՛չ նախկիններին, ո՛չ էլ ներկաներին, պարզապես Հայաստանի պետականության համար են մտահոգվում։

«Փաստինֆո»-ի հետ զրույցի ժամանակ ակցիայի կազմակերպիչներից Մկո Վարդանյանն ասաց, որ ցանկանում էին ՀՀ վարչապետն ընդունի իրենց, սակայն փոխարենը ոստիկանները բերման ենթարկեցին․ «Բացել էինք նրա ուսապարկը և լիքը բաներ գտել, Ալիևի նկարը, քայլողների մարզակոշիկները։ Ուզում էինք՝ վարչապետն ընդունի մեզ և անձամբ փոխանցենք նրան այդ ճամպրուկը, բայց անհիմն կերպով բերման ենթարկեցին։ Երբ հարցրեցինք՝ ինչու են տանում, ասացին, որ մեր անձը պարզելու համար են բերման ենթարկում։ Մեզ մոտ անձնագրեր կային, իսկ դա անձը պարզելու ամենաճիշտ և հեշտ տարբերակն է, այնպես որ անիմաստ տարան»,-ասաց Մկո Վարդանյանը՝ հավելելով, որ հավանաբար վերևից զանգել էին ու հրահանգել բերման ենթարկել, քանի որ մարդկանց շարժն ավելանում էր։

Մկո Վարդանյանը նշում է, որ իրենց էին մոտենում տարբեր մարդիկ և իմանալով՝ ինչի մասին է ակցիան, միանում էին պայքարին։

«Չեմ ուզում բաժանել հասարակությունը երկու մասի, ինձ համար հայ ժողովուրդն է, բայց շատ եմ նեղվում, երբ լսում եմ, որ մեր ժողովրդի ինչ-որ մաս փորձում է պատմություն խեղաթյուրել»,-ասաց Մկո Վարդանյանը։

Վերջինս հավելեց, որ առաջիկայում նոր ակցիաներ կլինեն․ «Սա ո՛չ նախկինների, ո՛չ էլ ներկաների մասին է։ Այս ակցիայի մասնակիցներն այն քաղաքացիներն են, որոնք մտահոգված են պետականության համար և ուզում են, որ Հայաստանը որպես պետություն չվերանա»։

Հիշեցնենք, որ գյումրեցի երիտասարդները կառավարության մոտ էին տարել մի ճամպրուկ, որի մեջ,
ինչպես իրենք էին վստահեցնում, տեղ էին գտել 2018 թվականի հեղափոխության «խորհրդանիշ» ուսապարկի , ինչպես նաեւ քաղաքացիների կողմից տրված իրեր։ Դրանց թվում՝ թուղթ ու գրիչ՝ հրաժարականի դիմումը գրելու համար, իսկանդերի պայթած 10 տոկոսը, թղթե ինքնաթիռ, սպորտային կոշիկներ, ծաղրածուի դիմակ, սև թուղթ, հոգնա։

«Ուզում ենք հանձնել իրեն, որովհետև իրենից հոգնել ենք։ Իրեն խորհրդանշող իրերը, ինքն էլ՝ որպես քաղաքական մշակույթ, ավիրել են մեր երկիրը, ուզում ենք սա իրեն վերադարձնել ու խնդրել, որ հեռանա, որովհետև բավական է ինչքան վնասներ մեզ պատճառեց»,- ասել էին ակցիայի մասնակիցները։

Աղբյուր` Փաստինֆո