Փաստ ինֆո

Արա Սաղաթելյանը հետապնդվում է իր քաղաքական հայացքների համար։ Այս մասին լրագրողների հետ զրույցի ժամանակ ասաց «Հայրենիք» կուսակցության նախագահ Արթուր Վանեցյանը, ով այս պահին Վերաքննիչ դատարանի բակում է՝ ի աջակցություն ԱԺ աշխատակազմի նախկին ղեկավար Արա Սաղաթելյանի։

Հարցին՝ ԱԱԾ տնօրենի պաշտոնը զբաղեցնելու ժամանակ վարչապետի կողմից ֆեյքեր որսալու հանձնարարություն ստացե՞լ է, Արթուր Վանեցյանն ասաց, որ այդ հանձնարարությունը եղել է հրապարակային․ «Ես լրագրողներին պարզաբանում տվեցի, որ ֆեյք օգտատերեր որսալն ԱԱԾ-ի գործառույթի մեջ չի մտնում և անանուն հանդես գալն ու մտքեր արտահայտելը մարդու իրավունքների հիմնարար սկզբունքներից է, որը խախտել չի կարելի։ Ուղղակի որսալ ֆեյք օգտատերերին կամ ցանկացած մեկին, ով գրում է իշխանության ականջին ոչ հաճո մտքեր, դա դեպի բռնապետություն տանող առաջին քայլերից է»,-ասաց Արթուր Վանեցյանը։

Վերջինս նշեց, որ Արա Սաղաթելյանն իր գործունեության ընթացքում եղել է այն մարդկանցից, որոնք գտնվել են ադրբեջանական հատուկ ծառայությունների և Ադրբեջանի նախագահի աշխատակազմի ուշադրության կենտրոնում, որովհետև Արա Սաղաթելյանի գործունեության արդյունքում փլուզվել են ադրբեջանական քարոզչամեքենայի շատ թեզեր․

«Այսօր այն, ինչ կատարվում է մեր երկրում, հիմք է տալիս ենթադրել, որ Արա Սաղաթելյանին հնարավոր է ձերբակալել են, որպեսզի հաճոյանան ադրբեջանական իշխանություններին։ Չունենք նման փաստեր, բայց այն երևույթները, որոնք տեղի են ունենում, նման ենթադրություն կարելի է անել»,-ասաց Արթուր Վանեցյանը եւ ավելացրել, որ նրան առաջադրված մեղադրանքը կոմեդիայի ժանրից է։

Աղբյուր` Փաստինֆո