Փաստ ինֆո

«Սահմանադրությունը թույլ է տալիս, որպեսզի ստեղծվեն համապատասխան մարմիններ, որոնք կզբաղվեն, այս պահի դրությամբ, երկրի և պետության առջև ծառացած մարտահրավերների բարեհաջող լուծմամբ, մասնավորապես՝ իրավական ճանապարհով կառավարման աշխատանքը ամբողջովին տապալած, երկիրը դավադիր պատերազմի մեջ քաշած ու պարտության տարած ղեկավարության հեռացմամբ: Այդ մարմինն, ամբողջովին, իր վրա պետք է վերցնի պետության կառավարման ղեկը՝ մոբիլիզացնելով բոլոր արդյունավետ ուժերը: Այս հեռանկարի բարեհաջող ընթացքը հիմա կախված է միայն Ազգային ժողովից»,- ասում է Մարդու իրավունքների առաջին պաշտպան Լարիսա Ալավերդյանը, «Փաստինֆո»-ի հետ զրույցում խոսելով ներքաղաքական կյանքում ստեղծված կառավարման ճգնաժամի և դրանց լուծման հնարավոր ուղիների մասին:

Վերջինս նկատում է՝ մենք տեսնում ենք, որ Ազգային ժողովը, մեծ իմաստով, անդրդվելի է. «ԲԴԽ նախագահի հետ տեղի ունեցած հարց ու պատասխանի ժամանակ մենք ականատես եղանք, որ Ազգային ժողովի իշխող մեծամասնությունը շտապում է, մրցում է՝ դուր գալ իր առաջնորդ Նիկոլ Փաշինյանին: Երբ մենք խոսում ենք այն մասին, որ կա կառավարման ճգնաժամ, ապա պետք է մեր մեջ քաջություն գտնենք՝ ինքներս մեզ խոստովանելու, որ առկա ճգնաժամը հենց այստեղ է: Այնինչ, օր օրի սպառվում են բոլոր այն հնարավոր ճանապարհները, որոնք օրինական ու ճիշտ են համարվում Սահմանադրությամբ՝ դուրս գալու այս ճգնաժամից և երկիրը չտանելու վերջնական կործանման»,- ասում է Մարդու իրավունքների առաջին պաշտպանը:

Ո´չ ժողովուրդը, ո´չ ընդդիմությունը, ըստ Լարիսա Ալավերդյանի համոզման, հակված չեն երկրում ստեղծված իրավիճակի լուծումը հակասահմանադրական ուղիով տանել և ճգնաժամի ողջ էությունը, ըստ վերջինիս, հենց սրանում է. «Կա՞ արդյո՞ք ելք ստեղծված իրավիճակից կամ ինչպե՞ս պետք է այս խնդիրը զարգացնել: Միջազգային պրակտիկում այս խնդիրը ամենատարբեր կերպով է դրսևորվել՝ նախ և առաջ՝ պետական ինստիտուտներն ու նրա ներքո գործող կառույցները պետք է հրաժարվեն ենթարկվել երկրի դե ֆակտո ղեկավար Նիկոլ Փաշինյանին, բայց, ցավոք, առայժմ ես չեմ տեսնում այդ միասնականությունը, առայժմ դա հատվածական բնույթ է կրում:

Հետևաբար, երկրում առկա ներքաղաքական ճգնաժամի համապարփակ վերլուծության արդյունքում պետք է ասեմ, որ ամենամեծ խնդիրը ոչ թե Ազգային ժողովում հատուկ ձևով վարժեցված պատգամավորներն են, այլև այդ միասնականության բացակայությունը»,- ասում է Մարդու իրավունքների առաջին պաշտպանը:

Լարիսա Ալավերդյանը հավելում է՝ շատ անհանգստացած է նրանով, որ դեռևս չլուծած առաջնային կարևորության խնդիրը, այն է՝ օր առաջ հեռացնել կապիտուլյանտ իշխանությանը, ընդդիմությունը հանդես է գալիս բազմակարծության տարածմամբ. «Իհարկե, ես վստահ եմ, որ բազմակարծությունը գեղեցիկ բան է, բայց այն բոլորովին անտեղի է այսօրինակ ճգնաժամային իրավիճակների համար, երբ բոլորն, իրականում, հասկանում են միասնական խնդրի շուրջ անհապաղ հավաքվելու անհրաժեշտության մասին, սակայն դա ինչ – ինչ պատճառներով դեռևս տեղի չի ունենում, ինչը ոչ մի պարագայում չի կարելի հետաձգել»:

Ամփոփելով զրույցը, Մարդու իրավունքների առաջին պաշտպանը հայտարարում է. «Օգտվելով այս զրույցի ընձեռած հնարավորությունից, կոչ եմ անում ընդդիմության շուրջ հավաքված խորհրդարանական և արտախորհրդարանական բոլոր քաղաքական ուժերին և անհատներին, ովքեր օժտված են մեծ ներուժով և պայքարում են հայրենիքի փրկության համար, բոլորն անխտիր միանան, մի կողմ դնեն քաղաքական և այլ տեսակի բոլոր տարաձայնություններն ու քննարկումները և միացյալ ուժերով հասնեն օրվա իշխանությունների հեռացմանը: Այս իշխանությունն առաջնորդվում է դրսից եկած և այլ երկրների շահերը սպասարկող օրակարգով: Ամենացավալին, թերևս, այն է, որ դրանք ո´չ ավել, ո´չ պակաս՝ Հայաստանի կործանումը փափագած մեր թշնամի երկրների առաջ քաշած օրակարգերն են, որ, ինչպես տեսնում ենք՝ ներքաշեցին երկիրը պատերազմի և դավադիր պարտության, իսկ հիմա արդեն՝ անկառավարելի դարձող քաոսի մեջ»:

Հեղինակ՝ Նվարդ Մանվելյան

Աղբյուր` Փաստինֆո