Փաստ ինֆո

«Մինչ մեր երկրում քաոսային իրավիճակ է տիրում, թշնամին չի քնում: Մենք տեսնում ենք, թե ինչպես է ադրբեջանական կողմը մեր քթի տակ՝ Սյունիքում խրամատներ փորում: Դե իհարկե, եթե նրան թույլ են տվել գալ, հասնել ու կանգնել հայի տան կողքին, ապա նա այնտեղ խրամատներ կփորի»,- ասում է Մարդու իրավունքների առաջին պաշտպան Լարիսա Ալավերդյանը, «Փաստինֆո»-ի հետ զրույցում անդրադառնալով նախօրեից տարածված տեղեկատվությանը, որ ադրբեջանական կողմի զինված ուժերը սկսել են խրամատներ փորել Սյունիքում:

Լարիսա Ալավերդյանը նկատում է՝ հարց ունի պատկան մարմիններին՝ կլինի դա ԱԱԾ-ն, Պաշտպանության նախարարությունը, թե սահմանապահ ուժերը՝ ո՞ւր եք դուք, պարոնայք. «Վերջապես պե՞տք է հստակեցվի, որ ինքնուրույն և միայնակ կերպով որևէ պետություն իրավունք չունի սկսել որևէ տեսակի նմանօրինակ գործողություն, որ նախաձեռնել է Ադրբեջանը, էլ չեմ ասում՝ սահմանների հետ կապված: Բոլորը՝ թե´ միջազգային փորձագետները, թե´ այդպիսի հարցերով զբաղվող մասնագետներն ահազանգեցին, որ այդպես սահման գծելն, առնվազն, անօրինական գործողություն է: Սահմանները գծվում, հաստատվում և վերջնական հանգուցալուծում են ստանում միջպետական վերահսկողության ներքո, գումարած՝ երրորդ կողմի ներկայությունն այդ պրոցեսին: Ես ուզում եմ հասկանալ, թե ո՞ւր է այդ հանձնաժողովը կամ ինչո՞ւ հայկական կողմի իշխանությունները դա չեն պահանջում»,- ահազանգում է Մարդու իրավունքների առաջին պաշտպանը միաժամանակ հավելելով՝ ինչո՞ւ է անգործության մատնվել Ազգային ժողովը և ինչո՞ւ նրան չի մտահոգում երկրի սահմաններին տեղի ունեցող այս խիստ վտանգավոր զարգացումները:

Լարիսա Ալավերդյանը նկատում է՝ ստեղծված իրավիճակով և սահմաններին տեղի ունեցող անթույլատրելի գործողությունների ֆոնին, անհասկանալի վարքագիծ են դրսևորում նաև Ազգային ժողովի, առնվազն, ոչ իշխանական թևին պատկանող խմբակցությունները նույնպես. «Չի կարելի ինքնահոսի թողնել այնպիսի խնդիր, ինչպիսին սահմաններին կատարվող անթույլատերլի զարգացումներն են: Հիմա ես ուզում եմ հստականալ՝ ո՞վ է պաշտպանում սահմանները հայկական կողմից, ո՞ր կառույցը կամ ո՞ր գերատեսչությունն է պատասխանատու այն ամենի վերաբերյալ, որ կատարվում է վերջին շրջանում մեր սահմանների հետ: Եթե այս հարցերը պատշաճ կերպով չեն բարձրացվում Ազգային ժողովում և ամեն ինչ թողնված է փողոցի հույսին, ապա, վախենամ, մեզ լավ ապագա չի սպասում: Մեր երկիրը վտանգի մեջ է, հետևաբար, հիմա մենք պետք է ոչ թե թուլանանք, այլ մոբիլիզացվենք»,- ամփոփելով զրույցն, ասում է Մարդու իրավունքների առաջին պաշտպան Լարիսա Ալավերդյանը:

Հեղինակ՝ Նվարդ Մանվելյան

Աղբյուր` Փաստինֆո