Փաստ ինֆո

«Ալիևին խորհուրդ կտայի թարմացնել իր գիտելիքները՝ սեփական երկրի պատմության առնչությամբ: Առնվազն, հարյուրամյա պատմությամբ հայտնի Ադրբեջանը չի կարող պատմական հայրենիք ունենալու մասին բարբաջանքներ տարածել, առավել ևս՝ այդ բարբաջանքները չեն կարող որևէ առնչություն ունենալ Զանգեզուրի հետ»,- «Փաստինֆո»-ի հետ զրույցում ասել է ազատամարտիկ Գևորգ Գևորգյանը՝ անդրադառնալով Ալիևի հայտարարությանը, թե Ադրբեջանը Նախջևանին կապող տրանսպորտային ուղին պետք է անցնի պատմական Ադրբեջանին պատկանող Զանգեզուրի տարածքով:

Ազատամարտիկն ընդգծում է՝ թշնամու այսօրինակ լկտի վարքը, որով նա բացահայտ կերպով հավակնություններ է ներկայացնում Հայաստանի Հանրապետության տարածքային ամբողջականության նկատմամբ, ուղիղ կապ ունի Հայաստանում իշխող կապիտուլյանտ և դավաճան իշխանության առկայությամբ. «Բոլորովին չեմ բացառում, որ թուրքի ադյուտանտ, կապիտուլյանտ և իշխանազավթ վարչապետը, Սյունիքի վերաբերյալ ևս գաղտնի պայմանավորվածություն ունի ադրբեջանական կողմի հետ: Դա կարող է նոյեմբերի 9-ին և հունվարի 11-ին ստորագրված հայտնի փաստաթղթերից զատ, բոլորովին այլ պայմանավորվածություն լինել, որի մասին հասարակությունը նույնիսկ տեղյակ չէ: Մի բան հստակ է՝ սրանից ամեն ինչ սպասելի է, իսկ թուրք – ադրբեջանական տանդեմը, ակնհայտորեն, համարում է, որ եկել է ամենահարմար ժամանակը՝ լուծելու տարիներով իրենց կոկորդին մնացած Զանգեզուրի հարցը՝ կանաչ ճանապարհ բացելով Պանթյուրքիզմի իրականացման վաղեմի երազանքի համար: Այս իմաստով, բոլորովին պատահական չէ, որ հենց Թուրքիան ու Ադրբեջանն են այդքան շահագրգռված, որպեսզի այստեղ՝ Հայաստանում, հանկարծ, իշխանափոխություն տեղի չունենա: Պատմության մեջ չլսված բան է, որ Թուրքիայի քաղաքական ամենաբարձր վերնախավը՝ Արտաքին գործոց նախարարի և, մինչև անգամ, Էրդողանի բերանով հայտարարեն, որ Հայաստանում իշխանափոխությունն այս պահին անթույլատրելի է»,- ասում է ազատամարտիկը:

Գևորգ Գևորգյանը նկատում է՝ բոլոր նրանք, ովքեր հասկացել են, թե ինչ է կատարվում պետության ներսում և մեր երկրի հետ, արդեն իսկ արել են իրենց ընտրությունը՝ կանգնելով ընդդիմության կողքին և պահանջելով իշխանազավթ ու կապիտուլյանտ վարչախմբի հեռացումը, իսկ նրանք, ովքեր այդպես էլ չեն հասկացել, ապա նրանց որևէ բան ասելն, արդեն, անօգուտ է: Վերջինս նկատում է՝ Հայաստանի լինել- չլինելու խնդիր կա այլևս, որը կարելի է լուծել օրվա իշխանությունների անհապաղ և արագ հեռացմամբ միայն:

Խոսելով ՀՀ ԶՈւ Գլխավոր շտաբի պետի շուրջ կատարվող զարգացումների մասին՝ Գևորգ Գևորգյանը նկատում է՝ եթե, հանկարծ, դավաճան իշխանություններին հաջողվի մարտի 9-ին հեռացնել Գլխավոր շտաբի պետ Օնիկ Գասպարյանին, ապա կարող ենք արձանագրել Հայոց բանակի վերջնական կազմաքանդումը, ինչը ևս, ըստ վերջինիս, թուրքական կողմի հրահանգն է, որը, ամեն գնով փորձում է իրականություն դարձնել թուքի ադյուտանտ և դավաճան դրածոն՝ Նիկոլ Փաշինյանը:

Ինչ վերաբերում է ՀՀ նախագահ Արմեն Սարգսյանի գործողություններին՝ Գևորգ Գևորգյանը արձանագրում է՝ ՀՀ-ում նախագահ աշխատող անձը, հերթական անգամ, իր վրայից գցում է սեփական պատասխանատվության իր բաժինը, որը խոսում է, բացառապես, այն մասին, որ այդ մարդն, առնվազն, անհաղորդ է երկրում տեղի ունեցող վտանգավոր և կործանարար զարգացումներից:

Հիշեցնենք, որ այսօր Ադրբեջանի նախագահ Իլհամ Ալիևը, ելույթ ունենալով Տնտեսական համագործակցության կազմակերպությունների համաժողովին, նշել էր, որ տրանսպորտային նոր միջանցքն անցնելու է Ադրբեջանի պատմական տարածքով՝ Զանգեզուրով, և միացնելու է Ադրբեջանի հիմնական մասը երկրի անբաժան մաս հանդիսացող Նախիջևանի Ինքնավար Հանրապետության և Թուրքիայի հետ:

Ալիևի այս հայտարարությունը իրարամերժ արձագանքների տեղիք է տվել: Հարցին անդրադարձել է նաև ՀՀ Արտաքին գործոց նախարարության խոսնակը, նշելով, որ Ադրբեջանի նախագահի նմանօրինակ հայտարարությունը տապալում է եռակողմ հայտարարությունների կյանքի կոչումը:

Հեղինակ՝ Նվարդ Մանվելյան

Աղբյուր` Փաստինֆո