Փաստ ինֆո

Մարտի 1-ին Հանրապետության հրապարակում հավաքված էր իշխանությանը և Նիկոլ Փաշինյանին վստահության քվե տված շուրջ 880 հազար ՀՀ բնակիչների ընդամենը 3 տոկոսը։ Այս մասին լրագրողների հետ զրույցի ժամանակ ասաց ԱԺ «Բարգավաճ Հայաստան» խմբակցության պատգամավոր Իվետա Տոնոյանը։

«Երբ մարտի 1-ի երեկոյան իշխանությունն իր ամբողջ կազմով հրճվանքով հրապարակում էր հանրահավաքի լուսանկարներն ու տեսանյութերը, չհասկացա, թե ինչով է պայմանավորված այդ ոգևորությունը, որովհետև Հանրապետության հրապարակում հավաքված էր իշխանությանը, Նիկոլ Փաշինյանին վստահության քվե տված շուրջ 880 հազար ՀՀ բնակիչների ընդամենը երեք տոկոսը»,-նշեց պատգամավորը։

Հարցին՝ արդյոք Վազգեն Մանուկյանը շարունակում է մնալ վարչապետի իրենց թեկնածուն, Իվետա Տոնոյանը նկատեց՝ հետպատերազմյան Հայաստանում իրադարձություններն արագ են զարգանում և ցանկացած պահի հնարավոր է ցանկացած գործընթաց տեղի ունենա, որի հետ կապված կարող են փոփոխություններ տեղի ունենալ․ «Ինչ վերաբերում է Վազգեն Մանուկյանի թեկնածությանը կամ արտահերթ ընտրությունների գնալու պայմանների վերաբերյալ մեր դիրքորոշմանը, քաղաքական խորհրդի օրակարգում հենց այդ պայմանների շրջանակը պետք է քննարկման հարցը լինի»,-ասաց պատգամավորը։

Անդրադառնալով հարցին՝ արդյոք այսօր նախատեսված է Գագիկ Ծառուկյանի և Նիկոլ Փաշինյանի հանդիպումը, Իվետա Տոնոյանն ասաց․

«Այդ հանդիպումը պետք է տեղի ունենա ԲՀԿ քաղաքական խորհրդի նիստից հետո, քանի որ այսօր քաղխորհրդի նիստ նշանակված չէ, նշանակում է՝ այսօր նախատեսված չէ Գագիկ Ծառուկյան-Նիկոլ Փաշինյան հանդիպում»։

Աղբյուր` Փաստինֆո